YEREMIA 36 - WUKE SUSI WATTI'U AL᷊AL᷊USASSA

I Barukh nabbasan buke lalul᷊unanna su Wal᷊e Mawu

¹ Su tonna aiappanne napawe Yoyakim ana'i Yosia naola'a ratun Yehuda, Mawu nabbisara si ya'u,

² “Anute sambau buke lalul᷊unanna, wuṛṛu woṛṛeta'a isudde sarangkanambone apan buatte Ta'u niwisara si'o su ola'u Israel wuṛṛu Yehuda, wuṛṛu su ola'u al᷊awo'u walahanna. Woṛṛeta'e anambon wisara-U ro'en i Ya'u paarorone nabbisara si'o sutempo i Ratu Yosia uaparenta naddatingngu allo indi.

³ Asinungka taumatan Yehuda tate ma'ola'a al᷊al᷊eo napawe i mangitou maaringikka su ola'u anambon asasilaka apan Ta'u niṛṛia'a si mangitou. Ne i Ya'u sarun mangampungnga rosa wuṛṛu al᷊al᷊eo mangitou.”

⁴ Ana waugu udde i Ya'u namaggo si Barukh ana'i Neria wuṛṛu nangampona si tou anambon bisara Mawu si ya'u. Ne i Barukh namoṛṛettu sarangkanambone sulal᷊ummu buke lalul᷊unanna udde.

⁵ Wua'udde i ya'u nangonggollu parenta indi si tou, “I ya'u tawe niwala apia sumutta su Wal᷊e Mawu.

⁶ Ana waugu udde, amungkangngu nia'omante tempone taumata mappuasa, i'o ṛinone inai poiaroddi, wuṛṛu mabbasa ringannu tingikka ma'ikkatta sarangkanambone apan ta'u niampona si'o, tadea'u i mangitou maddaringikka anambon bisara Mawu si ya'u. Manarate udde su tampa apan botongnge i'o daringiṛṛannu suapan taumata apan sulal᷊ummu Wal᷊en Mawu, nasutta taumatan Yehuda apan nirumanta wuassu manga soa mangitou.

⁷ Asinungka ana waugu udde i mangitou sarun umal᷊iomanna su Mawu, wuṛṛu mawal᷊u wuassu manga inolaanni mangitou apan dal᷊eo. Mawu mangke nasa'u atonna si mangitou wuṛṛu mammansaggi mangitou.”

⁸ Ne i Barukh nabbasaten bisara Mawu su Wal᷊e Mawu, ere buatte niparenta si tou.

⁹ Su wulanna assione tonna al᷊imane sutempo Yoyakim ratun Yehuda, tumanangnge nappuasa tadea'u maasomba aakkanna wuassu Mawu. Tumana'u Yerusalem wuṛṛu manga taumata apan nirumanta wuassu mangasoan Yehuda, sarangkanambone nappuasa.

¹⁰ Ana see i Barukh nabbasa wuassu buke lallul᷊unanna udde al᷊awo'a apan buatte ta'u niwal᷊o, wuṛṛu sarangkanambone uararingikka. Pabbawasa udde niola'a su Wal᷊e Mawu su antorin Gemarya, ana'i Safan ruddu tul᷊issu araratuanna. Antori udde addone su rallakka al᷊iu rosone, maranin dal᷊anna sumutta watukku Ngara pasallanganna Wakku su Wal᷊en Mawu.

Buke lalul᷊unanna niwasa su manga tembonannu araratuanna

¹¹ I Mikhaya ana'i Gemarya wuṛṛu pulunni Safan uararingikka si Barukh mabbasan bisara Mawu wuassu buke lalul᷊unanna udde.

¹² Ana see i tou inaite watukku wal᷊en araratuanna, su antorin ruddutul᷊issu araratuanna. Isudde anambon tembonanne tantal᷊anna maammulla. I Delaya ana'i Semaya, i Elnatan ana'i Akhbor, i Gemarya ana'i Safan, i Zedekia ana'i Hananya, i Elisama ana'u sangkatou ruddutul᷊issa, wuṛṛu manga tembonanne waine isudde.

¹³ I Mikhaya namasingkatta si mangitou, sarangkanambone apan niwasan Barukh su Wal᷊e Mawu.

¹⁴ Wua'udde manga tembonanne udde nandolokki Yehudi (eteudde ana'i Netanya, pulunni Selemya, tuwonnuta'i Kusyi) ringanni Barukh ringannu parenta tadea'u iaparanta wuṛṛu mangapidda ringanni mangitou buke lalul᷊unanna apan buatte niwasane udde. Ne i Barukh nangapidden buke udde.

¹⁵ “Ringannu addata aiana'e,” unnu mangitou, “wasa'e buke lalul᷊unanna udde si yami.” Ne i Barukh tinumuṛṛutta.

