YEREMIA 44 - WUKE SUSI WATTI'U AL᷊AL᷊USASSA

Tanata Mawu su taumata Israel apan uatana'a su Mesir

¹ Mawu nabbisara si ya'u su ola'u anambon taumatan Israel apan uatana'a su Mesir, eteudde su soa Migdol, Tahpanhes, Memfis, wuṛṛu su wageangngu timukka.

² Eteindi tanata Mawu Apan Lembontaṛṛino, Ruatan Israel, si mangitou, “I yamiu sassane buatte naasilo asasilaka apan Ta'u niṛṛia'a su Yerusalem wuṛṛu su anambon soa waine su Yehuda. Na'oman sara orassa indi lai manga soa udde ta'e naṛṛimunsa'a tawe tumatanangnge.

³ Olangnge udde nariaddi ana waugu tumanangnge marosa, na'oman sara i Ya'u nasa'u. I mangitou mangngonggollu sasamba wuṛṛu mattaṛṛamawu su manga monganna apan taambe saran paassa sassubbanni mangitou sassane, i yamiu ara'e al᷊amonanu.

⁴ I Ya'u ṛinone sidutu mandolokka ringanni yamiu manga allang-Ku manga nabi, apan manningaddi mangitou ma'ola'a al᷊al᷊eo apan iaaranting-Ku udde.

⁵ Arawe i yamiu maddiri maddaringikka wuṛṛu maddiri massunna. I yamiu maddiri mangillol᷊o ma'ola'a al᷊al᷊eo, eteudde mangngonggollu sasamba su manga monganna.

⁶ Ana waugu udde i Ya'u napasabbangngu asasa'u-U wuṛṛu al᷊al᷊eo naung-Ku su manga soan Yehuda wuṛṛu manga lal᷊anna su Yerusalem. Sarangkanambone Ta'u nisoṛṛobba na'oman sara nabbal᷊i ete manga tuidda wuṛṛu nal᷊ol᷊okka ere lai aellehanna orassa indi.

⁷ Wuṛṛu orassa indi Ya'u, Mawu Apan Lembontaṛṛino, Ruatan Israel, maiwal᷊o anio i yamiu ma'ola'a inolaanna apan maarantan asasilaka apan bahewalla su watangannu. Apa i yamiu mappulu mamate anambon taumata – esakka, wawine, al᷊aṛṛana'a, wuṛṛu ana'a ta'e addio'a – ma'oman tawe saran sangkatou wuassu walahannu apan mallambe?

⁸ Anio i yamiu ma'ola'a manga inolaanna apan maasa'u si Ya'u? I yamiu nirumanta wuṛṛu natana'a su Mesir, wanua apan awaganannu udde, wua'udde i yamiu nassubbate pa'al᷊uanna wuṛṛu nangonggollu sasamba su manga mongannu wanua udde! Apa i yamiu mappulu makkimunsa'a watangannu sassane tadea'u i yamiu heloannu anambon balahanna su runia wuṛṛu arannu ipaatta ipammontoga?

⁹ I yamiu naabul᷊iten anambon al᷊al᷊eo su leta'u Yehuda wuṛṛu su manga lal᷊annu soan Yerusalem apan buatte niola'u al᷊amonanu, manga ratun Yehuda wuṛṛu manga awingnge, see i yamiu wuṛṛu manga awingngi yamiu?

¹⁰ Arawe naddatingngu allo indi i yamiu tawe sumallungngu watangannu. I yamiu tawe mangaddatta si Ya'u wuṛṛu tawe mabbiakka tumuṛṛuttu tita apan Ta'u nionggolla si yamiu wuṛṛu su al᷊amonanu.

¹¹ Ana waugu udde, i Ya'u, Mawu Apan Lembontaṛṛino, Ruatan Israel, sarun mando'appa si yamiu wuṛṛu makkimunsa'a ahewallu Yehuda.

¹² Wuṛṛu amungkangngu wuassu taumatan Yehuda apan nallambe piaddu mappulu inai watukku Mesir wuṛṛu matana'a poiaroddi, i mangitou sarun mate abbi. I mangitou sarangkanambone, wahewalla addio'a, sarun nate su Mesir sulal᷊ummu pangalo ara'e ana waugu ṛutumma. Taumata sarun maapendamma atata'utta maasilo si mangitou wuṛṛu sarun mallobbossa si mangitou. Aranni mangitou sarun ipaatta maola'a wawontoga.

¹³ Ere lai Ya'u nakkuumannu Yerusalem, aroddi lai sarun Ta'u iṛṛuumanna i mangitou apan uatana'a su Mesir. I mangitou sarun nate sulal᷊ummu pangalo, ana waugu ṛutumma ara'e al᷊aṛṛusa'itta.

¹⁴ Wuassu taumatan Yehuda apan nallambe, apan inaite su Mesir matana'a poiaroddi, tawe saran sangkatou apan mal᷊iu ara'e mabbiakka. Tawe saran sangkatou wuassi mangitou sarun maawelengnga watukku Yehuda, salaiwe olangnge udde tumaniten ipaapulu mangitou. Atonna, taweddu maawelengnga tabbene'e manga pirang katou tumatal᷊angnga.”

