Biblia Todo Logo
Bìoball air-loidhne

- Sanasan -

YEREMIA 7 - WUKE SUSI WATTI'U AL᷊AL᷊USASSA


I Yeremia nannase su Wal᷊en Mawu

1-3 I ya'u nirolokku Mawu inai watukku Wal᷊en-Ne wuṛṛu dirumarisikka su ngaran pasallanganna apan sassabbiannu taumatan Yehuda apan nirumanta mattaṛṛamawu. I tou nandolo'u iapapasingkattu tanata-Ne ini si mangitou, “Pamal᷊ute pallal᷊agunu wuṛṛu ola'u pabbiaṛṛannu, ne i Ya'u, Mawu Apan Lembontaṛṛino, Ruatan Israel sarun mamalan kamiu sidutu uatana'a isindi.

4 Arie pangimanna su mamamahia apan mabbisara, ‘I ite mal᷊angnganna, ana waugu indi Wal᷊en Mawu. Atonna indi Wal᷊en Mawu!’

5 Wal᷊ute ola'u pabbiaṛṛannu wuṛṛu pallal᷊agunu. Pa'ola'e atatul᷊idda sangkatou ringannu waine.

6 Ariete lai mangallangnga taumata raho, ana'a asisitimpal᷊ussa, wuṛṛu manga wawine wal᷊u. Arie mamate taumata apan tawe sal᷊ane su wanua indi. Imbaṛṛangnga massubba manga mawu waine, ana waugu olangnge sarun maapate si yamiu.

7 Amungkangngu i yamiu mamal᷊u ola'u pabbiaṛṛannu wuṛṛu pallal᷊agunu see lai tate ma'ola'a sarangkanambone udde, i Ya'u sarun mamalan kamiu sidutu uatana'a su wanua indi apan buatte Ta'u nionggolla maola'a leta'a pussa'a su al᷊amonanu.

8 Arawe, atonna tawe gunane i yamiu mangimanna su manga wisara awusu.

9 I yamiu manna'o, mammate, sussandaga, mattiala awusu, mangngongollu sasamba si Baal, wuṛṛu massubba manga monganna apan awagananni yamiu.

10 Napawe sarangkanambone udde buatte niola'i yamiu, i yamiu rumanta sumaruanna si Ya'u isindi su Wal᷊e-U sassane, wuṛṛu mabbisara, ‘I yami mal᷊angnganna!’ Wua'udde i yamiu manassute inolaannu apan dal᷊eo udde.

11 Apa i yamiu massunna Wal᷊e-U indi sal᷊akku mallaṛṛampassa?Anambon inolaannu buatte niasiloang-Ku.

12 Roote watukku Silo, soa apan paarorone nabbal᷊i tampan patataṛṛamawaunna si Ya'u. Pa'ellege apa apan buatte Ta'u niola'a su tampa udde ana waugu rosan uma-U Israel.

13 Salaiwe ete masokka i Ya'u mabbisara si yamiu, i yamiu maddiri maddaringikka. I yamiu ma'ola'a al᷊awo'u rosa udde, wuṛṛu maddiri sumimbakka napawe i Ya'u mamaggo.

14 Ne, Wal᷊e-U apan pangngantinanni yamiu, wuṛṛu tampa apan Ta'u nionggolla su al᷊amonanu wuṛṛu si yamiu indi sarun Ta'u olaanna lai ere su Silo dorone.

15 I yamiu sarun Ta'u limbuaṛṛanna wuassu saruang-Ku ere lai Ya'u buatte nallimbuakka manga amonannu, umattu Israel.”


Umattu Israel maatikka puane

16 Mawu nabbisara, “i Yeremia, ariete pangal᷊iomannu manga taumata indi. Ariete paddoronga tulumanna ara'e umal᷊iomanni mangitou; arie i Ya'u iwata'a, ana waugu i Ya'u maddiri maddaringikka darorongngu udde.

17 I'o buatte naasilo sassane apa apan a'olaanni mangitou su manga soan Yehuda wuṛṛu su manga lal᷊anna su Yerusalem!

18 Manga al᷊aṛṛana'a mangngammullu alung kanna, ingana'a esakka makkunuttu putungnga, wuṛṛu ingana'a wawine mangngompengngu taponna olaanna kukisse ionggolla su monganna apan isassaggo mangitou Ratun Surga. Wuṛṛu tadea'u ipandal᷊eo naung-Ku, i mangitou lai nangonggollu anggore su manga mawu waine.

19 Arawe mangke atonna, wal᷊inewe i Ya'u apan raddal᷊eoanni mangitou, ewe'e watanganni mangitou sassane na'oman sara i mangitou nasili.