¹⁶ Napawe i tou buatte nabbasa, i mangitou nasasailete ringannu apendamma sussinggawanga ana see nabbisara si Barukh, “I yami ṛinone mamasingkattu olangnge indi su ratu.”

¹⁷ Wua'udde i mangitou naiwal᷊o, “Annama'o wal᷊oa'a si yami ereapa i'o namoṛṛettu sarangkanambone indi. Apa i Yeremia apan nangampona si'o?”

¹⁸ “Atonna, suapan bisara apan uawoṛṛetta isindi buatte niamponan Yeremia si ya'u, wuṛṛu ia'i namoṛṛetta ringannu tinta su buke lalul᷊unanna indi,” sasimbakki Barukh.

¹⁹ “I'o wuṛṛu i Yeremia ṛinone pa'imbuni. Arie ma'oman sara pia taumata maasingkatta pa'imbuniannu udde,” unni mangitou.

Ratu nanutungnga buke lalul᷊unanna udde

²⁰ Manga tembonanne udde nangaddon buke lalul᷊unanna udde su wabbo'an Elisama, ruddutul᷊issa udde, wua'udde inaite ringannu ratu namasingkattu sarangkanambone.

²¹ Wua'udde ratu nandolokki Yehudi inai niapaal᷊appa buke lalul᷊unanna udde. Napawe buatte nianu wuassu wabbo'an Elisama, i Yehudi nabbasate su saruannu ratu wuṛṛu su anambon tembonanne apan tantal᷊anna uarisikka uapal᷊iwutta si tou.

²² Sutempo udde wul᷊anna assione, wuṛṛu ratu tantal᷊anna ua'ianna su saruannu pandu'u wal᷊en araratuanna sutempo masunge.

²³ Aroddi lai i Yehudi napawe buatte nabbasan tatallu ara'e appattu addoanne, ratu namototta wageangnge udde ringannu lari'a addio'a wuṛṛu tinuntungnga sulal᷊ummu putungnga. Etearoddi sidutu niolangnge na'oman sara buke lalul᷊unanna udde nasuen tutungnge.

^24-25 Salaiwe i Elnatan, i Delaya, wuṛṛu i Gemarya mangke sussal᷊ande tadea'u ratu tawe manutungnga buke lalul᷊unanna udde, arawe i tou maddiri maddaringikka si mangitou. Mawae ete ratu aroddi lai manga tembonanne apan naaringikka lal᷊oṛṛon buke udde tawe mata'utta ara'e pia apendamma sussassilla.

²⁶ Ratu ewe'e lai namarenta parinsine, eteudde Yerahmeel, suadio'a ringanni Seraya ana'i Azriel wuṛṛu Selemya ana'i Abdeel, tadea'u manametta si ya'u wuṛṛu si Barukh ruddutul᷊i'u. Arawe iambua niwuni Mawu.

²⁷ Napawe Ratu Yoyakim buatte nanutungnga buke lalul᷊unna apan ta'u niampona si Barukh udde, Mawu nandolo'u

²⁸ niapaal᷊appa buke lalul᷊unna apan baine, wuṛṛu nangal᷊inna anambon woṛṛetta apan uawoṛṛetta su buke lalul᷊unna apan paarorone udde.

²⁹ Mawu nandolo'u niapawal᷊o arendi su ratu, “I'o buatte nanutungnga buke lalul᷊unna udde, wuṛṛu i'o naiwal᷊o si Yeremia anio i tou namoṛṛetta manungku ratun Babel sarun dumanta wuṛṛu makkimunsa'a wanua indi see mamate tumanangnge suadio'a ringannu manga winatangnga.

³⁰ Ana waugu udde, i Ya'u, Mawu, mabbisara si'o ei Ratu Yoyakim, manungku tawe saran sangkatou wuassu papapulunnu sarun mamarenta maola'a ratu wuassu papapulunni Daud. Winal᷊unannu sarun ituntungnga su liudde, iwati su paddissa sutempo allo, wuṛṛu wal᷊angngukka sutempo ṛabbi.

³¹ I'o, papapulunnu, wuṛṛu manga tembonannu sarun Ta'u iṛṛuumanna ana waugu manga rosa apan niola'i yamiu. I Ya'u sarun mandanta si yamiu asasilaka apan Ta'u maria'a yamiu, ana waugu mawae i'o aroddi lai tumana'u Yerusalem tawe manutukka manga wawansa-U.”

³² Ne i ya'u nanganu buke lalul᷊unna apan bakku, wuṛṛu nionggolla si Barukh ruddutul᷊i'u. Ana see i tou namoṛṛettu sarangkanambone apan ta'u niampona si tou, eteudde lal᷊oṛṛon buke lalul᷊unanna apan paarorone nitambannu lai manga pira tanata waine ereudde.