YEREMIA 2 - WUKE SUSI WATTI'U AL᷊AL᷊USASSA

Darangngu Mawu su Israel

¹ Mawu nandolo'u

² mangal᷊iatan batti'a indi su anambon taumata su Yerusalem, “Ei Israel, i Ya'u mannaungnga i'o aroddi asatiane sutempo i'o ta'e dario'a; aroddi ahewalle darangngunu sutempo i ite buatte naawingnga. Watukku wadda'u anne i Ya'u tatantalongannu u'amatta su wageangngu leta'a apan tawe nisuananna.

³ Israel, i'o pussa'a-U sassane, tatuno naung-Ku apan arangnguang-Ku. I Ya'u nangema'u asasilaka su al᷊awo'a apan na'ola'a si'o uatataṛṛangnga susa, i Ya'u, Mawu, buatte nabbisara.”

Rosan al᷊amonan walahannu Israel

⁴ Paddaringikke tanata Mawu, ei i yamiu pallaṛṛiten Yakub, manga walahannu Israel!

⁵ Mawu nabbisara, “Pasasal᷊a apate apan niasombangannu al᷊amonanu si Ya'u, na'oman sara i mangitou nandal᷊eo si Ya'u? I mangitou sidutu massubba paal᷊uanna apan tawe gunane wuṛṛu panginsueanne i mangitou sassane nabbal᷊i nahelo.

⁶ I Ya'u tate pandumanna; i Ya'u, apan buatte nangehetta si mangitou su lal᷊anna, wuṛṛu nangapiddi mangitou sinumabbangnga wuassu Mesir niumamattu wadda'u anne, wageangngu leta'a maṛṛasa apan manambo liobbongnge, see lai mamara wuṛṛu ma'asilaka – wadda'a apan taweddu uatana'a wuṛṛu tawe amatanna!

⁷ Watukku wanua apan masuwukka i Ya'u nanguntuddi mangitou tadea'u maatemma manga hessine wuṛṛu al᷊awo'a apan mapia poiaroddi. Arawe isudde leta-U nilal᷊eo mangitou wuṛṛu pussa'a-U niola'i mangitou maarantinna.

⁸ Manga imam taweddu maiwal᷊o suapa i Ya'u, Mawune. Manga mallaṛṛuungnga lai wagga isai Ya'u, manga tembonanne lai lullawangnga si Ya'u. Ringannu arannu Baal manga nabi mabbisara, wuṛṛu massubba paal᷊uanna apan tawe gunane.”

Aansillu Mawu su pabbawala-Ne

⁹ Mawu nabbisara, “Orassa indi pabbawala-U Ta'u ipaggatto apia, wuṛṛu papapulunne Ta'u parikisanna.

¹⁰ Sallete apannu Siprus samba'an waṛṛatta, pandolokken taumata su samba'an ra'i watukku wanua Kedar, pamarikisse poiaroddi ringannu ma'udduppa, apa buatte nariaddi sambau hatto apan uasul᷊ungnga?

¹¹ Taambe saran paassa nariaddi sambau walahanna nanu'addu mawune salaiwe udde wal᷊ine Ruata apan atonna. Arawe uma-U buatte nanal᷊iu-U, apan ma'aluassa si mangitou ringannu sambau saranapa apan tawe maaola'a apa-apa.

¹² Ana waugu udde, ei langitta, pangio'e! Atiangngate wuṛṛu pangngiladde!

¹³ Uma-U ma'ola'a rosa hatine darua: i mangitou tinumal᷊iudda si Ya'u, al᷊imatang kua'e apan mangngonggollu wiakku taumata; i mangitou nallanginna hunan batanganne tampang kua'e lassutta apan tawe maataṛṛangnga ua'ene.”

Pangillul᷊eannu lal᷊awangngu Israel

¹⁴ “Israel wal᷊ine allangnga, wal᷊ine lai papapulunnu manga allangnga. Arawe anio i tou nabbal᷊ite wiakku seenne?

¹⁵ Seenne mammiṛṛonganna ere singa, letangnge niola'a mamara wuṛṛu tawe loṛṛone, manga soane nasue nisoṛṛobbu putungnga, niwala aroddi tawe tumanangnge.

¹⁶ Ei Israel, uta'u puanu nipol᷊on taumatan Memfis wuṛṛu Tahpanhes.

¹⁷ I'o sassane apan namonse sarangkanambone apan nariaddi su watangannu, ana sutempo i'o Ta'u ni'ehetta su amatanna, i'o tinumal᷊iudda si Ya'u, Mawu Ruatanu.

¹⁸ Apa untungnge i'o mabbatukku Mesir? Inai ma'inumma ua'en Sal᷊ukku Nil? Apa untungnge i'o mabbatukku Asyur? Inai ma'inumma ua'en Sal᷊ukku Efrat?

¹⁹ Al᷊al᷊eonu sassane apan makkuumannu, i'o nasusa ana waugu nanol᷊a-U, Ruatanu. Orassa indi pamendampe aroddi apettane wuṛṛu aṛṛagene amungkangngu i Ya'u tal᷊i'urannu wuṛṛu tawe addatannu. I Ya'u, Mawu Ruatanu buatte nabbisara; Ete i Ya'u Mawu Ruata Apan Atanggaṛṛanne wuṛṛu Lembontaṛṛino.”

