YEREMIA 4 - WUKE SUSI WATTI'U AL᷊AL᷊USASSA

Wawaggo tadea'u mawal᷊u

¹ Mawu nabbisara, “Umattu Israel, amungkangngu i yamiu mappulu mabbelengnga, wette pabbelengke ringang-Ku. Rammea'e dorone manga paal᷊uanna apan ia'aranting-Ku udde, wuṛṛu paatuṛṛutte si Ya'u.

² Amungkangngu i yamiu massalu ringannu arang-Ku wuṛṛu i yamiu mabbiakka su atatul᷊idda su apapia wuṛṛu atonna, ne anambon balahanna sarun sumal᷊ande si Ya'u tadea'u i Ya'u mangal᷊amatta si mangitou, wuṛṛu i mangitou sarun maddalo si Ya'u.”

³ Mawu nabbisara su tumana'u Yehuda wuṛṛu Yerusalem, “Pabbaille letangngu apan taambe niwailla; arie pangasi'u wualanna sutampa sasuanna ṛoaanna tuttuwo.

⁴ Agasse pa'airenu si Ya'u, Mawunu, wuṛṛu ṛaea'e watangannu tumba'u huna-U, ei tumana'u Yehuda wuṛṛu Yerusalem. Amungkangngu tawe, ne asasa'u-U sarun ṛumopa wuṛṛu manoṛṛobba ere putungnga apan tawe iapaddummu isai-sai. Sarangkanambone udde sarun maṛṛia'a su watangannu ana waugu manga inolaannu apan dal᷊eo.”

Yehuda iwabbansaga pangaloanna

⁵ Paniuppe trompetta su ahewallu wanua! Pangikkuitte ringannu ma'ikkatta wuṛṛu matelengnga. Doloṛṛa'e tumana'u Yehuda wuṛṛu Yerusalem tumal᷊angnga watukku manga soa pia tanda batune.

⁶ Pantingira'e lal᷊anna watukku Sion, wuiddu Mawu, pa'asaṛṛawutte massal᷊iu, arie mal᷊annabba. Mawu tantal᷊anna mandantan asasilaka wuṛṛu ahahohakka apan bahewalla wuassu sawannakka.

⁷ Naal᷊ihidda singa sinumabbangnga wuassu pa'imbunianne aroddi lai niumamatte mamamaddo manga araratuanna apan rumantate mamate Yehuda. Manga soan Yehuda sarun mallambe ete tuiddu wal᷊en tampa apan tawe atanaannu taumata.

⁸ Ana waugu udde, luaite wuṛṛu lallute, palluṛṛeten karongnga tatialan lullal᷊o. Ana waugu asasa'u Mawu apan nangillembo taambe lai nompo'a wuassu Yehuda.

⁹ Mawu nabbisara, “Su allo udde manga ratu wuṛṛu manga tembonanne sarun mallome ikkanne; manga imam nata'utta wuṛṛu manga nabi niṛṛumoro.”

¹⁰ Wua'udde i ya'u nabbisara, “Mawu Apan Atanggaṛṛanne, I'o buatte namahia taumatan Yehuda wuṛṛu tumana'u Yerusalem! I'o nabbisara manungku sarun pia paddarame, wutte'e orassa indi niawan kami su pentakku hal᷊ele.”

¹¹ Tempone sarun dumanta taumatan Yehuda wuṛṛu tumana'u Yerusalem maasomba watti'a manungku anginna mal᷊oso wuassu wadda'u anne sarun tumiuppa watukku ringanni mangitou. Anginna udde wal᷊ine anginna wiasa apan tumba'u ma'atalla'u wal᷊a'a,

¹² ewe'e anginna apan ma'ikkatta nirumanta wuassu parenta Mawu sassane ipakkuumannu uman-Ne.

Yehuda tatalliwunannu seetta

¹³ Pa'ellege, seetta sinumabbangnga ere winabbawa. Manga keretan pangalone ere anginna al᷊isusu, manga awal᷊one mallihaṛṛanna wuassu manu'a rajawali. Uare, i ite nasilakate! I ite matete!

¹⁴ Yerusalem, rammea'e al᷊al᷊eonu wuassu naungngu tadea'u i'o masal᷊amatta. Ma'oman sara tingngera manga ṛingiranna lal᷊eo udde sahipunanna sulal᷊ummu naungngu?

