YEREMIA 33 - WUKE SUSI WATTI'U AL᷊AL᷊USASSA

Pa'aire waine apan mangnggollu antimma

¹ Sutempo i ya'u ta'e tataṛṛanganna si rallakka, i ya'u naasomba tanata wuassu Mawu

² apan nandiaddi runia wuṛṛu nallanginnu saṛṛene see nangaddo su tampane. I tou nabbisara,

³ “Sal᷊andete si Ya'u, ne i Ya'u sarun sumimbakka; sarun Ta'u iapasingkatta si yamiu manga inolaanna apan maṛṛamaga wuṛṛu maatiangnga apan ta'e awaganannu.

⁴ Wal᷊en araratuannu Yehuda wuṛṛu manga wal᷊en su soan Yerusalem buatte nihohakka ipanohassa tanda'a wuassu tatalliwunna wuṛṛu lal᷊a'on seetta. Arawe i Ya'u, Mawu, Ruatan Israel, mabbisara manungku,

⁵ tawe gunane lumawangnga taumatan Babel, ana waugu olangnge udde tumba'u ma'ola'a soa indi mapenen binal᷊unannu manga taumata apan nipate-U sulal᷊ummu asasa'u wuṛṛu araṛṛagi-U si mangitou. I Ya'u maddirite lai ma'ellega soa indi ana waugu taumatane buatte na'ola'a al᷊al᷊eo.

⁶ Arawe sutempo addantane i Ya'u sarun mapawelengngu ola'u soa indi wuṛṛu tumanangnge; i mangitou sarun matohassa apia. I Ya'u sarun mangonggolla si mangitou lal᷊umanna'a wuṛṛu atatahul᷊andimma apan nangillembo.

⁷ Yehuda wuṛṛu Israel sarun Ta'u olaanna tumelengnga ere dorone wuṛṛu i mangitou sarun dumarisikka apia maola'a uma-U.

⁸ I Ya'u sarun mamaresi si mangitou wuassu manga rosa apan buatte niola'i mangitou su saruang-Ku; manga rosa wuṛṛu lal᷊awangngi mangitou sarun Ta'u ampunganna.

⁹ Yerusalem sarun maola'a al᷊al᷊uassa wuṛṛu ilallala-U. Al᷊awo'u walahanna su runia sarun mata'utta wuṛṛu matal᷊o see mangaddatta si Ya'u, napawe maaringikka ola'u apapia apan Ta'u niola'a su tumana'u Yerusalem, wuṛṛu su ola'u lal᷊umanna'a apan Ta'u nionggolla su soa udde.”

¹⁰ Mawu nabbisara, “Taumata mabbisara manungku tampa indi ere wadda'u anne, tawe taumata ara'e winatangnga apan matana'a isudde. Wisaram mangitou udde atonna, ana waugu manga soan Yehuda wuṛṛu manga lal᷊anna su Yerusalem tate loṛṛone abbi; tawe taumata ara'e winatangnga apan matana'a isudde.

¹¹ Arawe su manga tampa udde sarun aringiṛṛanna apia tingikku al᷊al᷊uassa wuṛṛu lal᷊ala'a see aantari manga taumata apan uaapiddu sasamba aadiangkamanna watukku wal᷊e-U. I mangitou sarun mabbisara, ‘Pa'adiangkamante su Mawu Apan Lembontaṛṛino, ana waugu i Tou mapia wuṛṛu darangngu-Ne tawe patta'al᷊anne.’ Wanua indi sarun Ta'u olaanna manambo wiakke ere dorone. I Ya'u, Mawu, buatte nabbisara.”

¹² Mawu Apan Lembontaṛṛino nabbisara, “Wanua wuṛṛu manga soane apan ere wadda'u anne indi tawe atanaannu taumata ara'e winatangnga. Salaiwe aroddi, su allo addantane sarun pia lai manga wadda'u nannal᷊o tampan taumata mammadul᷊i manga dombane.

¹³ Su manga soa su wageangngu leta'u penenteanna, wawal᷊annu panenteanna, wageangngu Yehuda samba'a timukka, wuṛṛu wageangngu leta'i Benyamin see manga ampungnga maranin Yerusalem, wuṛṛu manga soan Yehuda, manga mallal᷊u'adda sarun manddeengnga apia manga domba mangitou. I Ya'u, Mawu, buatte nabbisara.”

¹⁴ Mawu nabbisara, “Sarun a'omanna tempone i Ya'u manipussu paaire apan buatte Ta'u niola'a ringannu Israel wuṛṛu Yehuda.

¹⁵ Sutempo udde sangkatou apan matul᷊idda wuassu papapulunni Daud sarun Ta'u pileanna maola'a ratu. Ratu udde sarun mammanara ringannu atatul᷊idda wuṛṛu naṛṛino su ahewallu wanua.

¹⁶ Taumatan Yehuda wuṛṛu tumana'u Yerusalem sarun iapaasal᷊amatta wuṛṛu mabbiakka ringannu mal᷊angnganna. Soan Yerusalem sarun isaggo ‘Mawu Mananal᷊amatti Ite’.

¹⁷ I Ya'u, Mawu, na'ire manungku sidutu sarun pia sangkatou wuassu papapulunni Daud apan maola'a ratun Israel;

¹⁸ sidutu sarun pia manga imam wuassu ṛuanganni Lewi apan mangngimbe si Ya'u wuṛṛu mangngonggollu sasamba winatangnga, gandumma wuṛṛu sasamba itattambunna.”

^19-20 Mawu nabbisara si ya'u, “I Ya'u buatte namattan pa'aire ringannu allo wuṛṛu ṛabbi, tadea'u allo wuṛṛu ṛabbi sidutu ruddanta sutempone; paaire udde tawe wotongnge pappasanna.

²¹ Aroddi lai Ya'u buatte namattan paaire ringannu allang-Ku Daud, manungku wuassu papapulunne sidutu sarun pia sangkatou apan maola'a ratu; wuṛṛu i Ya'u buatte namattan paaire ringannu manga imam papapulunni Lewi manungku i mangitou sidutu sarun mangimbe si Ya'u. Manga paaire udde tawe iapappassa.

²² I Ya'u sarun manimu papapulunni allang-Ku Daud wuṛṛu manga imam su ṛuanganni Lewi, ma'oman sara anambone maola'a ere anambon anne su winggin sahatta wuṛṛu anumpitanna su langitta apan tawe iareengnga.”

²³ Mawu nabbisara si ya'u,

²⁴ “Buattewe i'o nanutukka wisaran taumata ipabbisara Israel wuṛṛu Yehuda? I mangitou mabbisara manungku i Ya'u buatte nandammen walahanna darua indi apan buatte Ta'u nipile udde. Ana waugu udde i mangitou mangngaddio'a uma-U, wuṛṛu tate lai ma'ellega si mangitou udde sambau walahanna.

²⁵ Arawe su ereapa i Ya'u, Mawu, buatte namattan sambau pa'aire ringannu allo wuṛṛu ṛabbi, wuṛṛu na'ola'a tita apan mangngatokku langitta wuṛṛu runia,

²⁶ aroddi lai Ya'u sarun sidutu uaaggassa pa'aire-U ringannu papulunni Yakub wuṛṛu ringannu allang-Ku Daud. Sangkatou wuassu papapulunni Daud sarun Ta'u pileanna mamarenta papapulunni Abraham, Ishak, wuṛṛu Yakub. I Ya'u sarun umakkannu uma-U, wuṛṛu ma'ola'a si mangitou su lal᷊umanna'a apia.”