Israel maddiri massubba Mawu

²⁰ Mawu nabbisara, “Mal᷊annute i'o maddiri mattaṛṛamawu si Ya'u; maddiri tumuṛṛutta ara'e massubba si Ya'u. Su wowon suapan buidda apan matanggakka wuṛṛu su al᷊ungngu manga a'aluanna apan masindumunna i'o massubba manga mongannu asasuwukka.

²¹ I'o Ta'u nisuanna ere punnu anggore apan Ta'u nipile wuassu wualanna apan apianne. Arawe orassa indi i'o nawal᷊ute, naola'a sasuanna lul᷊u wuṛṛu tawe gunane.

²² Salaiwe i'o mandeno ringannu mamuṛṛa manambo atonna sabonna, arawe manga luhuddu pasasal᷊anu ta'e lai a'asiloang-Ku.

²³ Waṛṛani atonna i'o mabbisara manungku i'o tawe sal᷊ane, wuṛṛu manungku i'o tawe mallaṛṛenggenna si Baal! Pa'ellege pallal᷊agunu su wawal᷊anne, pannaungke al᷊al᷊eonu wuṛṛu panga'ute! I'o naal᷊ihidda unta inangnge apan mappulu mabbawatianna, tuttul᷊angnga uapapal᷊ele tawe tantunne,

²⁴ ana see sinumuṛṛite su wadda'u anne apan mal᷊annabba. I tou tawe ataṛṛanganna tantal᷊anna uawawatianna. Iapa maapulune salaiwe tate maddea'a, ana waugu sutempo mabbatianna i tou sidutu maipasilon batanganne.

²⁵ Israel, imbaṛṛangnga i'o tumal᷊angnga mangenggenna manga monganna, wuṛṛu imbaṛṛangnga mangintul᷊i mamaggo si mangitou, sal᷊immurine leddanu mal᷊essa wuṛṛu tonggol᷊annu mamara ana waugu marou. ‘Tawe, i ya'u tawe suṛṛinone maawelengnga,’ i'o mabbisara, ‘ana waugu i ya'u marangngu manga monganna, wuṛṛu mappulu tumantalongnga si mangitou.’ ”

Israel ṛinone iṛṛuumanna

²⁶ Mawu nabbisara, “Naal᷊ihidda taṛṛata'o naapendamma asasili sutempo niata'apanna, etearoddi lai i yamiu sarangkanambone sarun maapendamma asasili, ei taumatan Israel, manga ratu wuṛṛu manga tembonannu, manga imam wuṛṛu manga nabinu!

²⁷ I yamiu sarun pansilianna, ana waugu alu sampaddi waggoanni i yamiu iamangnga wuṛṛu watu sambau waggoanni yamiu inangnga. I yamiu wal᷊inewe rumanta ringang-Ku, ewe'e nanantang-Ku. Arawe napawe nirumanta asasusa, ete i Ya'u apan waggoanni yamiu tadea'u rumanta manal᷊amatta si yamiu.

²⁸ Suapate manga warahalanu apan niola'i yamiu udde? Napawe pia asasusa, doloṛṛa'e i mangitou manal᷊amatta si yamiu, amungkangngu i mangitou wotongnge! Ei Yehuda, manga mongannu anambone ere manga soanu!

²⁹ Apate si yamiu apan tawe mal᷊uassa si Ya'u na'oman sara i yamiu lumawangnga si Ya'u?

³⁰ Tawe gunane I yamiu Ta'u iṛṛuumanna, ana waugu i yamiu maddiri maddaringikka tataggu. Ere singa apan tantal᷊anna tuttambo, etearoddi lai i yamiu mamate manga nabinu.

³¹ Ei umattu Israel, paddaringikke manga wisara-U indi. Apa i Ya'u buatte na'ola'a Israel ere wadda'u anne su saruanni yamiu ara'e leta'a apan wasa tuudda? Arawe anio i yamiu mabbisara manungku i yamiu mappulu mapallossa, wuṛṛu maddirite mabelengnga ringang-Ku?

³² Apa pia maṛṛuala apan maabul᷊in lal᷊ogakke, ara'e ma'aawingnga wawine apan maabul᷊in laubbu awinge? Arawe i yamiu mal᷊annute atonna na'abul᷊i-U – ro'en sutempo apan tawe iareengnga al᷊annune.

³³ I yamiu pande atonna mangatokku a'alla ipamol᷊engnga naungngu manga arangnguannu. Wawine masandaga al᷊eoanne lai ta'e wotongnge mabbalajare wuassi'o!

³⁴ Laungngu pia luhuddu daṛṛan taumata asiangnga wuṛṛu taumata apan tawe sal᷊ane, wal᷊ine ana waugu daṛṛan manana'o apan niasametta. Arawe ana waugu udde,

³⁵ i yamiu mabbisara manungku i yamiu tawe sal᷊ane, manungku i Ya'u tate lai masa'u si yamiu. Arawe i Ya'u Mawu, sarun makkuumanni yamiu ana waugu i yamiu maddiri manga'u manungku i yamiu nassal᷊a.

³⁶ Mal᷊ihakka atonna i yamiu inai ringannu manga mongannu walahannu waine tadea'u maiontolla! I yamiu sarun iapasassillu taumata Mesir, ere lai i yamiu niapasassillu Asyur.

³⁷ I yamiu sarun manantangngu Mesir ringannu sasassilla wuṛṛu asasili. I Ya'u, Mawu, buatte nanol᷊a'i mangitou apan ia'asakki yamiu; i yamiu sarun tawe maasomba auntunganna apa-apa wuassi mangitou.”