YESAYA 19 - WUKE SUSI WATTI'U AL᷊AL᷊USASSA

Ruata sarun makkuumannu Mesir

¹ Eteindi tanata su ola'u Mesir. Mawu nirumanta su Mesir uasa'e winabbawa apan mal᷊ihakka. Manga paal᷊uannu Mesir mangngiladda su saruan-Ne wuṛṛu taumata Mesir naurangnga naungnge.

² Mawu nabbisara, “i Ya'u sarun mamonsen ara'e mangangkatta pangalon sangka tuṛṛanganna su Mesir: Tuṛṛangnga mando'appa tuṛṛangnga, al᷊indonganna mando'appa al᷊indonganna, soa mando'appa soa wuṛṛu araratuanna mando'appa araratuanna.

³ I Ya'u sarun mamal᷊aatta manga hol᷊agu taumatan Mesir wuṛṛu mamaddi ikkatti mangitou. I mangitou sarun maiontolla su manga paal᷊uanna, maddorongnga tataggu wuṛṛu tatantiro su manga tonaassa wuṛṛu manga ghaṛṛaho.

⁴ Mesir sarun Ta'u itantilla su liman sangkatou ratu apan maṛṛaggissa apan mamarenta si mangitou ringannu mal᷊aṛṛaga. I Ya'u, Mawu Apan Lembontaṛṛino, buatte nabbisara.”

⁵ Ua'en Sal᷊ukku Nil sarun masahatta wuṛṛu mallannu mammara.

⁶ Manga aṛṛitanna sarun mawukku'a hal᷊urune sutempo ua'ene mattite. Wungkal᷊o wuṛṛu nannal᷊o sarun tumolangnga.

⁷ Ahewallu pa'olaanna wualanna apan uawedde'a su al᷊o'engngu winggin Sal᷊ukku Nil sarun maṛṛagassa ana see italla'u anginna.

⁸ Manga samakka apan wiasane mannametta inassa su sal᷊ukka udde sarun sumal᷊iomanna wuṛṛu lumallu ana waugu pe'anna wuṛṛu lal᷊ombo tate gunane lai. Manga mandaradu'a sarun maaddio'a naungnge;

^9-10 i mangitou wuṛṛu taumatan sewa sarun masusa naungnge wuṛṛu aral᷊eoannu ikkatta.

¹¹ Woddo atonna manga piaṛṛa'u soa Zoan! Taumatan Mesir apan apandeanne mangonggollu al᷊aṛṛa'a apan longonna! Waṛṛani atonna i mangitou mammasingkatta ratu manungku i mangitou pallaṛṛite manga taumata pande wuṛṛu mararatu sutempo ṛoro!

¹² Ei, ratu Mesir, suapa manga mananantironu apan pande udde? Asinungka i mangitou masingkattu hol᷊agu Mawu Apan Lembontaṛṛino su Mesir.

¹³ Manga piaṛṛa'u Zoan wuṛṛu Memfis uddewe manga taumata longonna. I mangitou wal᷊inewe piaṛṛangnge, ewe'e mangngal᷊iwun pabbawalage.

¹⁴ Ete Mawu apan ma'ola'a si mangitou mangonggollu al᷊aṛṛa'a apan mangngal᷊iwu. Pangillul᷊eanne, Mesir mangke su sal᷊a, wuṛṛu lullallengge naal᷊ihidda taumata wu'anna apan nattanggul᷊ewakka su mutane sassane.

¹⁵ Su Mesir tawe taumata apan ta'e pia ikkanne, mawae ete tembonanne aroddi lai tumanangnge, mawae ete taumata pia pangkanne aroddi lai taumata lal᷊ebbone ara'e taumata wiasa.

Mesir sarun massubba Mawu

¹⁶ Sarun a'omanna tempone walahannu Mesir maola'a ere wawine apan matal᷊o wuṛṛu matta'utta. I mangitou mangngiladdu atata'utta maasilo Mawu Apan Lembontaṛṛino mamatten lima-Ne makkuumanni mangitou.

¹⁷ Leta'u Yehuda maola'a paggahahion taumatan Mesir suapan i mangitou tagguannu laṛṛawessu Mawu Apan Lembontaṛṛino su ola'i mangitou.

¹⁸ Sutempo udde sasinaukku Ibrani sarun ipaatta sulal᷊ummu lima soa su Mesir. Manga taumata poiaroddi massalu ringannu arannu Mawu Apan Lembontaṛṛino. Sambau suwallattu manga soa udde sarun isaggo “Soa Matannallo”.

¹⁹ Sutempo udde su al᷊imboi banua Mesir sarun pia sambau mezbah Mawu, wuṛṛu su passaranne sambau diṛṛi watu apan niṛṛae hunan Mawu.

²⁰ Mezbah wuṛṛu diṛṛi udde naola'a sambau papasingkatta Mawu Apan Lembontaṛṛino udde su Mesir. Amungkangngu walahanna udde allanganna, wuṛṛu i mangitou umui maiontolla su Mawu, i Tou sarun mandolokku sangkatou iapasal᷊amatta si mangitou.

²¹ Mawu sarun mapal᷊iatta'u watangan-Ne su walahannu Mesir, wuṛṛu i mangitou sarun maaillal᷊a wuṛṛu massubba si Tou, lapiddu mangapiddu aonggolla wuṛṛu sasamba si Tou. I mangitou sarun maddiandin Tou ringannu sasalu wuṛṛu mappaamattu riandi udde.

²² Mawu sarun manggesekka walahannu Mesir, arawe wua'udde i Tou sarun mangundamma si mangitou. I mangitou sarun mabbal᷊i'a mabelengnga ringannu Mawu, wuṛṛu i Tou sarun maddaringikka aal᷊iomanni mangitou lapiddu mangonggollu aul᷊en baddangnga.

²³ Sutempo udde sarun pia dal᷊anna wahewalla suwallattu Mesir wuṛṛu Asyur. Tumana'u wanua darua udde sarun mapul᷊e inai umamattu lal᷊anna udde wuṛṛu i mangitou sarun mattaṛṛamawu suadio'a.

²⁴ Sutempo udde Israel sarun uasul᷊ungnga atanggakke ringannu Mesir wuṛṛu Asyur, ne araratuanna tatallu udde sarun maola'a al᷊amatta su ahewallu runia.

²⁵ Mawu Apan Lembontaṛṛino sarun mangal᷊amatta si mangitou wuṛṛu mabbisara, “i Ya'u mangal᷊amatta si yamiu, ei Mesir uma-U, Asyur niriaddi-U, wuṛṛu Israel umatta apan nipile-U.”