YEREMIA 43 - WUKE SUSI WATTI'U AL᷊AL᷊USASSA

I Yeremia niapidda watukku Mesir

¹ Tanata Mawu, Ruatan Israel, apan ṛinone ta'u iapasingkatta su tumana'u wanua buatte ta'u niapasingkatta sarangkanambone.

² Ana see i Azarya ana'i Hosaya wuṛṛu Yohanan ana'i Kareah see anambon taumata waine apan mawunga udde nabbisara si ya'u, “I'o mangngawusu. Mawu Ruatang kami tawe nandolokku maningaddi yami inai matana'a su Mesir.

³ I Barukh ana'i Neria uddewe apan nandolokku lumawangnga si yami, tadea'u taumatan Babel mamarenta si yami wuṛṛu wotongnge mamarenta si yami wuṛṛu wotongnge mamate ara'e mangapiddi yami watukku Babel.”

⁴ Mawae ete i Yohanan ara'e anambon perwira wuṛṛu tumana'u wanua maddiri tumuṛṛutta parentan Mawu tadea'u matana'a su Yehuda.

⁵ I Yohanan wuṛṛu anambon perwira niapidda watukku Mesir suapan taumata apan ta'e uatana'a su Yehuda, see lai anambon taumata apan nabbelengke wuassu wanua waine sutampa i mangitou uasal᷊iawukka.

⁶ Esakka, wawine, al᷊aṛṛana'a, manga sinangianna apan nitantilli Nebuzaradan su lu'addi Gedalya, nasutta i ya'u wuṛṛu i Barukh, sarangkanambone niapidda su Mesir.

⁷ I mangitou nilumawangnga parenta Mawu, wuṛṛu nanute su Mesir na'oman sara araune su soa Tahpanhes.

⁸ Poiaroddi Mawu nabbisara si ya'u,

⁹ “Panganute manga watu wahewalla, wuṛṛu al᷊ia'e sulal᷊ummu leta'a su saruannu ngara sasuttanna su wal᷊en pamamarentanna su soa udde. Paddea'e lal᷊anne tadea'u manga taumatan Yehuda maasilo inolaannu udde.

¹⁰ Ana see wal᷊oa'a si mangitou manungku i Ya'u, Mawu Apan Lembontaṛṛino, Ruatan Israel sarun maparantan allang-Ku Nebukadnezar ratun Babel, watukku tampa udde. Wuṛṛu su wowo manga watu apan nial᷊inu sulal᷊ummu leta'a udde, i tou sarun mapararisikku wal᷊en araratuanne see mani'akka rasannu araratuanne.

¹¹ I Nebukadnezar sarun dumanta wuṛṛu mamaddo Mesir. Wuṛṛu manga taumata apan buatte nitantunna mate ana waugu al᷊aṛṛusa'itta sarun maten al᷊aṛṛusa'itta. I mangitou apan nitantunna iapidda maola'a tawananna sarun iapidda maola'a tawananna, wuṛṛu nitantunna mate sulal᷊ummu pangalo sarun mate sulal᷊ummu pangalo.

¹² I Ya'u sarun mande'omma putungnga su manga kuillu manga mongannu Mesir, wuṛṛu ratun Babel sarun manoṛṛobba manga paal᷊uanna sassubbanna su manga kuil ara'e iapidda watukku wanuane. Naal᷊ihidda sangkatou mallal᷊u'adda mammaresi laungnge wuassu utu, aroddi lai ratun Babel sarun manapu mamaresi Mesir wua'udde inaite apia ringannu taweddu maataṛṛangnga si tou.

¹³ Manga diṛṛin paal᷊uanna su Heliopolis su Mesir, sarun ṛimunsaanna, wuṛṛu manga kuillu manga mongannu Mesir sarun soṛṛowanna insueanna.”