YEREMIA 6 - WUKE SUSI WATTI'U AL᷊AL᷊USASSA

Yerusalem nitalliwunannu seetta

¹ Roote tal᷊angnga, ei manga taumatan Benyamin! Tantanga'e Yerusalem! Paniuppe trompetta su Tekoa, wuṛṛu paṛṛenggama'e putungnga isaratta su Bet-Kerem! Asasilaka wuṛṛu pangalo wahewalla rumanta wuassu sawannakka.

² Soan Sion maṛṛansangnga atonna, arawe Mawu sarun makkimunsa'a udde;

³ manga tembonanne sarun maddasanna poiaroddi ringannu tantarane. Uapal᷊iwutta soa udde i mangitou sarun mamasi'u manga tenda mangitou, sambau-sambau su tampa apan ipaapulune.

⁴ I mangitou sarun mabbisara, “Wette, pandiahite inai mamangalo Yerusalem! Wette i ite mamangalote allo indi!” Arawe wua'udde i mangitou nabbisara apia, “Uare, nal᷊iwuete! Allo maranite marandumma, manga lintau mannattakke mallo'engnga.

⁵ Mappianne i ite mamangalote sutempo ṛabbi, wuṛṛu makkimunsa'a manga tanda batu su soa udde.”

⁶ Mawu Apan Lembontaṛṛino buatte namarenta manga tembonanne tadea'u manuwangnga manga aaluanna wuṛṛu ipasi'a su manga wuidda pattillindumanna malliwunna Yerusalem. Mawu nabbisara, “Soa indi sarun Ta'u iṛṛuumanna ana waugu sulal᷊umme buatte niola'a manambo pangangallangnga.

⁷ Su ereapa al᷊imatan kua'e mappasabbangngu ua'e mapia, aroddi lai soa udde sidutu mappasabbangngu al᷊al᷊eo. Tumba'u watti'u araṛṛagissa wuṛṛu pallaṛṛampassa apan Ta'u niaringiṛṛanna waussu soa udde; lessa wuṛṛu radda'a Ta'u niasiloanna su al᷊awo'u tampa.

⁸ Ei tumana'u Yerusalem, ṛinone anambon hal᷊ahe udde maola'a pananaungannu! Arie ma'oman sara i Ya'u manantangngi yamiu wuṛṛu Ta'u wal᷊uanna soanu mabbal᷊i wadda'u anne apan tawe wanuannu taumata.”

Umattu Israel apulune lumawangnga

⁹ Mawu Apan Lembontaṛṛino nabbisara si ya'u, “Israel sarun lungguṛṛanna ma'oman sara mal᷊eno ere waillu anggore apan wuane buatte niti'o abbi. Ana waugu tantal᷊anna ta'e pia tempo, pasal᷊amata'e lambene.”

¹⁰ I ya'u sinumimbakka, “Mawu, ete sisai i ya'u ṛinone maggahatto, wuṛṛu isai apan ṛinone ta'u iapanaungnga? I mangitou puane maattikka wuṛṛu maddiri maddaringikka. I mangitou mallage'u wuṛṛu maddantinnu tanata-Nu apan ta'u niwal᷊o si mangitou.

¹¹ Asasa'u-Nu si mangitou lai lukkenggamma sulal᷊ummu waddangku, Mawu! Tawe iaṛṛaddanna.” Wua'udde Mawu nabbisara, “Sopa'e asasa'unu udde su al᷊aṛṛana'a su manga lal᷊anna wahewalla wuṛṛu su manga taumata umbasanna maṛṛuala apan tantal᷊anna uaammulla. Esakka wuṛṛu wawine sarun sametanna, wuṛṛu ingana'a timmadde lai tawe mal᷊iudda.

¹² Wal᷊e mangitou sarun ionggolla su taumata waine, aroddi lai manga wailla wuṛṛu inangngu ana'i mangitou. Tumana'u wanua indi sarun iṛṛuumanna.

¹³ I mangitou sarangkanambone, timmadde dario'a, maddea'a auntunganna ringannu lal᷊anna apan tawe suṛṛinone. Ewe'e lai nabi wuṛṛu imam mammahia taumata.

¹⁴ Manga lessan uma-U antimanni mangitou tumba'u lessa addio'a. ‘Ah, tawe apane,’ unni mangitou, ‘sarangkanambone mapia wuṛṛu mal᷊angnganna.’ Sumbal᷊i tawe aroddi.

