YEREMIA 45 - WUKE SUSI WATTI'U AL᷊AL᷊USASSA

Paairen Duata si Barukh

¹ Su tonna aiappanne i Yoyakim ana'i Yosia uaparenta Yehuda, i Barukh namoṛṛettu apa apan ta'u niampona si tou. Wua'udde i ya'u namasingkatta si tou

² wisara Mawu, Ruatan Israel. Mawu nabbisara, “Barukh,

³ i'o sussal᷊iomanna arendi, ‘Ah, soewe eteapa i ya'u indi! Asasusa'u tumanite manambo, wuṛṛu Mawu nanamba apia ringannu asasansara. I ya'u nal᷊otakke sussal᷊iomanna, tawe atatamudda sarang kadio'a!’

⁴ Ei Barukh! I Ya'u, Mawu, tantal᷊anna mapaṛṛa'an saranapa apan i Ya'u niaparisikka, wuṛṛu tantal᷊anna mangngabutta sasuanna apan Ta'u nisuanna. Ahewallu runia Ta'u olaanna aroddi abbi.

⁵ Anio i'o mappulu olaanna apianne? Arie aroddi, Barukh! Anambon taumata Ta'u niṛṛuumanna ringannu asasilaka, arawe su olangngu mattingkaddio'a i'o sarun masal᷊amatta. Su anambon tampa i'o inai, i'o sidutu wiakka. I Ya'u, Mawu buatte nabbisara.”