YESAYA 15 - WUKE SUSI WATTI'U AL᷊AL᷊USASSA

Ruata sarun makkimunsa'a Moab

¹ Eteindi tanata Mawu su ola'u Moab. Soa Ar wuṛṛu Kir niuno sulal᷊ummu tempo saṛṛabbi, wuṛṛu wanua Moab naola'a mal᷊anna-l᷊annabba.

² Tumana'u Dibon sinuma'a wuidda maddea'a luaianna su tampa passubbanna manga monganna. Tumana'u Moab ringannu massusa nilumallun soa Nebo wuṛṛu Medeba. I mangitou nangiṛṛi pua wuṛṛu omengnga tatiala massusa.

³ Manga taumata su lal᷊anna ual᷊uṛṛen laubba karongnga tatialan lullal᷊o; taumata lullallu wuṛṛu lulluai su leta'a mal᷊alangnga wuṛṛu su atuppu wal᷊en.

⁴ Taumatan Hesybon wuṛṛu taumatan Eleale maggontol᷊anna, wuṛṛu tingikki mangitou aaringiṛṛanna sara Yahas. Ewe'e lai manga tantara mangngiladda; i mangitou niawul᷊ianten awawaṛṛani.

⁵ I ya'u u'akkannu Moab! Tumanangnge nattal᷊angnga watukku soan Zoar wuṛṛu watukku Eglat-Selisia. Piaddu sinuma'a su lal᷊anna watukku Luhit lapiddu lulluai; piaddu lai apan tinumal᷊angnga watukku Horonaim lapiddu ma'uare ana waugu niaṛṛiaannu asasilaka.

⁶ Ua'en Sal᷊ukku Nimrim wuṛṛu nannal᷊o apan tinumuwo su winggine naṛṛangute, tate lai manga sasuanna apan mangelomma.

⁷ Manga taumata apan tinumumbe ana'u Sal᷊ukku Haarabim maddea'a manal᷊amatta al᷊awo'u darotongngi mangitou.

⁸ Suapan tampa su passarannu Moab niaringiṛṛanna aintul᷊i. Lal᷊uai udde niaringikka su Eglaim wuṛṛu Beer-Elim.

⁹ Su Dibon ua'en sal᷊ukka nabbal᷊i maṛṛamu ana waugu nal᷊o'annu daṛṛa. Wuṛṛu Ruata sarun mandantan manga inolaanna apan asaddatanne lai su manga taumata poiaroddi. Mamamate apan nirolokke sarun mamate anambon taumatan Moab apan ta'e wiakka.