YESAYA 1 - WUKE SUSI WATTI'U AL᷊AL᷊USASSA

¹ Wuke indi lal᷊oṛṛoannu manga tanata su ola'u Yehuda wuṛṛu Yerusalem apan niapal᷊iatta'u Ruata si Yesaya ana'i Amos sutempo i Uzia, i Yotam, i Ahas wuṛṛu i Hizkia namarenta su Yehuda.

Ruata nanaggu uman-Ne

² Paddaringikka ei langitta, panutukke ei runia! Mawu nabbisara, “Manga al᷊aṛṛana'a apan buatte nipaddul᷊ianang-Ku namangalo si Ya'u.

³ Sapi maaillal᷊a tatahuanne, keledai maaillal᷊a tampan aannananne apan buatte nisaddian mawune, arawe uma-U Israel tawe; i mangitou tawe maatutukka.”

⁴ Nasilakate i yamiu walahanna apan marosa, manga taumata apan mapontol᷊osanna wuṛṛu lal᷊eo! I yamiu nanawote su manga rosang kamiu. I yamiu buatte nanol᷊a'u Mawu wuṛṛu tinumal᷊iudda Ruata Apan Lembonna'ukkassa apan ṛinone subbanni yamiu.

⁵ Anio i yamiu sidutu mangke mannompolla? I yamiu mappulu iṛṛuumanna lembon awakkatanne lai? Puanu napeneten manga pinsulla, naungnga wuṛṛu ṛingirannu maradda'a.

⁶ Wuassu pua maddatingngu pal᷊addu ledda taweddu mapia su waddangngu. I yamiu napenen manga hanne, manga liwitta wuṛṛu manga lessa. Manga lessanu udde taambe niwaresi ara'e niwa'issa, tawe lai niundamannu lana.

⁷ Wanuanu buatte nihohakka; manga soanu nitutungnga na'oman sara nepodda. Su saruannu matanu taumata raho mangnganu letangngu wuṛṛu mandomba al᷊awo'a.

⁸ Tumba'u Yerusalem nallambe, arawe naola'a soa apan lal᷊iwunanna wuṛṛu tate maa'al᷊iore, naal᷊ihidda rasanna su waillu anggore ara'e sambengessa su waillu katimu.

⁹ Unnuwisara Mawu Apan Lembontaṛṛino, tawe mandalukka manga pira taumata hunan kite, i ite lai nasuete abbi, ere Sodom wuṛṛu Gomora.

¹⁰ Yerusalem, manga piaṛṛangnge wuṛṛu walahannu naola'a ere taumatan Sodom wuṛṛu Gomora. Paddaringikke apa apan niwisara Mawu si'o, panutukke apa apan niaṛṛa'u Ruata si ite.

¹¹ Mawu nabbisara, “Su sunnanu i Ya'u maapulun al᷊awo'u sasamba apan sidutu ia'onggolli yamiu si Ya'u? Ya'u nualle manga domba sassambanu tattutunganna wuṛṛu tawan ana'u sapinu. Daṛṛan sapi esakka, domba wuṛṛu ambingnga i Ya'u maddirite.

¹² Isai nandolokki yamiu mangapiddu sasamba udde sutempo i yamiu rumanta mattaṛṛamawu si Ya'u? Isai nandolokki yamiu uawawal᷊elenganna su Wal᷊e'U na'ukkassa?

^13-14 Tawe gunane i yamiu mangapiddu sasambanu udde. Hal᷊urune maamuta si Ya'u. Ya'u maddantinna wuṛṛu tawe maataṛṛangnga ma'ellega si yamiu maddamean Bulanna Wakku, manga allon Sabat wuṛṛu manga allo wahewalla see lai manga pasasomban patataṛṛamawu. Sarangkanambone udde nil᷊al᷊eo manga rosanu wuṛṛu naola'a winabbawa-U; i Ya'u nallomete uapasanna.

¹⁵ Amungkangngu i yamiu mamatten limanu waugu umal᷊iomanna, i Ya'u maddiri maddaringikka. Tawe pandumme sangkurate anambone aal᷊iomannu, i Ya'u maddirite maddaringikka, ana waugu ringannu limanu udde i yamiu manambote namate.

