YESAYA 14 - WUKE SUSI WATTI'U AL᷊AL᷊USASSA

Nabelengnga wuassu pamuanganna

¹ Mawu sarun umakkannu Israel uman-Ne, wuṛṛu mamile si mangitou apia maola'a pussa'a-Ne. I Tou sarun mapaatana'i mangitou apia su wanua mangitou sassane. Taumata raho sarun dumanta wuṛṛu ma'ammulli mangitou.

² Manambo pabbawlaga apan mantul᷊ungngu walahannu Israel mabelengnga su wanua apan nionggollu Mawu si mangitou, wuṛṛu poiaroddi manga walahanna udde mattaṛṛuallangnga su Israel. Israel sarun manawanna manga taumata apan buatte nanawanna si mangitou wuṛṛu mamarenta manga taumata apan buatte nangallangnga si mangitou.

Ratun Babel su runian taumata nate

³ Mawu sarun mamallossu taumatan Israel wuassu atataddu'a wuṛṛu asasusane, wuṛṛu wuassu manara mawakkatta apan iwabbata'a si tou.

⁴ Napawe Mawu ma'ola'a udde, i mangitou sarun mangal᷊uandaga ratun Babel arendi, “Ratu maṛṛagissa nanawote! I tou tate mapangallangnga apia.

⁵ Mawu buatte nanginsue pamamarenta manga tembonanne lal᷊eo

⁶ apan ringannu massa'u mangngallanga manga walahanna wuṛṛu sidutu mannansara si mangitou.

⁷ Panginsueanne ahewallu runia sarun ma'amanna wuṛṛu mal᷊annabba, ne suapan taumata mangngantarin al᷊al᷊uassa.

⁸ Punnu alu eru wuṛṛu punnu alu cemaran Libanon lulluassa ana waugu ratu apan maṛṛagissa udde nanawote, wuṛṛu nangingkatte, taweddu nandolokka nanuwangnga si mangitou!

⁹ Runian taumata nate suadio'a lulluassa mannal᷊oho ratun Babel udde. Ne nabbangunte ṛimuuddu manga taumata apan dorone uaparenta runia, wuṛṛu ṛimuuddu manga ratu nabbangunna wuassu addera mangitou.

¹⁰ I mangitou sarangkanambone u'ui si tou, ‘Ei! Orassa indi i'o erete i yami, lome wuṛṛu tawe auatanna!

¹¹ Dorone i'o wabbantuhannu musikku kecapi, arawe orassa indi i'o su tampaten araratuannu runian taumata nate. Manga ul᷊idda maola'a lallowangannu wuṛṛu oa'a maola'a tatimbuṛṛunnu!’

¹² Ei ratun Babel, dorone i'o anumpitanna aṛṛusuallo apan mal᷊ansiangnga, arawe orassa indi nundu'e su leta'a! Dorone i'o mammaddon manga walahanna, arawe orassa indi i'o nema'e su leta'a.

¹³ I'o mappulu suma'a su langitta wuṛṛu mangaddon adderan araratuannu roso su anumpitanna apan atanggaṛṛanne! Su ṛingiddu i'o wotongnge uma'ianna ere ratu roso su wowone su samba'an sawannakka, tampa manga monganna ma'ammulla.

¹⁴ I'o mabbisara, manungku i'o sarun umawitta roso ere atanggakku winabbawa wuṛṛu maola'a ere Apan Lembon Atanggaṛṛanne.

¹⁵ Wutte'e i'o niwontolla su wageangnge apan alal᷊umanne wuassu runian taumata nate.

¹⁶ I mangitou apan uatana'a isudde sarun ma'ellega wuṛṛu manutudda si'o. I mangitou sarun maiwal᷊o, ‘Eteindi taumatane apan mangngio'u runia wuṛṛu mappahahio manga araratuanna?

¹⁷ Ete i tou apan nakkimunsa'a manga soa wuṛṛu namal᷊u runia naola'a wadda'u anne? Ete i tou indi apan taambe saran paassa tawe nawallossu manga taumata niatawanne ara'e namala mangitou mapul᷊e?’

