YEREMIA 32 - WUKE SUSI WATTI'U AL᷊AL᷊USASSA

I Yeremia namalli leta'a

¹ Su tonna appul᷊one i Zedekia ratun Yehuda uaparenta, eteudde tonna mapul᷊o ual᷊u i Nebukadnezar ratun Babel uaparenta, Mawu nabbisara si ya'u.

² Sutempo udde tantaran ratun Babel tantal᷊anna mammangalo Yerusalem. I ya'u nitaṛṛanganna su rallakku wal᷊en araratuanna

³ ṛattangannu Ratu Zedekia ana waugu niansil᷊anna buatte nangal᷊iata manungku Mawu nabbisara arendi, “Ratun Babel sarun Ta'u iwala iapaawaddo wuṛṛu mangintaṛṛo su soa indi,

⁴ wuṛṛu i Ratu Zedekia tawe maatal᷊angnga. I tou sarun itantilla su ratun Babel, wuṛṛu sumaruanna ratu udde see maggahatton tou sassane.

⁵ Wua'udde i Zedekia sarun iapidda watukku Babel wuṛṛu matana'a poiaroddi ma'oman sara i Ya'u makkuumanni tou. Salaiwe i tou mamangalo taumatan Babel, i tou sarun tawe maauntungnga. Ya'u, Mawu, buatte nabbisara.”

⁶ Mawu nabbisara si ya'u

⁷ manungku i Hanameel, ana'a esakki tuṛṛangngu iamangku Salum, sarun dumanta maddorongnga tadea'u i ya'u mamalli letangnge su Anatot su wageangngu leta'i Benyamin. Ana waugu, ete i ya'u tuṛṛangnge apan aranianne wotongnge mamalli leta'a udde.

⁸ See naṛṛino ereapa buatte niwisara Mawu, nirumantate i Hanameel ringangku su rallakku wal᷊en araratuanna, wuṛṛu maddorongnga tadea'u i ya'u mamalli letangnge. Ana waugu udde i ya'u nangimanna Mawu atonna-tonna buatte nabbisara si ya'u.

^9-10 Ne i ya'u namallite leta'a udde wuassi Hanameel ringannu arega mapul᷊o pitu roitta sal᷊a'a. I ya'u namaggo manga mattatiala wuṛṛu su saruanni mangitou i ya'u naneengnga surattu pamamalli leta'a udde, see i ya'u nandeette segelle wuṛṛu roinne nikilo.

¹¹ Wua'udde i ya'u nanganu surattu pamamalli udde apan piate segelle wuṛṛu wawoṛṛetannu manga atoranna see manga atantuanne. I ya'u lai nanganu suratta nial᷊inna apan tawe segellene,

¹² wuṛṛu suratta darua udde ta'u nionggolla si Barukh ana'i Neria pulunni Mahseya. I ya'u nanantilla su saruanni Hanameel see manga mattatialane apan buatte naneengnga manga suratta udde, wuṛṛu su saruannu manga taumata apan tantal᷊anna ua'ianna su rallakka udde.

¹³ Su saruanni mangitou sarangkanambone i ya'u nabbisara si Barukh,

¹⁴ “Mawu Apan Lembontaṛṛino, Ruatan Israel, namarenta tadea'u i'o manengkamma suratta darua indi, mawae ete asline aroddi suratta nial᷊inna, wuṛṛu taṛṛoa'a sulal᷊ummu sambau urinna perselenna tadea'u mataṛṛangnga mal᷊annu.

¹⁵ Mawu Apan Lembontaṛṛino, Ruatan Israel, nabbisara manungku wal᷊en, leta'a, wuṛṛu waillu anggore sal᷊immurine sarun ipabbawalli apia su wanua indi.”

Aal᷊iomanni Yeremia

¹⁶ Napawe manga surattu pamamalli udde ta'u nionggolla si Barukh, i ya'u niumal᷊iomanna,

¹⁷ “Mawu Apan Atanggaṛṛanne, ete I'o nandiaddi langitta wuṛṛu runia ringannu taṛṛino wuṛṛu auatan-Nu apan bahewalla. Tawe saran sambau apan masahadda Si'o.