¹⁵ Ṛinone i mangitou masili ana waugu buatte na'ola'a sarangkanambone apan dal᷊eo udde. Arawe i mangitou wambala maappalla wuṛṛu wagga masili. Ana waugu udde i mangitou sarun manawo ere taumata waine, nuddusse watti'u pabbiaṛṛanni mangitou napawe i Ya'u makkuumanni mangitou. I Ya'u, Mawu, buatte nabbisara.”

Israel nanol᷊a'u piaṛṛa'u Mawu

¹⁶ Mawu nabbisara uman-Ne, “Darisikke su pappengannu lal᷊anna, wuṛṛu panutudde paapia-pia! Pa'iwal᷊ote manga lal᷊annu al᷊amona, wuṛṛu suapa apan apianne suwallanne. Amatte su lal᷊anna udde, tadea'u i yamiu mabbiakka matammudda.” Arawe i mangitou nabbisara, “Tawe, i yami maddiri umamatta su lal᷊anna udde!”

¹⁷ Ana see Mawu masokka-sokka mamile manga mandariagga huna mappanaungngi mangitou tadea'u maddaringikka tingikku tatiala trompetta. Arawe umatta nabbisara, “I yami maddiri maddaringikka.”

¹⁸ Ana waugu Mawu nabbisara, “Paddaringikka, ei manga walahanna! I yamiu ṛinone masingkattu apa apan sarun mariaddi su uma-U.

¹⁹ Panutukke, ei runia! Uma-U maddiri manengkamma al᷊aṛṛa-U wuṛṛu maddiri tumuṛṛutta si Ya'u. Maola'a pangillul᷊eannu hol᷊agi mangitou i Ya'u nandantan asasilaka si mangitou.

²⁰ Ipa'ura amania apan iapiddi mangitou si Ya'u wuassu Syeba, ara'e manga rampa-rampa wuassu wanua marau? Tawe maola'a i Ya'u manengkamma sasamba mangitou. I Ya'u maddiri manga sasamba itattambunna wuassi mangitou.

²¹ I ya'u sarun ma'ola'a manga taumata indi itara wuṛṛu mawal᷊atta. Iamangnge wuṛṛu ana'a, hawe wuṛṛu al᷊indonganna sarangkanambone sarun mawinasa.”

Pangalo wuassu sawannakka

²² Mawu nabbisara, “Sambau araratuanna apan matohassa tantal᷊anna u'amatta wuassu wanua apan marau su sawannakka. I mangitou rumanta mapapangalo.

²³ Ahiddi mangitou ana'anna wuṛṛu sambeangnga; i mangitou maṛṛagissa wuṛṛu wagga mangonggollu ampungnga. Ere tingikku tahal᷊oangnga apan mattandi'a etearoddi tingikku lal᷊empangngu awal᷊o mangitou apan tantal᷊anna iappatal᷊angnga inai mamangalo Yerusalem.”

²⁴ Naaringikka watti'a udde, tumana'u Yerusalem nabbal᷊i nallome. I mangitou naapendamma atata'utta, wuṛṛu uatataṛṛangnga ere wawine apan mangunsiwete.

²⁵ I mangitou tawe waṛṛani lumintukka watukku lal᷊anna ara'e inai su wailla, ana waugu suapan tampa seetta apan pia ahidde sidutu mammate.

²⁶ Mawu nabbisara su uman-Ne, “palluṛṛete laubba karongnga wuṛṛu tattal᷊inggite su awu. Lallal᷊ote wuṛṛu lalluaite ringannu massusa ere taumata apan lulluai niapateannu anangnge man sambau, ana waugu mamamate sarun mamangalo si yamiu ringannu mamaṛṛoro.”

²⁷ Ana see Mawu nabbisara si Yeremia, “Sal᷊u'ate uma-U, ere lai i'o manguji logamma. Saṛṛasire pallal᷊agu mangitou!

²⁸ I mangitou sarangkanambone lumal᷊awangnga apan maatikka puane, ere aattikku witu'a wuṛṛu atta'a. I mangitou ala'uanne mawukku'a wuṛṛu u'amatta suapan tampa mannal᷊iawukku watti'a apan mandal᷊eo taumata waine.

²⁹ Auntapanna mal᷊osote, arawe tain logamma tawe lai tumuro wuṛṛu mawul᷊i. Tawe gunane uma-U sidutu sassal᷊u'atanna tadea'u mawaresi, ana waugu manga taumatane apan dal᷊eo tawe niapasal᷊iu.

³⁰ I mangitou sarun isaggo sal᷊a'a niramme, ana waugu i Ya'u, Mawu, buatte nandamme mangitou.”