YESAYA 17 - WUKE SUSI WATTI'U AL᷊AL᷊USASSA

Ruata sarun makkuumannu Siria wuṛṛu Israel

¹ Mawu nabbisara, “Damsyik tate lai maola'a soa, arawe tumba'u aombuannu manga tuiddu wal᷊en nangkaṛṛa'a.

² Manga soa su Siria sarun itantangnga saran mal᷊annu-l᷊annu wuṛṛu maola'a tampan ammul᷊annu winatangnga; tawe saran sangkatou apan mallimbuakka si mangitou.

³ Israel sarun awul᷊iannu pattillummanna wuṛṛu Damsyik awul᷊iannu awawebbasi mangitou. Taumatan Siria apan lambene sarun mabbisakka sulal᷊ummu asasusa ere taumatan Israel, i Ya'u, Mawu Apan Lembontaṛṛino nabbisara.”

⁴ Mawu nabbisara, “Sarun a'omanna tempone awawantugu Israel muddussa, wuṛṛu pa'a'alane mawul᷊i.

⁵ Israel sarun maola'a ere wawail᷊anna su Refaim apan buatte niitingnga gandumme, wuṛṛu tumba'u nallambe addio'a.

⁶ Naal᷊ihidda alun zaitun apan buatte niti'o wuane, wuṛṛu natantangnga ete manga pira su pentakku manga rannane, aroddi lai Israel tumba'u addio'a taumata masal᷊amatta. I Ya'u, Mawu, Ruatan Israel, buatte nabbisara.”

⁷ Su allo udde taumata sarun maiontolla apia su Mandariaddine, Ruata susin Israel.

⁸ I mangitou tate lai mangantimma hessin inolaanni mangitou sassane, eteudde manga mezbah tampa pananutunganna amania, wuṛṛu manga paal᷊uanni Dewi Asyera.

⁹ Su allo udde, manga soan Israel apan matohassa lal᷊indumme sarun mabbal᷊i aomboannu wal᷊en nangkaṛṛa'a wuṛṛu mal᷊annabba, ere manga soa apan tinantangngu taumatan Hewi wuṛṛu Amori sutempo i mangitou tinumal᷊angnga wua dingannu taumatan Israel.

¹⁰ Israel, i'o naabul᷊iten Duata apan nanal᷊amatta wuṛṛu mallu'adda si'o, naal᷊ihidda wowone watu apan matohassa. Mawal᷊i'a, i'o buatte nassuanna manga wailla hunan manga monganna.

¹¹ Arawe salaiwe sasuanna udde nasal᷊a nassolla wuṛṛu nabbantite su allo i'o nassuannu sasuanna udde, arawe tawe buane. Pia tumba'u asasusa wuṛṛu ṛadda'a apan tawe mawul᷊i.

Manga wanuan seetta sarun iwaddo

¹² Manga walahanna apan matohassa tantal᷊anna maggio; tingikke maddallu'a naal᷊ihidda tingikku lua'a mabbasse.

¹³ I mangitou inaite naal᷊ihidda manawangnga apan bahewalla. Arawe Ruata namansaggi mangitou, ana see i mangitou tinumal᷊angngu watanganne sara marau. I mangitou nienggenanna naal᷊ihidda wal᷊a'a su welen buidda itattalla'u anginna, ara'e awu nitiuppu al᷊isusu.

¹⁴ Sutempo wawallo i mangitou mandantan atata'utta apan masaddatta, arawe napawe marua allote i mangitou nawul᷊ite. Eteudde pal᷊addu taumata apan maṛṛampassa si ite.