YEREMIA 9 - WUKE SUSI WATTI'U AL᷊AL᷊USASSA

¹ Apiawe eteapa amungkangngu pua'u ere paṛṛihi apan napeneng kua'e, wuṛṛu mata'u ere sal᷊ossogga apan sidutu mangngelekka! Ne i ya'u wotongnge lumuai allo wuṛṛu ṛabbi, lullalu manga taumata sambalahangku apan nipaten ro'appa.

² Unnu wisara su wadda'u anne wotongnge ta'u asangkal᷊anna tampa pattindahoannu taumata apan sulal᷊ummu amatanna! Ne i ya'u sarun manantangngu walahangku, wuṛṛu tumal᷊angke poiaroddi tadea'u mangindau wuassi mangitou. I mangitou sarangkanambone mandal᷊al᷊eo, sambau ammul᷊annu taumata apan mal᷊awangnga,

³ wuṛṛu sidutu uasaddia mangngawusu. Su ahewallu wanua, apapia tawe uataṛṛino, ewe'e lai pallal᷊inga pia marasaine. Mawu nabbisara, “Uma-U ma'ola'a al᷊al᷊eo tawe tawe illol᷊one, i mangitou tawe manga'u si Ya'u ere Ruata mangitou.”

⁴ Su saruannu hawe, suapan taumata ṛinone paatehamma wuṛṛu tuṛṛangnga sidutu lai tawe apangimananna. Ana waugu, ere i Yakub aroddi lai i mangitou, sambau-sambau mammahia tuṛṛangnge. Suapan taumata u'amatta suapa-suapa tadea'u mannal᷊iawukku oddatta wuṛṛu awusu.

^5-6 Sarangkanambone mangke uawawahia taweddu mabbisara matul᷊idda. Moṛṛongnge ninumarampe mangngawusu, i mangitou tate lai maatantangngu rosane. Araṛṛagissa ringannu araṛṛagissa, wawahia ringannu pangangawusu sidutu a'olaanni mangitou, i mangitou mangke sidutu mannol᷊a'u Mawu.

⁷ Ana waugu udde Mawu Apan Lembontaṛṛino nabbisara, “Ere logamma, uma-U sarun Ta'u sal᷊u'atanna tadea'u i mangitou maola'a tutune. Apa apan wotongnge Ta'u olaanna su saruannu uma-U apan buatte na'ola'a al᷊al᷊eo?

⁸ Manga wisaran mangitou tumanite ma'asilaka, botongnge maapate ere anaanna mawisa. Manga wisara mangitou mangkete awusu. Manga wisara mangitou matemangnga maanemma, arawe wutte'e i mangitou mantaingngu sedda.

⁹ Tawe mariaddi su walahanna ereindi i Ya'u tawe mapaarantan ṛuumanna apan ṛinone? Sarun Ta'u wal᷊isanna inolaanni mangitou; i Ya'u, Mawu, buatte nabbisara!”

¹⁰ I ya'u, Yeremia, nabbisara, “I ya'u lumuaite wuṛṛu lumal᷊o ana waugu nannal᷊o su wadda'a wuṛṛu su manga wowone apan naṛṛangute wuṛṛu naṛṛaggassa see lai tate amatannu taumata. Tingikku winatangnga tate aringiṛṛanna lai, manu'u winalanganna wuṛṛu manga winatangnga waine tinumalangke wuṛṛu nawul᷊ite.”

¹¹ Mawu nabbisara, “Yerusalem Ta'u olaanna napapussa'a tampa pa'imbuniannu asun ahuranganna. Manga soan Yehuda sarun mabbal᷊i mal᷊annabba, tampa apan tate lai atanaanna.”

¹² I ya'u naiwal᷊o, “Mawu, anio wanua indi niwala maṛṛagassa wuṛṛu mamara ere wadda'u anne na'oman sara tateddu ummatta isudde? Apa piaddu lembon pande huna massunna sarangkanambone indi? Ete si sai I'o nangonggollu tal᷊aane tadea'u i tou wotongnge mamasingkatta su taumata waine?”

