YEREMIA 23 - WUKE SUSI WATTI'U AL᷊AL᷊USASSA

Antimma sutempo addantane

^1-2 Mawu Ruatan Israel nabbisara, “Nasilakate i yamiu ei piaṛṛangnge apan mammate wuṛṛu mannal᷊iawukku uma-U! I yamiu ṛinone mappadul᷊i uma-U, arawe i yamiu tawe na'ola'a; i yamiu namalane uasal᷊arenga wuṛṛu tinumal᷊angnga. Orassa indi Ya'u sarun makkuumanni yamiu ana waugu al᷊al᷊eonu.

³ Arawe manga uma-U lambene sarun Ta'u iammulla wuassu manga wanua sutempan mangitou Ta'u niwuangnga. I mangitou sarun Ta'u iapidda mabbelengnga apia watukku leta'a niariaddianni mangitou wuṛṛu papapulunni mangitou sarun a'atambanna anambone.

⁴ I Ya'u sarun mamile piaṛṛangnge iapapaddul᷊i si mangitou. Uma-U tate mata'utta wuṛṛu lai suminggawangnga; tawe sarana sangkatou wuassi mangitou apan mawul᷊i. I Ya'u, Mawu, buatte nabbisara.”

⁵ Mawu nabbisara, “Sarun a'omanna tempone, i Ya'u sarun manenegu sangkatou ratu apan matul᷊idda wuassu papapulunni Daud. Ratu udde sarun mamarenta ringannu masiṛṛongnga, wuṛṛu mapaamattu atatul᷊idda wuṛṛu atonna su ahewallu wanua.

⁶ Napawe i tou mamarenta, taumatan Yehuda sarun masal᷊amatta, wuṛṛu taumatan Israel sarun mabbiakka ringannu mal᷊angnganna. Ratu udde sarun isaggo ‘Mawu Asasal᷊ammatti Ite’.

⁷ Sarun a'omanna tempone, taumata tate lai massalu ringannu arang-Ku, Ruata apan biakka, apan nangapiddu umattu Israel sinumabbangnga wuassu Mesir,

⁸ ewe'e ringannu arang-Ku, Ruata apan biakka, apan nangapiddu umattu Israel sinumabbangnga wuassu banua su sawannakka, wuṛṛu wuassu anambon wanua waine suapa i mangitou buatte Ta'u nisal᷊iawukka. I mangitou sarun matana'a su leta'a niariaddianne sassane.”

Tanatan Yeremia su ola'u manga nabi

⁹ Eteindi tanata'u su ola'u manga nabi: Naungku napussa'a wuṛṛu i ya'u mangngiladda. Mawu wuṛṛu wisara-Ne apan na'ukkassa naaola'a si ya'u ere taumata wu'anna apan tumanite manambo na'inumma anggore.

¹⁰ Wanuan kite napanen taumata apan mal᷊awangnga Mawu. I mangitou mabbiakka lal᷊eo wuṛṛu massal᷊a paattu taṛṛino mangitou. Ana waugu tatal᷊a Mawu, nannal᷊o su wadda'a nabbal᷊i mamara wuṛṛu ahewallu wanua lullal᷊o.

¹¹ Mawu nabbisara, “Nabi wuṛṛu imam maddiri tumuṛṛutta si Ya'u. Ewe'e lai su Wal᷊e-U i Ya'u buatte naasangkalla i mangitou ma'ola'a al᷊al᷊eo.

¹² Ana waugu udde, lal᷊anni mangitou sarun mal᷊ewakka wuṛṛu marandumma, na'oman sara i mangitou matara wuṛṛu mal᷊iundu'a. I Ya'u sarun mandantan asasilaka si mangitou, napawe nia'omante tempone makkuumanni mangitou. I Ya'u, Mawu, buatte nabbisara.

¹³ Rosa manga nabin Samaria suelen niasiloang-Ku. I Ya'u naasilote. I mangitou mabbisara ringannu aranni Baal, wuṛṛu mangngal᷊iwun Israel uma-U.

¹⁴ Arawe su Yerusalem i Ya'u naasilo manga nabi ma'ola'a lembon al᷊al᷊eoanne lai. I mangitou mammahia wuṛṛu sussandaga, see mannasa taumata apan ma'ola'a al᷊al᷊eo, na;oman sara taweddu sangkatou apan mawal᷊u. Si Ya'u i mangitou sarangkanambone lal᷊eo ere tumana'u Sodom wuṛṛu Gomora.”

¹⁵ Mawu Apan Lembontaṛṛino nabbisara, “Sarun Ta'u ionggolla su manga nabi su Yerusalem udde sasuanna mapetta iapaanna wuṛṛu pasangkadda iapa'inumma, ana waugu i mangitou buatte naaola'a taumata su ahewallu wanua tate mangaddatta si Ya'u.”

¹⁶ Su tumana'u Yerusalem, Mawu Apan Lembontaṛṛino nabbisara, “Imbaṛṛangnga maddaringikka wisara manga nabi apan sidutu tumba'u mangngonggollu antimma apan tawe loṛṛone. I mangitou tumba'u mammasingkattu wal᷊iawa mangitou sassane wuṛṛu wal᷊ine tanata-U.

¹⁷ Su manga taumata apan maddiri maddaringikka manga wisara-U, i mangitou sidutu mabbisara, ‘I yamiu sarun masal᷊amatta.’ Wuṛṛu suapan taumata apan maatikka puane i mangitou mabbisara, ‘I'o sarun tawe maasomba silaka.’ ”

¹⁸ I ya'u mabbisara, “Tawe saran sangkatou wuassu manga nabi udde maasingkattu apa apan uaraddo sulal᷊ummu naungngu Mawu. Taweddu wuassu wallatti mangitou buatte naaringikka ara'e ma'asunna manga ṛiin-Ne; taweddu lai apan maddaringikka ara'e mangaregga manga wisara-Ne.

