YEREMIA 34 - WUKE SUSI WATTI'U AL᷊AL᷊USASSA

Tanata si Zedekia

¹ Sutempo i Nebukadnezar ratun Babel ringannu tantarane apan nitohassu manga tantara wuassu al᷊awo'u walahanna wuṛṛu araratuanna apan nassuṛṛubbawa si tou nirumanta mamangalo Yerusalem wuṛṛu manga soa maranine, Mawu nabbisara si ya'u.

² I tou nandolo'u inai ringanni Zedekia ratun Yehuda, wuṛṛu iapawisara arendi, “I Ya'u, Mawu Ruatan Israel, sarun manantillu soa indi su ratun Babel wuṛṛu sarun soṛṛowanni tou.

³ I'o tawe maatal᷊angnga, ewe'e sametanna wuṛṛu itantilla si tou. I'o sarun massomba wuṛṛu maggahatton tou sassane, wua'udde i'o inaite watukku Babel.

⁴ Arawe paddaringikke wisara-U indi su olangngu, Zedekia! I'o tawe nate sulal᷊ummu pangalo,

⁵ ewe'e mate ringannu matammudda. Wuṛṛu ereapa tumanangnge mannambunnu amania sutempo mallabbingu al᷊amonanu apan namarenta tantal᷊anna i'o taambe, aroddi lai tumanangngu sarun manambunnu amania hunanu. I mangitou sarun lumal᷊o wuṛṛu mabbisara, ‘Uare! Ratung kami natete!’ I Ya'u, Mawu, buatte nabbisara.”

⁶ Ne tanata Mawu udde ta'u niapasingkatta si Ratu Zedekia su Yerusalem,

⁷ sutempo tantaran ratun Babel tantal᷊anna mammangalo soa udde. I mangitou lai namangalo soa Lakhis wuṛṛu Aseka, darua soa pia tanda batune apan ta'e pia su Yehuda.

Pallal᷊agu apan mallinga manga allangnga

⁸ I Ratu Zedekia wuṛṛu tumana'u Yerusalem na'ola'a paaire ipamallossu

⁹ manga allangngu Ibrani, mawae ete esakka aroddi lai wawine tadea'u tawe saran sangkatou wuassu walahannu Israel apan mangngallangnga taumata sambalahanne.

¹⁰ Anambon tumana'u araratuanna wuṛṛu manga tembonannu araratuanna apan buatte na'ola'a paaire ipamallossu manga allangnga i mangitou wuṛṛu tate mangallangnga apia, atonna-tonna mamallossu manga allangngi mangitou udde.

¹¹ Arawe wua'udde ṛingiranni mangitou nawal᷊u, ana see nanganu apia manga allangnga udde, wuṛṛu niwata'a maola'a allangnga apia.

^12-13 Ne Mawu, Ruatan Israel, nandolo'u nabbisara arendi su manga taumata udde, “Sutempo i Ya'u nangapiddu al᷊amonanu sinumabbangnga wuassu Mesir wuṛṛu namallossi mangitou wuassu pattaṛṛua allanganna, i Ya'u buatte na'ola'a paaire si mangitou.

¹⁴ I Ya'u nabbisara manungku anambon allangngu Ibrani apan buatte nangimbe annummu tonna al᷊annune, ṛinone ipallossa su panginsueannu tonna appitune. Arawe al᷊amonanu maddiri mappandumma ara'e maddaringikka wisara-U udde.

¹⁵ Manga pira allo nal᷊iu i yamiu namal᷊u pallal᷊agunu wuṛṛu inolaannu maal᷊uassa naung-Ku. I yamiu sarangkanambone nabbaidda mamallossu manga allangnga walahanni yamiu, wuṛṛu nangiittu paaire ringang-Ku sulal᷊ummu Wal᷊e-U.

^16-19 Manga tembonannu pamarentan Yehuda wuṛṛu Yerusalem su sambau ringannu mamanaran bal᷊en araratuanna, manga imam wuṛṛu anambon mandariagga letangngu buatte namattan pa'aire udde ringannu nakkata sapi, niwa'a nitahia darua, wuṛṛu niumamatta suwallattu darua wa'an sapi udde. Arawe, wua'udde ṛingiranni yamiu nawal᷊u wuṛṛu nallobbossa si Ya'u. Manga allangnga apan buatte nipallossi yamiu ere su apulu mangitou, niul᷊eanni yamiu apia wuṛṛu niwata'a maola'a allangnga apia. Ana waugu udde, i Ya'u, Mawu, nabbisara manung-Ku i yamiu buatte nilumawangnga parenta-U, wuṛṛu tumuṛṛutta manga atorannae, ana waugu i yamiu tawe namallossu sansul᷊ungngu walahannu Israel. Ore, orassa indi mappianne i Ya'u mangonggollu apapallossa si yamiu; apapallossa tadea'u mate sulal᷊ummu pangalo ara'e al᷊aṛṛusa'itta ara'e ṛutumma. I Ya'u sarun ma'ola'a si yamiu ere lai i yamiu na'ola'a sapi apan niṛṛatang kamiu udde.I Ya'u sarun ma'ola'a al᷊awo'u walahanna su runia pia atata'utta maasilo inolaang-Ku si yamiu.

²⁰ I Ya'u sarun manantilli yamiu su seetta apan mappulu mamate si yamiu. Winal᷊unannu sarun inasannu manu'u winalanganna wuṛṛu winatangnga mal᷊aṛṛaga.

²¹ I Zedekia ratun Yehuda wuṛṛu manga tembonannu pamarentane sarun Ta'u itantilla su manga taumata apan mappulu mamate si mangitou. I Ya'u sarun manantilli mangitou su tantaran Babel, apan orassa indi nanantangken kamiu.

²² I Ya'u sarun mangongollu darolokka tadea'u i mangitou mabbelengnga su soa indi, ana see malliwunna, mangaṛṛo, wuṛṛu manoṛṛobba soa udde. Manga soan Yehuda sarun Ta'u olaanna ere wadda'u anne apan tawe tanaannu taumata. I Ya'u, Mawu, buatte nabbisara.”