¹³ Mawu sinumimbakka, “Udde nariaddi ana waugu uma-U tate lai maddaringikka manga al᷊aṛṛa'a apan Ta'u nionggolla si mangitou. I mangitou tate tumuṛṛutta si Ya'u, wuṛṛu maddiri maddaringikka manga parenta-U.

¹⁴ I mangitou puane maattikka wuṛṛu massubba manga paal᷊uanni Baal ere buatte niaṛṛa'u al᷊amona mangitou.

¹⁵ Ana waugu udde, paddaringikke apa apan i Ya'u, Mawu Apan Lembontaṛṛino, Ruatan Israel, sarun ma'ola'a: uma-U sarun Ta'u onggol᷊annu sasuanna mapetta annananna wuṛṛu pasangkadda iapa'inumma.

¹⁶ I mangitou sarun Ta'u isal᷊iawukka suwallattu manga walahanna apan awagananni mangitou ara'e al᷊amona mangitou. I Ya'u sidutu sarun mandolokku tantara apan mammangalo si mangitou ma'oman sara i Ya'u mamate si mangitou abbi.”

Tumana'u Yerusalem sussal᷊ande ma'iontolla

¹⁷ Mawu Apan Lembontaṛṛino nabbisara su uman-Ne, “Pa'innunute apa apan tantal᷊anna nariaddi su wanua indi, wuṛṛu paal᷊ihakke waggoite manga lumal᷊uai. Doloṛṛa'e i mangitou rumanta wuṛṛu mangantarin aantarin lalal᷊o.”

¹⁸ Taumatan Yehuda mabbisara, “Doloṛṛa'e i mangitou mangngantarin aantarin lalal᷊o hunan kite sarangkanambone, tadea'u allon mata mangke lakkubbasanna su wambalan kite.”

¹⁹ Su Sion niaringikka tingikku lal᷊uai, “I ite matete wuṛṛu tumaniten niapaasili. Wanuan kite ṛinone itantangngi ite, manga wal᷊eng kite naṛṛusa'a pasital᷊eṛṛonga.”

²⁰ I ya'u nabbisara, “Paddaringikke manga wisara Mawu, ei wawine sarangkanambone! Su manga sinangiannu aṛṛa'en antarin lalal᷊o, su manga hawenu antarin asasusa.

²¹ Papate sinumuttate wuassu jandela, nasal᷊ate sulal᷊ummu wal᷊en araratuanna; i tou mannametta al᷊aṛṛana'a su lal᷊anna see ana'a umbasanna maṛṛuala su lapanganna.

²² Winal᷊unanna uatal᷊eṛṛonga suapan tampa ere sapadda ua'ombo su leta'a; ere gandumma apan buatte niitingnga ana see nitantangnga wuṛṛu tate lai iammulla. Eteudde tanata Mawu apan ṛinone ta'u iapasingkatta.”

²³ Mawu nabbisara, “Taumata pande imbaṛṛangnga lumuassa ana waugu apapandene, taumata matohassa ana waugu atatohanne, wuṛṛu taumata ala ana waugu pa'aalane.

²⁴ Isai mappulu lumuassu sambau saranapa, ṛinone lumuassa manungku i tou ma'aillal᷊a wuṛṛu maasunna si Ya'u; manungku i tou masingkatta i Ya'u marangngu saran mal᷊annu-l᷊annu wuṛṛu i Ya'u mannohassa tita see atatul᷊idda su runia. Sarangkanambone udde maal᷊uassa naung-Ku. I Ya'u, Mawu, apan namasingkattu udde.”

^25-26 Mawu nabbisara, “Sarun a'omanna tempone i Ya'u makkuumannu taumata Mesir, Yehuda, Edom, Amon, Moab wuṛṛu tumana'u wadda'u anne apan namol᷊o utangnge. I mangitou sarangkanambone sunatanna ere taumatan Israel, arawe mawae i mangitou ara'e walahannu israel maola'a ere manga taumata apan tawe nisunatta, ana waugu i mangitou tawe tumuṛṛutta su pa'aire apan niwal᷊on sunatta udde.”