YEREMIA 40 - WUKE SUSI WATTI'U AL᷊AL᷊USASSA

I Yeremia natana'a ringanni Gedalya

¹ Mawu nabbisara si ya'u napawe i Nebuzaradan, komandannu tantara udde, namallo'u su Rama. I ya'u buatte niapidda poiaroddi ringannu ṛaṛṛapusanna suadio'a ringannu anambon taumata waine wuassu Yerusalem wuṛṛu Yehuda apan tantal᷊anna iapidda maola'a tawanna su Babel.

² Komandannu tantara udde namaggo si ya'u sassane wuṛṛu nabbisara, “Mawu Ruatanu buatte namansagga makkimunsa'a wanua indi.

³ Orassa indi olangnge udde buatte niolang-Nge, ana waugu walahannu buatte na'ola'a rosa wuṛṛu tawe tumuṛṛutta si Tou.

⁴ Orassa indi ta'u ipallossa laṛṛapussa indi wuassu limanu wuṛṛu i'o ta'u ipallossa. Amungkangngu i'o mappulu, i'o wotongnge tumantalongnga watukku Babel, wuṛṛu i ya'u sarun mappadul᷊i si'o. Arawe amungkangngu i'o maddiri, tawe apane. Su ahewallu wanua indi i'o walate apulunu umamatta su al᷊awo'u tampa suapa ipaapulunu.”

⁵ Tantal᷊anna taambe inai, i Nebuzaradan nabbisara, “Amungkangngu mappulu, i'o wotongnge mabbelengnga ringanni Gedalya ana'i Ahikam wuṛṛu pulunni Safan, apan buatte nipilen datun Babel maola'a gubernure su manga soan Yehuda. I'o wotongnge matana'a ringanni tou suwallattu tumana'u soa, ara'e inai su al᷊awo'u tampa tumuṛṛuttu apulunu.” Ana see i tou nangonggollu wal᷊unna anna wuṛṛu aonggolla si ya'u, wuṛṛu i ya'u niwalate mapul᷊e.

⁶ I ya'u nanute ringanni Gedalya su Mizpa, wuṛṛu natana'e ringanni tou suwallattu tumana'u wanua apan nitantangnga su wanua Yehuda.

I Gedalya, gubernuren Yehuda

⁷ Ratun Babel buatte nanenegi Gedalya maola'a gubernure su Yehuda mamarenta anambon taumata apan ta'e uatana'a su Yehuda, eteudde manga taumata apan aasianganne. Sangkawageanganna wuassu manga perwira wuṛṛu tantaran Yehuda tawe nassuṛṛubawa su Babel, naaringikka su ola'u pamamile si Gedalya udde.

⁸ Ne i Ismael ana'i Netanya, i Yohanan ana'i Kareah, i Seraya ana'i Tanhumet, wuṛṛu al᷊aṛṛana'i Efai wuassu Netofa, see i Yezanya wuassu Maakha inaite ringannu manga taumata mangitou ringanni Gedalya su Mizpa.

⁹ I Gedalya nabbisara si mangitou, “I yamiu arie paata'utta massuṛṛubawa su taumatan Babel. Atana'e su wanuan kite indi, wuṛṛu maola'e allangngu ratun Babel. Ia'ute mallu'adda asasal᷊amatti yamiu.

¹⁰ Atana'e su manga soa apan ipaapulun kamiu, wuṛṛu pangammule see pamanahipunna anggore, manga wuan aaluanna wuṛṛu lanan zaitun. I ya'u sassane sarun marana'a si Mizpa wuṛṛu mananggal᷊uanna tumanangnge amungkangngu manga taumatan Babel rumanta inawarendi.”

¹¹ Tantal᷊anna udde anambon taumatan Israel apan uatana'a su wanua Moab, Amon, Edom, wuṛṛu manga wanua waine, naaringikka manungku ratun Babel buatte namalan sambageanganna taumatan Israel matana'a su Yehuda, wuṛṛu manungku i tou buatte nanenegi Gedalya maola'a gubernure.

¹² Ana waugu udde i mangitou nanantangke manga tampa suapa i mangitou nisal᷊iawukka, ana see nabbelengke su Yehuda. I mangitou nirumanta ringanni Gedalya su Mizpa, wuṛṛu nangammulu manambo atonna anggore wuṛṛu manga wuang kaaluanna.

I Gedalya nipate

¹³ Wua'udde, Yohanan wuṛṛu manga tembonannu tantara apan tawe nassuṛṛubawa su seetta, nirumanta ringanni Gedalya su Mizpa

¹⁴ wuṛṛu nabbisara, “Masingkattawe i'o manungku i Baalis ratun Amon buatte nandolokki Ismael iapapate si'o?” Arawe i Gedalya tawe mangimanna wisara mangitou.

¹⁵ Ana see ringannu mal᷊anna-l᷊annaba i Yohanan nabbisarate si Gedalya, “Mappianne i ya'u inaite mamate si Ismael; tawe saran sangkatou apan maasingkatta isai namate. Anio i tou ṛinone iwala mamate si'o? Udde pangillul᷊eanne anambon taumatan Yehuda apan uaammulle isindi ringannu, massal᷊iawukke apia, wuṛṛu olangnge udde sarun maaṛṛimunsa'a anambon tumana'u wanua apan ta'e nallambe su Yehuda.”

¹⁶ Arawe i Gedalya sinumimbakka, “Arie! Apan iwabbatingngu udde su ola'i Ismael udde awusu!”