YEREMIA 24 - WUKE SUSI WATTI'U AL᷊AL᷊USASSA

Rua so'anna wuan ara

¹ Su sambau tempo napawe i Yoyakhin ana'i Yoyakim ratun Yehuda suadio'a ringannu manga tembonannu pamarentan Yehuda, manga base wuṛṛu manga mammamanara apandeanne niapiddi Nebukadnezar ratun Babel, wuṛṛu niapidda naola'a niatawanna wuassu Yerusalem watukku Babel, Mawu nangonggollu sambau aellega si ya'u. I ya'u naasilo darua so'anna lal᷊oṛṛoannu wuan ara uaaddo su saruannu Wal᷊en Mawu.

² So'anna paarorone lal᷊oṛṛuannu wuan ara apan apianne, ere wuan ara wua paarorone, ewe'e so'anna aruane lal᷊oṛṛoannu wuan ara apan mawukku'e, na'oman sara tawe iaanna.

³ Wua'udde Mawu nabbisara si ya'u, “Yeremia, apate apan niellehannu?” I ya'u sinumimbakka, “Wuan ara, Mawu. Iapa mangkapia tumanite mapia, wuṛṛu iapa mawukku'a tumanite mawukku'a na'oman sara tawe iaanna.”

⁴ Ne Mawu nabbisara apia,

⁵ “Manga taumata apan buatte Ta'u niwala niapidda watukku Babel udde mawala si Ya'u ere wuan ara apan mangkapia indi; ana waugu udde i Ya'u, Mawu, Ruatan Israel, sarun mappadul᷊i si mangitou ringannu mapia.

⁶ I Ya'u sarun mallu'adda si mangitou wuṛṛu mangapiddi mangitou apia su wanua indi. I Ya'u sarun mapararisikka, tawe makka'an mangitou; i Ya'u sarun massuanna, wal᷊ine mangabbutta si mangitou.

⁷ I Ya'u sarun mangonggolla si mangitou apendamma ipassunna manungku ete i Ya'u Mawu. Ne i mangitou sarun maola'a uma-U, wuṛṛu i Ya'u mabbal᷊i Ruata mangitou, ana waugu i mangitou sarun mabbelengnga ringang-Ku ringannu ahewallu naungnga.

⁸ Arawe i Zedekia ratun Yehuda, suadio'a ringannu manga tembonanne apan maranin tou, wuṛṛu lamben taumatan Yerusalem apan sidutu uatana'a su wanuane indi ara'e nangingkatta watukku Mesir, i mangitou sarangkanambone sarun Ta'u olaanna ere wuan ara apan mangkawukku'a indi, apan tawe iaanna. I Ya'u, Mawu, buatte nabbisara.

⁹ I Ya'u sarun manilaka si mangitou aroddi olangnge na'oman sara al᷊awo'u walahanna su ahewallu runia mabbal᷊i mata'utta. Suapan tampa i mangitou Ta'u itantilla, i mangitou sarun al᷊uandahanna, maola'a ilallage wuṛṛu lallobbosanna. Aranni mangitou sarun ipaatta maola'a wawontoga.

¹⁰ I Ya'u sarun mandanta si mangitou pangalo, ṛutumma, wuṛṛu sa'itta ma'oman sara i mangitou sarangkanambone mate wuṛṛu taweddu matantangnga su wanua indi apan buatte Ta'u nionggolla si mangitou wuṛṛu al᷊amona mangitou.”