¹⁸ Anambon lanna'u ratun manga nilabbingnga ringannu awawantuga su lal᷊abbingannu sambau-sambau,

¹⁹ arawe i'o tawe lal᷊abbinganne; winal᷊unannu niramme ere solla apan nitol᷊a'a, niomboannu manga winal᷊unannu pejuangnga apan nate sulal᷊ummu pangalo, wuṛṛu niramme suaddio'i ṛuanganni mangitou watukku liangnga watu, naal᷊ihidda winal᷊unanna apan lakkindanna.

²⁰ I'o buatte naminasa wanuanu wuṛṛu namate pabbawalagu sassane. Ana waugu udde i'o sarun tawe ilabbingnga ere manga ratu waine. Tawe saran sangkatou wuassu walahannu apan dal᷊eo udde sarun iapaasal᷊amatta.

²¹ Pallaṛṛata malihakke itattakka! Manga parinsinu sarun mate ana waugu rosan al᷊amonan mangitou. Tawe saran sangkatou wuassi mangitou apan mamarenta su runia ara'e mapararisikku manga soa.”

Ruata sarun makkimunsa'a Babel

²² Mawu Apan Lembontaṛṛino nabbisara, “I Ya'u sarun mamangalo Babel wuṛṛu mapaawul᷊ine. Tawe saran sangkatou apan Ta'u iapaasal᷊amatta, ewe'e lai al᷊aṛṛana'a tawe Ta'u iwala wiakka. Ya'u, Mawu, buatte nabbisara.

²³ Babel sarun Ta'u olaanna wiso apan atatanaannu manu'a mammeo. Babel sarun Ta'u waresianna. I Ya'u, Mawu Apan Lembontaṛṛino, buatte nabbisara.”

Ruata sarun maminasan Asyur

²⁴ Mawu Apan Lembontaṛṛino nassalu: “Apan buatte Ta'u nihol᷊aga sarun matipussa.

²⁵ Taumatan Asyur su Israel wanua-U, sarun Ta'u pateanna, wuṛṛu apan uatana'a su manga wowone sarun Ta'u ṛindanna. I Ya'u sarun mamallossu pabbawala-U wuassu patataṛṛuallanga wuṛṛu wuassu winabbawa apan iwabbata'i mangitou ṛatangannu taumatan Asyur.

²⁶ Eteindi ṛiing-Ku su runia; pulal᷊ang-Ku naṛṛatadde ipakkuumannu manga walahanna.”

²⁷ Mawu Apan Lembontaṛṛino buatte nakkawessa ma'ola'a ereudde, i tou nani'akke pulal᷊an-Ne ipakkuumanna, wuṛṛu taweddu sarang sangkatou wotongnge maasingaddi Tou.

Ruata sarun maminasa taumatan Filistin

²⁸ Eteindi tanata apan nial᷊iata su tonna i Ratu Ahas nate.

²⁹ Ei walahannu Filistin, pal᷊o-pal᷊o apan ipappaatta ipamuulla si'o napaddite. Arawe arie i'o lumuassa, ana waugu amungkangngu atoanna sambau nate, atoanna apan nangillembon al᷊eoanne lai rumanta mallol᷊ossa si tou, wuṛṛu tallukku atoanna mangngissa'u naga pia papaidde.

³⁰ I ya'u sarun aṛṛiaannu al᷊aṛṛutumma apan masaddatta, wuṛṛu anambon taumata apan nallambe sarun pateanna. Mawal᷊i'a, taumata apan aasianganne wuassu umattu Mawu sarun maasomba anna, wuṛṛu manga taumata lome sarun mabbiakka ringannu masunge matahul᷊andimma.

³¹ Lalluaite, wuṛṛu pangintul᷊ite pa'iontolla, ei manga soan Filistin! Ṛinone i yamiu sarangkanambone maggion atata'utta! Winabbawa awu sussal᷊oi wuassu sawannakka mammasingkattu darantan seetta; tawe taumata matal᷊o suwallatti mangitou.

³² Sasimbakka apa apan sarun isimbakki ite su manga daroloṛṛanna apan rumanta wuassu walahannu Filistin? I ite sarun sumimbakka si mangitou manungku Mawu buatte namangunna Sion, wuṛṛu uman-Ne apan uatataṛṛangnga sarun maasomba aontolla isudde.