¹⁵ Wuassu soan Dan, see lai wuassu panenteannu Efraim nirumantate manga daroloṛṛanna apan uaapiddu watti'a lal᷊eo.

¹⁶ I mangitou mapaanaungngu manga araratuanna wuṛṛu namasingkatta tumana'u Yerusalem manungku seetta inawarendite nirumanta wuassu wanua apan marau. I mangitou mangikkuittu gahoressan pangalo su manga soan Yehuda

¹⁷ wuṛṛu malliwunna Yerusalem ere taumata uariagga wailla. Sarangkanambone udde mariaddi ana waugu walahannu Yehuda buatte nilumawangnga Mawu. Mawu buatte nabbisara.

¹⁸ Yehuda, ete i'o sassane apan nandantan asasilaka udde su watangannu. Ola'u pabbiaṛṛannu wuṛṛu manga inolaannu naawawa anambon asasusa udde mangngusu'a naungngu.

I Yeremia massusa maṛṛingiddu umattu Ruata

¹⁹ Susatewe eteapa naungku, i ya'u tate lai maataṛṛangnga su asasusa. I ya'u tawe mapaatammuddu watangangku pappuso'u ruddaddoro sulal᷊ummu ro'o, ana waugu i ya'u naaringikka tingikku trompetta wuṛṛu hahoressan pangalo pia sanseongnge.

²⁰ Asasilaka nirumanta ualal᷊intuṛṛutta nanggohakku ahewallu wanua. Niaṛṛombanganne rasangku nihohakka, manga pampelene ringanna nihesa'a.

²¹ Sara tingngera i ya'u mabbiala taumata uapapangalo waggate mate? Sara tingngera i ya'u maddaringikka tingikku trompetta apan ma'awengella?

²² Mawu nabbisara, “Woddo atonna uma-U udde, i mangitou tawe ma'aillal᷊a si Ya'u. I mangitou naal᷊ihidda al᷊aṛṛana'a lal᷊eo ringannu tawe pasasunna sarangkadio'a; matikko'a sulal᷊ummu al᷊al᷊eo, marau wuassu apapia.”

Aellega su ola'u darantan asasilaka

²³ Watukku runia mata'u pina'ellega, ellehanna ereola'u tawe loṛṛone wuṛṛu mamara, watukku langitta i ya'u maningngara, uare, taweddu apan masemakka.

²⁴ I ya'u ma'ellega wowone wuṛṛu manga wuidda apan matanggakka tumanite ma'ikkatta umio'a.

²⁵ Ellehangku tawe taumata, manu'u winalanganna tinumalla'e abbi.

²⁶ Leta'a masuwukka nabbal᷊i wadda'a mamara, manga soa narusa nallambe tuidde, ana waugu Mawu mangke massa'u su uman-Ne. (

²⁷ Mawu nabbisara manungku ahewallu runia sarun maoala'a wadda'u anne, arawe i Tou tawe manggohakka abbi.)

²⁸ Runia sarun lumal᷊o, langitta ete wasa tuudda. Mawu buatte nabbisara wuṛṛu tate mamal᷊u hol᷊a-Ge. I tou buatte namutussa wuṛṛu tate sumoṛṛotta sara sangkal᷊empanga.

²⁹ Niaringikka hion tantara uasa'e awal᷊o wuṛṛu mamamiti'a, naaola'a suapan taumata tuttal᷊angnga ussal᷊arenga. Manga mahurangnge nisuttanni mangitou, wuidda watu ni'awitanni mangitou. Anambon soa nabbal᷊i mal᷊annabba, tateddu mappulu lai matana'a isudde.

³⁰ Ei Yerusalem, i'o buatte nitantangnga wuṛṛu mangke tawe napa'ola'a apa-apa! Ipa'ura malluṛṛen laubba maṛṛamu wuṛṛu mallogakka watangannu ringannu wul᷊awanna wuṛṛu sal᷊a'a, se'e lai namuṛṛa mata ringannu wawuṛṛa? Tawe gunane i'o malloggakka watangannu, ana waugu manga apulunu maddirinute, ewe'e lai i mangitou mappulu manawutta niawanu.

³¹ I ya'u naaringikka tingikku sasal᷊iomanna ere wawine apan mangunsiwete; ere wawine wakku mangunsiwen anangnge apan paarorone, etearoddi lal᷊uain Yerusalem apan maappu sasangngone. Limane ia'uawa wuṛṛu i tou sussal᷊ande, “Nasilakate i ya'u – i ya'u pateanten seetta!”