YEREMIA 30 - WUKE SUSI WATTI'U AL᷊AL᷊USASSA

Paaire Mawu su uman-Ne

¹ Mawu, Ruatan Israel,

² nabbisara si ya'u, “Woṛṛeta'e sulal᷊ummu sambau buke sarangkanambone apan buatte Ta'u niwisara si'o.

³ Ana waugu sarun a'omanna tempone i Ya'u manul᷊en ola'u pabbiaṛṛannu uma-U Israel wuṛṛu Yehuda. I Ya'u sarun mangapiddi mangitou mabbelengnga watukku wanua apan buatte Ta'u nionggolla su al᷊amona mangitou. Wanua udde sarun tahuananni mangitou apia. I Ya'u, Mawu, buatte nabbisara.”

⁴ Mawu nabbisara su umattu Israel wuṛṛu Yehuda,

⁵ “I Ya'u buatte naaringikka auaren taumata apan sussinggawanga, auaren taumata apan matta'utta apan tawe uatahuanna paddarame.

⁶ Ṛingira'o wuṛṛu tutuṛṛe'o! Wotongngewe esakka mangunsiwen ana'a? Amungkangngu aroddi, anio i Ya'u naasilo suapan esakka hatine namillossa wuṛṛu maṛṛaddannu tianne ringannu lima ere wawine apan mangunsiwete?

⁷ Allo ma'ata'utta nia'omante allo apan tawe sul᷊ungnge. Su uma-U udde allo apan maasinggawanga; arawe i Ya'u manal᷊amatta si mangitou.”

⁸ Mawu Apan Lembontaṛṛino nabbisara apia su uman-Ne, “Napawe nia'omante allo udde, pasanganna apan niandangnga su pal᷊u'anu sarun Ta'u paddianna, wuṛṛu aiinnu sarun Ta'u wu'anna. I yamiu sarun tawe maola'a allangngu taumata raho apia.

⁹ I yamiu sarun mattaṛṛamawu si Ya'u, Mawu Ruatanu, wuṛṛu su sangkatou papapulunni Daud apan sarun Ta'u itenega maola'a ratu.

¹⁰ Uma-U Israel, ariete pa'ata'utta! Allang-Ku Yakub, arie suminggawanga! I yamiu wuṛṛu papapulunnu sarun Ta'u iapaasal᷊amatta wuassu wanua marau, su tampa i yamiu niatawanna. I yamiu sarun mapul᷊e wuṛṛu matana'a su wanuanu ringannu mal᷊angnganna. I yamiu sarun mabbiakka ringannu matammudda; taweddu iata'utti yamiu.

¹¹ I Ya'u sarun dumanta wuṛṛu i yamiu Ta'u iapaasal᷊amatta. Manga walahanna, su tampa i yamiu Ta'u nisal᷊iawukka sarangkanambone sarun Ta'u pateanna, arawe i yamiu tawe Ta'u olaanna aroddi. Atonna i yamiu tawe maal᷊iu wuassu ṛuumanna arawe ṛuumang-Ku si yamiu udde matul᷊idda uasul᷊ungngu atoranna. I Ya'u, Mawu, buatte nabbisara.”

¹² Mawu nabbisara su uman-Ne: “Raddangngu tumaniten mawakkatta, su lessanu tawe undamme.

¹³ Tawe saran sangkatou apan umakkanna maddea'a apapianu, tawe undamma su manga hannenu, tate antimma si'o apan mapia.

¹⁴ Anambon hawenu arangnguannu naabul᷊inute; i mangitou maddirite maṛṛingiddu watangannu. Naal᷊ihidda seetta i Ya'u buatte namangalo wuṛṛu nakkuumanni yamiu ringannu maṛṛagissa, ana waugu tumanite manambo rosanu wuṛṛu wahewalla pasasal᷊anu.

¹⁵ Imbaṛṛangnga sumal᷊iomanna su ola'u manga lessanu, ana waugu i yamiu tawe antimma mapia. I yamiu Ta'u iṛṛuumanna aroddi ana waugu manambote rosanu wuṛṛu wahewalla pasasal᷊annu.

¹⁶ Arawe orassa indi sarangakanambone apan nangaluppa si'o sarun allupanna, wuṛṛu anambon seennu sarun ṛootanna su pamuanganna. I Ya'u sarun mangallanga iangana'a apan nangallanga si yamiu, i Ya'u sarun mangaṛṛo si sai apan nangaṛṛo si yamiu.

¹⁷ Salaiwe seennu mabbisara, ‘Sion buatte niramme, wuṛṛu tateddu lai manaile,’ arawe i yamiu sarun Ta'u olaanna sehatta apia, wuṛṛu manga lessanu sarun ta'u undamanna.”

¹⁸ Mawu nabbisara apia: “I yamiu, uma-U sarun Ta'u iakkanna wuṛṛu Ta'u isul᷊e olangnge su wanuanu sassane. Yerusalem sarun iapararisikka apia, wuṛṛu wal᷊en araratuanne apianna.

¹⁹ Tumanangnge sarun maddalo si Ya'u ringannu aantari, wuṛṛu u'ui ringannu al᷊al᷊uassa. I Ya'u na'ola'a si mangitou a'addatanna wuṛṛu tate al᷊uandahanna, wuṛṛu reenganni mangitou sidutu aatambanna.

²⁰ Walahannu sarun Ta'u olaanna tumelengnga ere dorone, wuṛṛu dumarisikka apia ere uma-U. Sarangkanambone apan nangallangnga sarun Ta'u iṛṛuumanna lai.

^21-22 Ratu apan mamarenta si yamiu inasapputanne wuassu walahannu. Ringannu tawe go'ane i tou sarun mangundani-U napawe i tou Ta'u waggoanna sumaruanna si Ya'u. Ana waugu isaite apan waṛṛani sumaruanna si Ya'u ringannu apulune sassane? I yamiu sarun maola'a uma-U wuṛṛu i Ya'u mabbal᷊i Ruatanu. I Ya'u, Mawu apan namasingkattu udde.”

^23-24 Asasa'u Mawu naal᷊ihidda tandi'a, naal᷊ihidda anginna ma'ikkatta apan mandi'uṛṛunga naṛṛia'a su manga taumata lal᷊eo, wuṛṛu tawe umompo'a tantal᷊anna anambon ṛiin-Ne matipussa. Su allo murine uman-Ne sarun maasunna olangnge udde.