YEREMIA 37 - WUKE SUSI WATTI'U AL᷊AL᷊USASSA

Darorongngi Zedekia si Yeremia

¹ Sutempo i Nebukadnezar ratun Babel namarentin Yoyakhin, i tou namile si Zedekia ana'i Yosia naola'a ratun Yehuda.

² Arawe mawae i Zedekia aroddi lai manga tembonanne wuṛṛu tumanangnge maddiri tumuṛṛutta tanata Mawu apan nionggollu Mawu niapawal᷊o si ya'u.

³ Ratu Zedekia nandolokki Yukhal ana'i Selemya, wuṛṛu Imam Zefanya ana'i Maaseya tadea'u maddorongnga si ya'u umal᷊iomanna su Mawu Ruata hunan hausannu walahanna.

⁴ Sutempo udde i ya'u taambe nitaṛṛo sulal᷊ummu tuttupanna wuṛṛu ta'e walate apulu umamatta suwallattu tumanangnge.

⁵ Tantaran Babel tantal᷊anna malliwunna Yerusalem, arawe napawe i mangitou naaringikka manungku tantaran Mesir nanantangke Mesir inai mapapangalo, i mangitou sinumoṛṛotta.

⁶ Mawu, Ruatan Israel, nandolo'u

⁷ mabbisara arendi su daroloṛṛanni Zedekia: “Wal᷊oa'e si Zedekia, ‘Tantara Mesir apan tantal᷊anna mattudda inawarendi massumbala si'o, sarun mabbelengnga mapul᷊e.

⁸ Ana see taumatan Babel sarun mabbelengnga wuṛṛu mamangalo soa indi, see mamaddo wuṛṛu manoṛṛobba.

⁹ I Ya'u, Mawu, mapanaungnga si yamiu, tadea'u arie pamahia watangannu ringannu maṛṛingidda manungku taumatan Babel napul᷊ete wuṛṛu tate mabbelengnga apia.

¹⁰ Unnuwisara i yamiu maawaddo anambon tantaran Babel ma'oman sara mallambe ete ingana'a nangkal᷊essa wahewalla sulal᷊ummu manga rasanni mangitou, arawe i mangitou sarun mabbuatta wuṛṛu manoṛṛobba sara masue soa indi.’ ”

I Yeremia nisametta wuṛṛu niṛṛuumanna

¹¹ Tantaran Babel sinumoṛṛotta wuassu Yerusalem ana waugu tantara Mesir inaite mattudda soan udde.

¹² Ne i ya'u nanantangngu Yerusalem wuṛṛu inaite su wageangngi Benyamin tadea'u manarimmattu tahian bua'u buassu leta'a pussa'an ṛuanganna.

¹³ Arawe sutempo i ya'u na'omate su Ngara Pasallanganna su leta'u Benyamin, tembonannu tantara apan mammanara isudde nanaṛṛangnga si ya'u wuṛṛu nabbisara, “I'o tumal᷊angnga su samba'an taumatan Babel!” (Tembonannu tantara udde aranne i Yeria; i tou ana'i Selemya wuṛṛu pulunni Hananya.)

¹⁴ I ya'u nabbal᷊issa, “Tawe aroddi! I ya'u tawe pandumma tumal᷊angnga su samba'an seetta.” Arawe i Yeria maddiri maddaringikka. I tou nanametta wuṛṛu nangapi'u sinumaruanna manga tembonannu araratuanna.

¹⁵ I mangitou mandona atonna si ya'u, wuṛṛu namarenta tadea'u i ya'u puul᷊anna wuṛṛu itaṛṛo su wal᷊en Yonatan, ruddutul᷊issu araratuanna. Wal᷊en udde buatte niola'a tattupanna.

¹⁶ I ya'u niwontolla su sambau kolamma sulal᷊ummu leta'a, wuṛṛu mal᷊annu tataṛṛanganna isudde.

¹⁷ Wua'udde i Ratu Zedekia nandolokku taumata niapaapi'u sumaruanna si tou su wal᷊en araratuanna. Isudde ringannu iaaddapinga i tou naiwal᷊o si ya'u apa pia tanata wuassu Mawu. “Pia,” sasimba'u. See tinamba'u, “Tuangnga sarun itantilla su ratun Babel.”

¹⁸ Wua'udde i ya'u naiwal᷊o, “Apa al᷊al᷊eo'u su saruanni Tuangnga ara'e su saruannu manga tembonannu araratuanni Tuangnga ara'e tumanangnge, na'oman sara i Tuangnga nantaṛṛo'u sulal᷊ummu tuttupanna?

¹⁹ Suapate manga nabin Tuangnga udde apan mabbisara manungku ratun Babel tawe mamangalo si Tuangnga wuṛṛu wanua indi?

²⁰ Orassa indi, i Tuangnga apan mawantuga, doronganna maddaringikka darorongku indi. Ariewe i Tuangnga mandolo'u apia watukku tattupanna su wal᷊en Yonatan udde, antahanna i ya'u mate poiaroddi.”

²¹ Ne i Ratu Zedekia namarenta tadea'u i ya'u iṛṛuumanna su rallakku wal᷊en araratuanna. Nariaddi i ya'u uatana'a isudde, wuṛṛu allo-allo a'onggol᷊annu roti wuassu tampa pa'olaanna roti na'oman sara saddian roti su soa udde nasue abbi.