YEREMIA 52 - WUKE SUSI WATTI'U AL᷊AL᷊USASSA

Yerusalem nanawo

¹ I Zedekia uukke ruan pul᷊oassa su tonnane sutempo i tou naola'a ratun Yehuda. I tou uaparenta Yerusalem mapul᷊oassa su tonnane al᷊annune. Inangnge aranne i Hamutal, ana'i Yeremia wuassu soan Libna.

² Ere lai i Ratu Yoyakim, i Ratu Zedekia lai narosa su Mawu.

³ Mawu mangke nasa'u su tumana'u Yerusalem wuṛṛu taumatan Yehuda na'oman sara i Tou nallimbuakka si mangitou wuṛṛu tate mandiaga si mangitou lai. I Zedekia nilumawangnga si Nebukadnezar ratun Babel,

⁴ ana waugu udde i Nebukadnezar ringannu anambon buntuannu pangalone nirumanta wuṛṛu namangalo Yerusalem su allo appul᷊one wul᷊anna appul᷊one sulal᷊ummu tonna assione sutempo i Zedekia uaparenta. I mangitou napararisikku atanaanni mangitou su liuddu soa, na'ola'a darandungngu pamangaloanna

⁵ wuṛṛu sidutu malliwunna soa udde na'oman sara tonna mapul᷊oassa sutempo i Zedekia uaparenta.

⁶ Su allo assione wul᷊anna aiappanne tonna udde lai, sutempo al᷊aṛṛutumma tumaniten masaddatta na'oman sara tumanangnge tate lai anna saran addio'a,

⁷ darandungngu soa nihohakku seetta. Ṛabbi udde, salaiwe taumatan Babel tantal᷊anna malliwunna soa udde, anambon tantaran Yehuha tinumal᷊angngu watanganne mattuddan Bawal᷊annu Yordan. I mangitou niumamattu lal᷊anna sumabbi waillu araratuanna, wua'udde sinumabbangnga wuassu ngara pasallanganna apan uasampa'u darandungnga darua su tampa udde.

⁸ Arawe tantaran Babel nangenggenna si Ratu Zedekia, wuṛṛu nanametta su ratakku Yerikho. Anambon tantarane nanantangngi tou.

⁹ Wua'udde i Ratu Zedekia niapidda ringanni Ratu Nebukadnezar su soan Ribla su wageangngu Hamat, wua'udde niponessu ṛuumanna pateanna.

¹⁰ Su soa udde lai al᷊aṛṛanange nipate su saruannu matane, wuṛṛu anambon mangangumbelen pamamarenta su Yehuda lai nipate.

¹¹ Wua'udde i Zedekia matane nilasso'a, ana see niṛṛapussa wuṛṛu niapidda watukku Babel. Poiaroddi i tou nitaṛṛo sulal᷊ummu tuttupanna, wuṛṛu tate naasabbangnga wua isudde na'oman sara i tou nate.

Wal᷊en Mawu nihohakka

¹² Su allo appul᷊one wul᷊anna al᷊imane sulal᷊ummu tonna mapul᷊o si'o i Nebukadnezar ratun Babel uaparenta, nirumantate su Yerusalem sangkatou aranne i Nebuzaradan. I tou udde mananantiro wuṛṛu tembonannu mandariaga Nebukadnezar.

¹³ I Nebuzaradan nanoṛṛobba Wal᷊e Mawu, wal᷊en araratuannu ratu, wuṛṛu anambon bal᷊en taumata mapiane su soan Yerusalem.

¹⁴ Ana see anambon mallal᷊aṛṛenggenne naṛṛa'a manga darandungngu soa udde.

¹⁵ Wua'udde tumanangnge apan ta'e sulal᷊ummu soa, eteudde manga mammamanara apandeanne apan nallambe, manga taumata asiangnga, wuṛṛu manga taumata apan buatte tinumal᷊angnga ringannu taumatan Babel, sarangkanambone niṛṛootti Nebukadnezar watukku Babel.

¹⁶ Arawe sangkawageanganna wuassu tumana'u soa apan aasianganne wuṛṛu tawe darotongnge, nitantangnga su Yehuda, wuṛṛu nirolokke niapamanara waillu anggore wuṛṛu wawail᷊anna waine.