¹⁶ Raddassa watangannu ma'oman sara mawaresi. Illol᷊oa'e anambon al᷊al᷊eo apan a'olaanni yamiu udde. Ore, ariete lai ma'ola'a al᷊al᷊eo,

¹⁷ pangurumpe ma'ola'a apapia. Pararisiṛṛa'e atatul᷊idda wuṛṛu illol᷊oa'e pangangallangnga; onggol᷊a'e su asisin timpal᷊ussa hakki mangitou samba'a ite hatton manga wawine wal᷊u.”

¹⁸ Mawu nabbisara, “Wette i ite manginsue hatto indi. Salaiwe i yamiu maṛṛamu ungu ana waugu manga rosanu, i yamiu sarun Ta'u raddasanna mabbal᷊i mawira waresi naal᷊ihidda sangarenna ara'e wungkassa. Salaiwe manga rosanu manambo wuṛṛu mawakkatta, i yamiu sarun Ta'u ampunganna atonna-tonna.

¹⁹ Amungkangngu i yamiu maapulu tumuṛṛutta si Ya'u, i yamiu sarun mamendamma al᷊awo'a apan mapia sussabbangnga wuassu wanuanu.

²⁰ Arawe amungkangngu i yamiu lullawangnga si Ya'u, i yamiu sarun mate sulal᷊ummu pangalo. I Ya'u, Mawu, buatte nabbisara.”

Soa mapontol᷊osanna

²¹ Soa apan dorone satia, orassa indi naalihidda ere sangkatou masandaga! Dorone anambon tumanangnge matul᷊idda wuṛṛu tawe awusune, arawe orassa indi niatana'ante manga taṛṛa pate.

²² Yerusalem, dorone i'o naal᷊ihidda sal᷊a'a, arawe orassa indi tate aregane lai. Dorone i'o naal᷊ihidda ua'e anggore apan matemangnga, arawe orassa indi tumba'u ua'e undussa ara'e wiasa.

²³ Manga piaṛṛangngu mammangalo wuṛṛu manga daroloṛṛannu manna'o; i mangitou apulune mannengkamma aonggolla wuṛṛu roitta sasogokka. I mangitou maddiri manamba'a asisin timpal᷊ussa su saruannu mallaṛṛuungnga; maddiri maddaringikka aalaen manga wawine wal᷊u.

²⁴ Ana waugu udde Mawu Apan Lembontaṛṛino, Ruatan Israel nabbisara: “Ei, manga se'e-Ku, i Ya'u sarun mabbal᷊issa si yamiu, ma'oman sara i yamiu tate mapaasusa-U apia.

²⁵ I Ya'u sarun mabbal᷊issa si yamiu. Naal᷊ihidda taumata apan mammaresi logamma, i yamiu sarun Ta'u waresianna; al᷊awo'a apan pia luhudde sarun Ta'u iramme wua dinganni yamiu.

²⁶ I yamiu lau sarun Ta'u onggol᷊annu manga mallaṛṛuungnga wuṛṛu manga manananantiro ere dorone. Ne Yerusalem sarun isaggo soa apan matul᷊idda wuṛṛu satia.”

²⁷ Mawu udde matul᷊idda, ne i Tou sarun manal᷊amatta Yerusalem wuṛṛu manga taumatane apan sinumassilla.

²⁸ Arawe manga taumata marosa apan lullawangnga Mawu sarun patean-Ne, wuṛṛu sarangkanambone apan nanantangngu Mawu sarun iapawinasa.

²⁹ I mangitou sarun masili ana waugu massubba manga aaluanna wuṛṛu naṛṛaen manga wailla ionggolla su manga monganna.

³⁰ I mangitou sarun maola'a ere aaluanna masallakka apan tinumolangnga rongngane, wuṛṛu ere wawail᷊anna apan tawe ua'ene.

³¹ Naal᷊ihidda laṛṛami natutungngu waṛṛan putungnga, aroddi lai manga taumata apan uataṛṛino sarun iapawinasa ana waugu inolanni mangitou sassane apan tumaniten dal᷊eo, wuṛṛu taweddu wotongnge mapaillol᷊on awawinasa udde.