¹⁹ Asasa'u Mawu naal᷊ihidda anginna wahewalla apan mannanggiudda wuṛṛu mannalla'u manga taumata apan dal᷊eo.

²⁰ Asasa'u-Ne tawe umompo'a tantal᷊anna sarangkanambone apan niṛṛiinne taambe niola'a. Su allo addantane umattu Mawu sarun maasunna olangnge udde ringannu matualaga.”

²¹ Mawu nabbisara, “Maṛṛimadda atonna manga nabi udde, sumbal᷊i i mangitou tawe Ta'u nirolokka. Ringannu arang-Ku i mangitou mabbatti'u watti'a, sumbal᷊i tawe tanata apan Ta'u nionggolla si mangitou.

²² Unnuwisara i mangitou masingkattu apa apan sulal᷊ummu ṛingirang-Ku, natantunna i mangitou buatte nabbatti'a su uma-U sarangkanambone apan buatte Ta'u niwisara. Ne uma-U sarun mawal᷊u wuassu manga rosa wuṛṛu pallal᷊agune apan dal᷊eo.

²³ I Ya'u Ruata apan uatana'a suapan tampa, wal᷊ine tumba'u su sambau tampa.

²⁴ Tawe saran sangkatou apan botongnge mamunin batanganne wuassu aelle-U, ana waugu i Ya'u isudde su anambon tampa: su surga wuṛṛu su runia.

²⁵ Sarangkanambone apan niwisara manga nabi udde i Ya'u masingkatte. Ringannu arang-Ku i mangitou mangngawusu manungku tanata-U buatte nisengkammi mangitou wuassu wal᷊iawa.

²⁶ Maddatingngu tingngera manga nabi udde mangngal᷊iwun uma-U ringannu watti'a a'olaanni mangitou sassane?

²⁷ I mangitou maṛṛingidda manungku ringannu manga wal᷊iawa apan iwabbatti'i mangitou udde, uma-U wotongnge maabul᷊i-U ere lai al᷊amona mangitou naabul᷊i-U wuṛṛu nassubba si Baal.

²⁸ Nabi apan nabbal᷊iawa ṛinone mabbisara, ‘Indi tumba'u wal᷊iawa.’ Arawae nabi apan naasomba tanata wuassia-U ṛinone mamasingkattu tanata udde ringannu atonna. Gandumma tawe iasul᷊ungngu laṛṛami.

²⁹ Wisara-U naal᷊ihidda putungnga, wuṛṛu ere darupa apan maaṛṛimunsa'a watu!

³⁰ I Ya'u sarun mando'appa manga nabi apan mammasingkattu tanata wuassu hawene, wua'udde mabbal᷊o manungku udde tanata wuassia-U.

³¹ I Ya'u lai mando'appa manga nabi apan mammasingkattu manga wisarane sassane, ana see mabbal᷊o manungku udde wuassia-U.

³² I Ya'u, Mawu, sarun mando'appa manga nabi apan mammasingkattu manga wal᷊iawane apan napenen awusu. I mangitou mangngal᷊iwun uma-U ringannu awusu wuṛṛu wawahia mangitou. I Ya'u tawe nandolokku manga nabi udde. I mangitou mangke tawe gunane su uma-U. I Ya'u, Mawu, buatte nabbisara.”

Winabbawa Mawu

³³ Mawu nabbisara, “Yeremia, amungkangngu pia sangkatou wuassu uma-U, ara'e sangkatou nabi ara'e imam maiwal᷊o si'o, ‘Apa tanatan Mawu?’ I'o ṛinone sumimbakka, ‘Ete i'o winabbawan Mawu; ana waugu udde i'o sarun iramme Mawu.’

³⁴ Amungkangngu pia sangkatou wuassu uma-U ara'e nabi ara'e imam ta'e lai mabbisara su ola'u ‘winabbawa Mawu’, ne i tou wuṛṛu amonanne sarun Ta'u iṛṛuumanna.

³⁵ Mawal᷊i'a, sauapan taumata ṛinone maiwal᷊o hawene wuṛṛu amonanne, ‘Apa sasimbakku Mawu?’ ara'e ‘Apa apan niwisara Mawu?’

³⁶ I mangitou tate wotongnge lai mappaattu wisara ‘winabbawa Mawu’. Amungkangngu ta'e piaddu mappaattu wisara udde, ne i Ya'u na'ola'a tanata-U atonna-tonna winabbawa si tou. Taumata apan mabbisara ‘winabbawa Mawu’ tumba'u mammal᷊elongngu wisara-U, Ruata mangitou, Ruata apan biakka, Mawu Apan Lembontaṛṛino.

³⁷ I mangitou tumba'u wotongnge mabbisara su manga nabi, ‘Apa sasimbakku Mawu si'o? Apa apan niwisara Mawu?’

³⁸ Amungkangngu piaddu tawe tumuṛṛutta parenta-Ku udde, wuṛṛu ta'e mappaattu ‘winabbawa Mawu’,

³⁹ ne i Ya'u sarun manggemonna si mangitou wuṛṛu ituntungnga mara-rau, mawae ete i mangitou aroddi lai soa apan buatte Ta'u nionggolla si mangitou wuṛṛu al᷊amona mangitou.

⁴⁰ I Ya'u sarun mamansili si mangitou wuṛṛu mallobbossa saran mal᷊annu-l᷊annu wuṛṛu nasippi mangitou udde tawe abbul᷊ianannu taumata.”