YEREMIA 28 - WUKE SUSI WATTI'U AL᷊AL᷊USASSA

I Yeremia wuṛṛu Nabi Hananya

¹ Tonna udde lai su wul᷊anna al᷊imane tonna aiappanne i Ratu Zedekia uaparenta, Hananya ana'i Azur, sangkatou nabi wuassu soa Gibeon, nabbisara si ya'u su Wal᷊en Mawu. Su saruannu manga imam wuṛṛu tumana'u soa i tou nabbisara si ya'u

² manungku Mawu Apan Lembontaṛṛino, Ruatan Israel, nabbisara arendi, “Atatohassi ratun Babel buatte Ta'u niapaallome.

³ Sulal᷊ummu tempo rua tonna i Ya'u sarun mamelengngu manga saranapa wuassu Wal᷊e-U, apan buatte niṛṛootti Ratu Nebukadnezar watukku Babel.

⁴ I Ya'u lai sarun mangapidda apia i Yoyakhin ana'i Yoyakim ratun Yehuda suadio'a ringannu anambon tumana'u Yehuda apan buatte niapidda su Babel. Atonna, i Ya'u sarun mapaallomen atatohassu Babel. I Ya'u, Mawu, buatte nabbisara.”

⁵ Ne su saruannu manga imam wuṛṛu anambon tumana'u soa apan uarisikka su Wal᷊en Mawu udde, i ya'u nabbisara si Hananya,

⁶ “Mapia udde! Doronganna panani'annu udde sarun lumiatta'a, wuṛṛu Mawu atonna-tonna mangapidda apia wuassu Babel manga saranapan Bal᷊e Mawu suadio'a ringannu anambon taumata apan buatte niwuangnga poiaroddi.

⁷ Arawe i'o, Hananya, wuṛṛu i yamiu sarangkanambone, ei tumana'u soa, paddaringikke indi:

⁸ Manga nabi sutempo i ite taambe buatte namani'atta manungku pangalo, asasilaka, see al᷊aṛṛusa'itta sarun maṛṛia'a su anambon balahanna wuṛṛu araratuanna apan mangkatohassa.

⁹ Arawe nabi apan mammani'attu ola'u paddarame, tumba'u wotongnge a'uanna sangkatou nabi apan atonna-tonna nirolokku Mawu, amungkangngu manga pani'anne udde atonna.”

¹⁰ Wua'udde i Hananya nangaṛṛo pasanganna wuassu pal᷊u'a'u wuṛṛu nipaddine.

¹¹ Su saruannu anambon tumana'u soa apan nirumanta isudde, i tou nabbisara, “Mawu nabbisara manungku ete arendi olangnge i Tou sarun mamaddi pasanganna apan niandangngi Ratu Nebukadnezar su pal᷊u'an al᷊awo'u walahanna; Mawu sarun mapaamattu udde sulal᷊ummu rua tonna indi.” Wua'udde i ya'u napul᷊ete.

¹² Tawe nal᷊annu wuassu arariaddianna udde, i ya'u nirolokku Mawu

¹³ inai ringanni Hananya mabbisara arendi, “Mawu nabbisara manungku i'o wotongnge lai mamaddi pasanganna alu, arawe i Tou sarun mangganti udde ringannu pasanganna atta'a.

¹⁴ Mawu Apan Lembontaṛṛino, Ruatan Israel, nabbisara manungku i Tou sarun mangandangngu pasanganna atta'a su pal᷊u'an al᷊awo'u walahanna indi, wuṛṛu i mangitou sarun massuṛṛubbawa si Nebukadnezar, ratun Babel. Mawu lai nabbisara manungku winatangnga mal᷊aṛṛaga lai sarun itantilla su taṛṛino Nebukadnezar.”

¹⁵ Sarangkanambone udde ta'u niapasingkatta si Hananya, ana see i ya'u nabbisara apia, “Paddaringikka, ei Hananya! I'o tawe nirolokku Mawu; i'o buatte na'ola'a manga walahanna indi mangngimanna wisara awusu.

¹⁶ Ana waugu udde Mawu sassane nabbisara manungku i'o sarun iapawul᷊i wuassu runia. Tonna indi lai i'o sarun nate, ana waugu i'o buatte nandolokku walahanna indi lumawangnga Mawu.”

¹⁷ Ne tonna udde lai su wul᷊anna appitune, i Hananya nate.