YEREMIA 41 - WUKE SUSI WATTI'U AL᷊AL᷊USASSA

¹ Su wul᷊anna appitune tonna udde i Ismael ana'i Netanya wuṛṛu pulunni Elisama inaite suadio'a ringannu siri mapul᷊o taumata watukku Mizpa inai maisasomban Gedalya. (Ismael udde sangkatou papapulunnu ratu, sangkatou suwallattu perwira matanggakku araratuanna.) Tantal᷊anna i mangitou sarangkanambone u'anna suadio'a,

² i Ismael wuṛṛu siri mapul᷊o taumata udde nanawutta hal᷊ele mangitou wuṛṛu namate si Gedalya, gubernure apan nipilen taumatan Babel udde.

³ I Ismael namate lai anambon taumatan Yehuda apan isudde lai ringanni Gedalya su Mizpa, wuṛṛu anambon tantaran Babel nabbahanne lai isudde.

⁴ Allo manansunna, tantal᷊anna pamamate si Gedalya taambe niasingkatannu taumata,

⁵ nirumantate siri ual᷊un pul᷊o taumata wuassu Sikhem, Silo, wuṛṛu Samaria. I mangitou buatte nangiṛṛi omengnga, nanggesa'a laubba, wuṛṛu ringannu mannatta'a awa'i mangitou. I mangitou uaapiddu gandumma wuṛṛu kemenyan ionggolla su Wal᷊en Mawu.

⁶ Ne i Ismael sinumabbangke wuassu Mizpa wuṛṛu inaite naisasomba mangitou. Lapiddu lulluai, i tou nabbisara, “Wette inaite ma'ellega si Gedalya.”

^7-8 Tawe nal᷊annu napawe i mangitou na'omate su tangngan soa, i Ismael wuṛṛu manga taumatane mammatete si mangitou. Arawe siri mapul᷊o suwallatti mangitou nabbisara si Ismael, “Arie pappate i yami! I yami ta'e uatahuanna darua hatin gandumma, see lai lanan zaitun, wuṛṛu pul᷊a. Sarangkanambone nuwuning kami su liddu soa.” Ana waugu udde i Ismael tawe namate si mangitou, arawe ingana'a waine nipatene wuṛṛu winal᷊unanni mangitou nilombo su paṛṛihi.

⁹ Parṛṛihi udde paṛṛihi mal᷊oangnga apan niola'i Ratu Asa sutempo i tou nipangaloanni Baesa ratun Israel.

¹⁰ Wua'udde i Ismael nanametta manga sinangiannu ratu wuṛṛu anambon taumata apan ta'e uatana'a su Mizpa apan buatte nitantilli Nebuzaradan su lu'addi Gedalya. I Ismael nanawanna si mangitou ana see inaite suadio'a ringannu mangitou watukku wageangngu Amon.

¹¹ I Yohanan ana'i Kareah wuṛṛu anambon tembonannu tantara apan suadio'a ringanni tou naaringikka ola'u al᷊al᷊eon Ismael.

¹² Ne i mangitou suadio'a ringannu tantarane inaite nangenggenna si Ismael, wuṛṛu naasangkalla si tou su li'u wahewallu Gibeon.

¹³ Naasilo si Yohanan suadio'a ringannu manga perwira udde nirumanta, manga tawananni Ismael lulluassa,

¹⁴ ana see nabbal᷊i'a wuṛṛu tinumal᷊angnga naisasomban ammul᷊anni Yohanan.

¹⁵ Arawe i Ismael wuṛṛu siri ual᷊u ringanne naatal᷊angnga, wuṛṛu tinumal᷊angngu watanganne watukku wanua Amon.

¹⁶ Wua'udde i Yohanan wuṛṛu manga perwirane nanggemonnu manga tantara, wawine, al᷊aṛṛana'a, wuṛṛu manga mammamanaran araratuanna apan niatawanni Ismael napawe i tou wua namate si Gedalya.

^17-18 I mangitou sarangkanambone nabbal᷊i nata'uttu taumatan Babel, ana waugu i Ismael buatte namate si Gedalya apan nipilen ratun Babel naola'a gubernure su wanua udde. Nariaddi, i mangitou tinumal᷊angngu watanganne watukku Mesir. Su tangngan amatanna, i mangitou nangillol᷊o su Kimham maranin Betlehem.