¹⁸ I'o napal᷊iatta'u darangngu-Nu apan tutune su ṛiwune taumata, arawe I'o lai makkuumannu taumata ana waugu rosan hagurangnge. I'o Ruata apan mawantuga wuṛṛu matohassa; aran-Nu Mawu Apan Lembontaṛṛino.

¹⁹ Manga ṛiin-Nu tawe sul᷊ungnge, wuṛṛu manga inolaannu maatiangnga; I'o maasilo al᷊awo'a apan a'olaanu taumata, wuṛṛu mabbal᷊issa si mangitou uasul᷊ungngu inolaanni mangitou.

²⁰ Sutempo dorone I'o ma'ola'a al᷊aṛṛindu'a wuṛṛu manga inolaanna apan bahewalla su Mesir, wuṛṛu na'oman sara orassa indi lai I'o ta'e uata'a ma'ola'a udde, mawae suwallattu taumatan Israel aroddi lai suwallattu al᷊awo'u walahanna waine. Ana waugu udde I'o tinumelengke su anambon tampa.

²¹ Ringannu taṛṛino wuṛṛu atatohan-Nu apan wahewalla I'o nangapiddu umattu Israel sinumabbangnga wuassu Mesir. I'o ma'ola'a manga al᷊aṛṛindu'a wuṛṛu manga tiala apan ma'atiangnga see manga riaddianna apan ma'ata'utta seetta.

²² Wanua apan mapia wuṛṛu masuwukka indi Ta'u ionggolla si yamiu ere buatte pina'ire-Ku su al᷊amona mangitou.

²³ Arawe napawe i mangitou nirumanta watukku wanua indi wuṛṛu napaangaṛṛo, i mangitou tate tate lai tumuṛṛutta manga parenta-Nu, wuṛṛu tawe mabbiakka tumuṛṛuttu manga al᷊aṛṛang-Ngu. Sarangkanambone apan niparenta-Nu si mangitou tawe saran sambau apan niola'i mangitou. Ana waugu udde I'o nandantan al᷊awo'u asasilaka indi si mangitou.

²⁴ Manga taumatan Babel buatte napararisikku manga tanda'a batu palliwunanna mipamal᷊iwutta soa huna ipangaṛṛo, wuṛṛu orassa indi i mangitou mammangalote. Pangalo, ṛutumma, wuṛṛu al᷊aṛṛusa'itta maola'a pangillul᷊ennu soa indi manawo su lima mangitou. I'o maasilo manungku sarangkanambone apan niwisara-Nu nilumiatta'e.

²⁵ Salaiwe aroddi, oh Mawu Apan Atanggaṛṛanne, ete I'o apan nandolo'u mamalli leta'a indi su saruannu manga matatialane, salaiwe tate mal᷊anna lai soa sarun aṛṛoannu taumatan Babel.”

²⁶ Wua'udde Mawu nabbisara si ya'u,

²⁷ “Tumba'u i Ya'u Mawu, Ruatan anambon taumata. Taweddu masahadda si Ya'u.

²⁸ Soa indi sarun Ta'u iwala su lima Nebukadnezar ratun Babel suadio'a ringannu tantarane. I mangitou sarun mangaṛṛo soa indi,

²⁹ wuṛṛu manoṛṛobba na'oman sara masue suadio'a ringannu manga wal᷊en manga taumata ma'asabbangngu asasa'u-U, ana waugu su wowon atuppu manga wal᷊en udde i mangitou mannambunnu amania si Baal wuṛṛu mallal᷊innu ua'e anggore ipassubba manga monganna.

³⁰ Ro'en pinanattaṛṛannu watti'i mangitou, taumatan Israel wuṛṛu taumatan Yehuda buatte na'ola'a si Ya'u tawe mal᷊uassa. I mangitou mapasabbangngu asasa'u-U ringannu manga inolaanni mangitou apan dal᷊eo.

³¹ Ro'en soa indi niapararisikka, tumanangnge buatte na'ola'a si Ya'u mangke nasa'u atonna. I Ya'u buatte nakkawessa mamate si mangitou,

³² ana waugu al᷊awo'u al᷊al᷊eo apan niola'u taumatan Yehuda wuṛṛu Yerusalem suadio'u manga ratu, tembonannu pamarenta, imam, wuṛṛu manga nabi mangitou.