¹⁵ Wua'udde nirumantate manambo atonna taumata ringangku, eteudde anambon esakka apan masingkatta manungku awingnge mangngonggollu sasamba su monganna, wuṛṛu anambon bawine apan tantal᷊anna uarisikka isudde, nasutta taumatan Israel apan uatana'a su Patros, samba'an timukku Mesir. I mangitou nabbisara si ya'u,

¹⁶ “I yami maddiri maddaringikka apa apan iwabbisaranu si yami ringannu arannu Mawu.

¹⁷ Al᷊awo'a apan buatte pina'ireng kami, sarun olaanni yami lai. I yami sidutu sarun mangngonggollu sasamba su Ratun Surga, wuṛṛu mallal᷊innu anggore maola'a sasamba si tou ere inanaramanne apan ilallagu su manga soan Yehuda wuṛṛu su manga lal᷊annu Yerusalem apan a'olaannu al᷊amonan kami, manga ratu wuṛṛu manga tembonannu araratuanni yami see lai i yami sassane. Sutempo udde i yami uatahuanna manambo anna, i yami su lal᷊umanna'a, wuṛṛu tawe asasusa apa-apa.

¹⁸ Arawe ro'en i yami naddote mangonggollu sasamba su Ratun Surga, wuṛṛu tate lai mallal᷊innu anggore maola'a sasamba si tou, i yami niapauasannu al᷊awo'a; manga taumatang kami nate sulal᷊ummu pangalo ara'e ana waugu ṛutumma.”

¹⁹ Wua'udde manga wawine udde nabbisara, “Awingngi yami mappulu manungku i yami ma'ola'a roti saṛṛene ere Ratun Surga wuṛṛu manutungnga sasamba see mangonggollu anggore su monganni yami udde.”

²⁰ Su anambon esakka wuṛṛu wawine apan sinumimbakka aroddi, i ya'u mabbisara,

²¹ “Apa i yamiu massunna Mawu wagga ara'e naabul᷊ite manga sasamba apan nionggolla su manga soan Yehuda wuṛṛu su manga lal᷊annu Yerusalem ṛatangannu al᷊amonanu, ṛatangannu manga ratu wuṛṛu manga tembonannu, see tumana'u wanua indi wuṛṛu i yamiu sassane?

^22-23 Mawu tate maataṛṛangnga lai ma'ellega si yamiu mangngonggollu sasamba su manga mawu waine. Pallal᷊agunu udde lal᷊eo maarantinna. I yamiu narosa su lantakku hati Mawu wuṛṛu tawe tumuṛṛutta manga parenta-Ne. Ana waugu udde orassa indi lai wanuanu naṛṛimunsa'e na'oman sara tate atanaanna apia, wuṛṛu aranne iapaatta maola'a wawontoga. Taumata apan naasilo naapendamma atata'utta.”

^24-25 Wua'udde i ya'u namasingkata su anambon taumata udde, nangillembo singana'a wawine, manungku Mawu Apan Lembontaṛṛino nabbisara arendi su manga taumatan Yehuda apan uatana'a su Mesir, “I yamiu wuṛṛu manga awingngu buatte nassalu su Ratun Surga manungku i yamiu sarun manambunnu sasamba wuṛṛu mangonggollu ua'e anggore si tou. Paairenu udde buatte nisuungngi yamiu. Nariaddi, aroddite! Ola'e apa apan pina'irenu udde!

²⁶ Arawe orassa indi paddaringikke apa apan Ta'u iwisara si yamiu, ei taumatan Israel su Mesir: i Ya'u, Mawu, massalu ringannu arang-Ku apan mawantuga manungku i yamiu tate lai Ta'u iwala mappaattu arang-Ku ipakiinnu sambau paaire. I yamiu tawe wotongnge mabbisara, ‘I Ya'u massalu ringannu arannu Ruata apan biakka!’

²⁷ I Ya'u sarun maddea'a lal᷊anne tadea'u i yamiu masilaka wuṛṛu tawe su lal᷊umanna'a, ma'oman sara i yamiu mate abbi, mawae sulal᷊ummu pangalo aroddi lai ana waugu al᷊aṛṛusa'itta.

²⁸ Tumaba'u manga pira taumata apan sarun masal᷊amatta wuṛṛu mabbelengnga su Yehuda wuassu Mesir. Ne anambon taumatan Yehuda apan su Mesir sarun maasilo tanne wisara mangitou ara'e wisara-U apan matualaga.

²⁹ I Ya'u sarun mandantan asasilaka si yamiu su tampa indi tadea'u ipaniala si yamiu manungku ṛuumanna apan Ta'u nihol᷊aga atonna-tonna mariaddi.

³⁰ Hofra ratun Mesir sarun Ta'u itanttilla su manga seetta apan mappulu mamate si tou, ere lai Ya'u nanantilli Zedekia ratun Yehuda si Nebukadnezar ratun Babel, seenne apan mappandumma mamate si tou.”