¹⁷ Manga diṛṛi witu'a wuṛṛu manga kereta su Wal᷊en Mawu sara wensadda witu'a nipesangngu taumata Babel, see al᷊awo'u witu'a niṛṛootta su wanua mangitou.

¹⁸ I mangitou lai naṛṛootta manga saranapa indi: manga sasondo, tampan awu mezbah, manga saranapan sol᷊o, mangko ipannal᷊uga daṛṛan binatangnga apan lakkatanna olaanna sasamba, manga mangko pannutunganna amania, wuṛṛu al᷊awo'u saranapa witu'a waine apan ipappaatta su lal᷊aghun patataṛṛamawu.

¹⁹ Manga saranapa wul᷊awanna wuṛṛu sal᷊a'a, nasutta manga mangko maraddio'a wuṛṛu tampan baṛṛa, manga tampan daṛṛan binatangnga apan lakkatanna olaanna sasamba, tampan awu, leddan sol᷊o, manga mangko tampan amania, wuṛṛu manga mangko pallal᷊inannu sasamba ua'en anggore, sarangkanambone nianu Nebuzaradan sassane.

²⁰ Manga saranapa witu'a apan niola'i Ratu Salomo hunan Bal᷊e Mawu, eteudde diṛṛi darua, manga kereta, wensadda wuṛṛu mapul᷊o dua sapi apan uatumpilla wensadda udde, sarangkanambone aroddi awakkanne, na'oman sara tate iatimbanga.

^21-22 Darua diṛṛi witu'a udde uasul᷊ungnga: sambau-sambau atanggakke 8 metere, limbulunne 5,3 metere, wuṛṛu lal᷊umme hahabba. Aappallu witunge 75 milimetere. Su puiddu suapan diṛṛi udde pia puan diṛṛi atanggakke 2,2 metere. Uapal᷊iwutta manga puan diṛṛi udde pia lal᷊ogakku wuan delima apan nianamma, sarangkanambone wuassu witu'a lai.

²³ Wuan delima apan nianamma suapan puan diṛṛi udde maṛṛasutta, arawe tumba'u sion pul᷊o annumma apan aasiloanna wua bowa.

Taumatan Yehuda niṛṛootta watukku Babel

²⁴ Waine wua'udde, Nebuzaradan nanametta si Imam Bahewa Seraya, i Zefanya tepellene, siri tallu mandariaga ngara Wal᷊e Mawu,

²⁵ siri pitu mananantiron datu apan ta'e uatana'a su soa, panglima, tepellu panglima apan mammanara administrasin tantara, wuṛṛu siri annummu pul᷊o tembonanne waine.

²⁶ Anambon taumata udde niapidde ringanni Ratu Nebukadnezar su soa Ribla,

²⁷ su wageangngu Hamat. Poiaroddi i mangitou sassansaranna wua'udde nipate. Etearoddi manga taumatan Yehuda niṛṛootta wuassu wanua mangitou wuṛṛu niapidda su pamuanganna;

^28-30 sarangkanambone 4.600 wu atoune. I Nebukadnezar naṛṛootta si mangitou ual᷊al᷊ol᷊ossa ereindi: 3.023 su atoune su tonna appitune i tou uaparenta, 832 su atoune wuassu Yerusalem su tonna mapul᷊o ual᷊o i tou uaparenta, wuṛṛu 745 su atoune niṛṛootti Nebuzaradan su tonna ruan pul᷊o tallu pamamarentan Nebukadnezar.

³¹ Su allo aruan pul᷊o limane wul᷊anna mapul᷊o dua tonna atallum pul᷊o pitu napawe i Yoyakhin buatte niapidda su pamuanganna, i Ewil-Merodakh naola'a ratun Babel. Su tonna udde lai i tou napal᷊iatta'u darangngune si Yoyakhin, wuṛṛu napasabbangngi tou wuassu tuttupanna,

³² see niolangnge ringannu mapia. I Yoyakhin nionggol᷊annu manara apan mattanggaṛṛanne wuassu manga ratu waine apan niwuanga lai su Babel.

^33-34 I tou niwala mangganti laubbu tuttupanne wuṛṛu su al᷊o'engngu pabbiaṛṛanne i tou wotongnge u'anna su wal᷊en araratuanna, wuṛṛu allo-allo a'onggol᷊annu roitta ipaddea'a hausannu wiakke.