³³ I mangitou buatte nanantang-Ku salaiwe I Ya'u sidutu mangngenggenna si mangitou, i mangitou maddiri maddaringikka wuṛṛu mangimanna.

³⁴ Ewe'e lai wal᷊en apan niola'a hunan tampan patataṛṛamawuanna si Ya'u buatte niluhuranni mangitou ringannu pinangaddoannu manga paal᷊uanni mangitou apan maarantinna su tampa udde.

³⁵ I mangitou napararisikku manga mezbah hunam Baal su Wawal᷊annu Hinom, wuṛṛu nangonggollu manga ana'i mangitou si Dewa Molokh. Sumbal᷊i, i Ya'u taambe saran paassa nandolokki mangitou ma'ola'a inolaanna udde, ewe'e lai tawe nilumapputa sulal᷊ummu ṛingirang-Ku manungku i mangitou ma'ola'a inolaanna al᷊al᷊eone udde wuṛṛu naarosa taumatan Yehuda.”

Pa'aire apan mangngonggollu antimma

³⁶ Mawu, Ruatan Israel, nabbisara si ya'u, “Yeremia, walahannu Israel mabbisara manungku pangalo, ṛutumma, wuṛṛu al᷊aṛṛusa'itta sarun maaola'a soa indi manawo su liman datun Babel. Orassa indi paddaringikke apa apan Ta'u iwisara.

³⁷ I Ya'u sarun manggemonnu walahanna indi wuassu anambon banua sutampa i mangitou Ta'u nisal᷊iawukka ana waugu asasa'u-U wuṛṛu araṛṛagi-U si mangitou. I mangitou sarun Ta'u iapidda mapul᷊e watukku tampa indi wuṛṛu Ta'u iwala matana'a isindi ringannu matammudda.

³⁸ I mangitou sarun maola'a uma-U, wuṛṛu i Ya'u sarun maola'a Ruata mangitou.

³⁹ I Ya'u sarun mangonggolla si mangitou tumba'u sambau tuddan pabbiaṛṛanna: eteudde, mangaddatta si Ya'u sara mal᷊annu-l᷊annu; olangnge sarun mangapiddu apapia si mangitou sassane, wuṛṛu su papapulunni mangitou.

⁴⁰ I Ya'u sarun ma'ola'a paaire apan tawe pattaal᷊anne ringanni mangitou. I Ya'u tawe mangillol᷊o ma'ola'a apapia si mangitou. I Ya'u sarun ma'ola'a si mangitou matta'utta wuṛṛu maaddatta si Ya'u ringannu ahewallu naungnga tadea'u i mangitou tawe mangindau-U.

⁴¹ I Ya'u sarun mal᷊uassa ma'ola'a apapia si mangitou, wuṛṛu ma'ola'a si mangitou matatana'a su wanua indi saran mal᷊annu-l᷊annu.

⁴² Su ereapa i Ya'u buatte nandantan asasilaka su walahanna indi, aroddi lai Ya'u sarun mangonggollu sarangkanambone apan mapia apan buatte Ta'u pina'ire si mangitou.

⁴³ Taumata mabbisara manungku wanua indi naola'e ere wadda'u anne apan tawe atanaannu taumata wuṛṛu winatangnga, wuṛṛu manungku wanua indi nanawote su liman taumatan Babel. Arawe i Ya'u mabbisara manungku allo addantane manga wawail᷊annu sarun ipabbawalli apia su wanua indi;

⁴⁴ surattu pamamalline sarun teengannu, pia segelle, wuṛṛu tohasannu manga matatialane. Udde sarun mariaddi su wageangngu leta'i Benyamin, su manga ampungnga maranin Yerusalem, wuṛṛu su manga soan Yehuda, su manga soa su panenteanna, wuṛṛu su Yehuda samba'a timukka. Walahanna indi sarun Ta'u isul᷊e apia olangnge su wanua indi. I Ya'u, Mawu, buatte nabbisara.”