20 I Ya'u, Mawu Apan Atanggaṛṛanne, sarun mangema'u asasa'u-U apan bahewalla su wal᷊en patataṛṛamawuanna indi, su taumata wuṛṛu su winatangnga, see lai su manga aaluanna wuṛṛu hessin bawail᷊anna. Asasa'u-U sarun ṛumenggamma ere putungnga apan tawe iapaddumma.”

21 Mawu nabbisara, “Ei uma-U, i yamiu masingkatta manungku apan itattambunni yamiu su wowo mezbah ṛinone itambunna ma'oman sara masue, wuṛṛu sasamba waine wotongnge anananni yamiu. Arawe i Ya'u, Mawu mabbisara, sal᷊amatte umanna sarangkanambone!

22 Sutempo i Ya'u nangapiddu al᷊amonanu sinumabbangnga wuassu Mesir, i Ya'u tawe nangonggolla si mangitou atoranna su ola'u sasamba itattambunna ara'e manga sasamba waine.

23 I Ya'u tumba'u namarenta si mangitou tadea'u tuttuṛṛutta si Ya'u tadea'u i Ya'u maola'a Ruata mangitou, wuṛṛu i mangitou maola'a uma-U. I Ya'u nandolokki mangitou mabbisakka tumuṛṛuttu manga parenta-U tadea'u i mangitou su lal᷊ummanna'a.

24 Arawe i mangitou maddiri maddaringikka wuṛṛu maddiri massunna. Ewe'e lai i mangitou tuttuṛṛutta apulu naungngi mangitou sassane apan maattikka wuṛṛu lal᷊eo udde. I mangitou wal᷊inewe nabbal᷊i mapia ewe'e nabbal᷊i lembon maddal᷊eoanna.

25 Ro'en al᷊amonanu sinumabbangnga wuassu Mesir naddatingngu allo indi Ya'u sidutu mandolokku manga allang-Ku, manga nabi, ringanni yamiu.

26 Arawe taweddu maddaringikka ara'e massunna. I yamiu ewe'e lai nabbal᷊i lembon aattikke wuṛṛu lal᷊eo wuassu iupungngu al᷊amonanu.”

27 Wua'udde Mawu nabbisara, “Ana waugu udde, ei Yeremia, salaiwe i'o mamasingkattu sarangkanambone udde su walahang-Ku, i mangitou maddiri massunna manga wisaranu. Salaiwe i'o mamaggo si mangitou, i mangitou tawe sumimbakka.

28 Nariaddi, wal᷊oa'e si mangitou manungku i mangitou uddewe sambau walahanna apan maddiri tumuṛṛutta si Ya'u, Mawu, Ruata mangitou. I mangitou maddiri manutukka wuassu ṛuumanna apan buatte niapendamanne. Tatuṛṛutta si Ya'u nawul᷊ite, ewe'e tate iwatti'a lai.”


Inolaanna lal᷊eo su Wawal᷊annu Hinom

29 Mawu nabbisara, “Ei tumana'u Yerusalem, lallal᷊ote! Pol᷊ote utangngu wuṛṛu rammea'e! Pangantariten aantarin asasusa roso su manga puiddu panenteanna ana waugu i Ya'u Mawu, tantal᷊anna massa'u wuṛṛu nano'eten kami nambo.

30 Taumatan Yehuda buatte na'ola'a al᷊al᷊eo. Manga paal᷊uanni mangitou apan ipaddanting-Ku udde buatte niaddon mangitou sulal᷊ummu Wal᷊e-U, na'oman sara nal᷊al᷊eote wal᷊en udde.

31 Sambau mezbah aranne Tofet buatte niaparisikki mangitou su Wawal᷊annu Hinom tadea'u pangonggol᷊annu al᷊aṛṛana'i mangitou maola'a sasamba itattambunna. Sumbal᷊i Ya'u taambe saran paassa nandolokki mangitou ma'ola'a olangnge udde, ewe'e lai taambe saran paassa olangnge ereudde sinumabbangnga wuassu ṛingirang-Ku.

32 Ana waugu udde, sarun a'omanna tempane tampa udde tate lai isaggo Tofet ara'e Wawal᷊annu Hinom ewe'e Wawal᷊annu Pamamototanna. Leta'a udde sarun maola'a leta'a pallabbinganna ana waugu tate tampa apan baine.

33 Manga winal᷊unanni mangitou sarun maola'a inassu manu'u winalanganna wuṛṛu winatangnga mal᷊aṛṛaga, ringannu taweddu mallimbuakka.

34 Wanua indi sarun maola'a wadda'a lol᷊okka. Tingikku al᷊aluassa wuṛṛu tingikku andeangngu awingnga sarun Ta'u iaddo su manga soan Yehuda wuṛṛu su manga lal᷊annu Yerusalem.

Lean sinn:



Sanasan