Biblia Todo Logo
Bìoball air-loidhne

- Sanasan -

YESAYA 13 - WUKE SUSI WATTI'U AL᷊AL᷊USASSA


Ruata sarun makkuumannu Babel

1 Eteindi tanatan Duata, apan nisengkammi Yesaya ana'i Amos su ola'u Babel:

2 Elea'e manga waneṛṛan pangalo su puiddu wuidda lunggukka! Pamaggote manga tantara, wuṛṛu wattea'e pulal᷊annu tadea'u i mangitou mamangalo manga ngaran soa apan mawunga udde.

3 Mawu buatte namaggo manga atumannaṛṛanne apan nipile-Ne. I mangitou matohassa, mangngimanna watanganne wuṛṛu wotongnge pangantiman-Ne. Mawu nandolokki mangitou makkuumannu manga taumata apan niaṛṛinoannu asasa'u-Ne.

4 Paddaringikke tingikku hio su panenteanna, naal᷊ihidda tingikku ammul᷊annu taumata apan tumanite manambo. Paddaringikke hio manga araratuanna wuṛṛu manga walahanna apan tantal᷊anna uaammulla. Mawu Apan Lembontaṛṛino mammarikissa tantaran pangalo.

5 I mangitou nirumanta wuassu manga wanua marau su pentakku runia. Sulal᷊ummu asasa'u-Ne Mawu nappaatti mangitou ipamate ahewallu runia.

6 Lalluaite, ana waugu allo Mawu maranite, eteudde allon papate apan niaparanta Mawu Apan Lembontaṛṛino.

7 Suapan taumata sarun maapendamma lome limane wuṛṛu awul᷊iannu awawaṛṛanine.

8 I mangitou sarangkanambone sarun aṛṛiaannu atata'utta apan bahewalla, wuṛṛu tuttambul᷊ilinnu atataddu'a ere wawine apan tantal᷊anna mangngunsiwe. I mangitou sarun masasaile ringannu asasinggawanga, hatine namillossa ana waugu massili.

9 Allo Mawu sarun dumanta, wuṛṛu su allo udde Mawu mapasabbangngu asasa'u-Ne wuṛṛu araṛṛagin-Ne apan bahewalla. Runia sarun maola'a wadda'a lol᷊okka, wuṛṛu suapan taumata marosa sarun mate.

10 Suapan anumpitanna wuṛṛu ammul᷊annu anumpitanna sarun umaddo manemakka; matannallo sarun maddandumma sutempo i tou sumabbangnga, wuṛṛu wul᷊anna sarun tate semakke lai.

11 Mawu nabbisara, “i Ya'u sarun makkuumannu runia ana waugu al᷊al᷊eone, wuṛṛu manga taumata lal᷊eo ana waugu rosa mangitou. Suapan taumata matanggakka naungnge sarun Ta'u iapawawo, taumata mawunga wuṛṛu maṛṛagissa sarun Ta'u iṛṛuumanna.

12 Taumata apan iapasal᷊amatta matul᷊u atonna, i mangitou maaddio'anna wuassu wul᷊awanna tutune.

13 Ya'u sarun ma'ola'a langitta mangngindo wuṛṛu runia umio'a wuassu tampane su allo i Ya'u, Mawu Apan Lembontaṛṛino, mapal᷊iatta'u asasa'u-U.

14 Taumata raho apan uatana'a su Babel sarun massal᷊iawukka wuṛṛu tumal᷊angnga su wanuane sambau-sambau. I mangitou naal᷊ihidda rusa apan tinumal᷊angngu matataṛṛiasu, ara'e ammul᷊annu domba apan tawe mallal᷊u'adde.

15 Isai-sai apan asametanna sarun usu'anna sara iapate.

16 I mangitou sarun mabbiala ana'i mangitou ta'e maṛṛamutta ṛimunsaanna, manga wal᷊e mangitou anuanna wuṛṛu manga awingnge laṛṛampasanna.”

17 Mawu nabbisara, “i Ya'u nangal᷊oren walahannu Madai iapapangalo Babel. I mangitou tawe aonggol᷊annu sal᷊a'a ara'e wul᷊awanna.

18 Ringannu al᷊ati'anna wuṛṛu anaanne i mangitou sarun mamate manga taumata saṛṛen tumuwo. I mangitou tawe umakkannu ana'a maṛṛamutta wuṛṛu tawe tumal᷊antuppu dario'a.

19 Wuassu anambon araratuanna, ete Babel udde aṛṛansanganne wuṛṛu naola'a ilalluassu tumanangnge. Arawe i Ya'u, Mawu, sarun makkimunsa'a, ere buatte Ta'u niola'a su Sodom wuṛṛu Gomora.

20 Tate saran sangkatou apan matana'a poiaroddi. Tate taumatan Arab mamamal᷊intadda apan sarun mantaingngu rasanne su tampa udde, wuṛṛu tate mallal᷊u'adda winatangnga apan mangapiddu ambingnga dombane iapaanna nannal᷊o isudde.

21 Tampa udde sarun atanaannu manga winatangnga mal᷊aṛṛaga. Mammeo sarun massal᷊akka su manga wal᷊e mangitou, wuṛṛu manu'a unta sarun matana'a poiaroddi. Manga ambingnga matengnga sarun sumolo'a suwallattu manga wal᷊en apan nangkaṛṛa'a.

22 Tatawannu asung kahuranganna wuṛṛu serigala pia sanseongnge wuassu manga puri wuṛṛu manga wal᷊en araratuannu Babel. Tempo ananawone maraniten a'omanna wuṛṛu allone tate iasoṛṛotta lai.”

Lean sinn:



Sanasan