YEREMIA 17 - WUKE SUSI WATTI'U AL᷊AL᷊USASSA

Rosa wuṛṛu ṛuumanna su Yehuda

¹ Mawu nabbisara, “Ei walahannu Yehuda, rosanu buatte ni'uitta su naungngu wuṛṛu su anambon pappi'uannu manga mezbahnu ringannu pena atta'a apan matane wuassu intanna.

² Manga taumatanu mattaṛṛamawu su manga mezbah wuṛṛu manga diṛṛin paal᷊uanna apan buatte nilanginna hunan Dewi Asyera su anambon aaluanna apan mapaṛṛampunga, su manga puiddu wuidda,

³ wuṛṛu su manga wowone su liuddu soa. Ana waugu anambon tampa pasasubbanna paal᷊uanna apan buatte nilanginni yamiu su ahewallu wanua wuṛṛu ana waugu al᷊awo'u rosa apan buatte niola'i yamiu, ne i Ya'u sarun ma'ola'a manga seennu mandootta al᷊awo'u darotongnga wuṛṛu pa'aalanu.

⁴ I yamiu sarun ipabbawata'a manantillu leta'a apan buatte Ta'u nionggolla si yamiu, wuṛṛu i Ya'u sarun ma'ola'a si yamiu mattaṛṛamawu su seennu su wanua apan mangke awaganannu. I Ya'u na'ola'a sarangkanambone udde ana waugu asasa'u-U sinumopate ere putungnga apan lukkenggamma tawe iapaddumma.”

Al᷊awo'u hatin al᷊aṛṛa'a

⁵ Mawu nabbisara, “Napawe taumata manantangku, Mawune, wuṛṛu uaantimma su taumata wuṛṛu uaasakku ara'e uawansaggu atatohanne, ne i Ya'u sarun makkuumanni tou.

⁶ I tou naal᷊ihidda sasuanna apan tinumuwo su wadda'a, su leta'a maṛṛasa, mal᷊annabba wuṛṛu mapakkadda, tawe saran paassa i tou naapendamma apapia.

⁷ Ara'e taumata apan uaantimma si Ya'u sidutu Ta'u al᷊amatanna.

⁸ I tou naal᷊ihidda aal᷊uanna su winggin sal᷊ukka apan mangngelekka; ṛamunne tinumundo naddatingngu ua'e. I tou tawe mata'uttu tempom paddissa, manga rongngane sidutu mangngelomma. Salaiwe wanua niaṛṛiaannu tandiawa, i tou tawe suminggawangnga ana waugu i tou sidutu mabbua.

⁹ Naungngu taumata tawe iaṛṛangngo, mappandeanna wuassu al᷊awo'a wuṛṛu tumaniten bahewalla raddangnge.

¹⁰ I Ya'u, Mawu, mannaṛṛassidda naungnga, naungngu taumata Ta'u i uji. Suapan taumata sarun Ta'u wal᷊isanna tumuṛṛuttu pallal᷊agune, wuṛṛu Ta'u olaanna uasul᷊ungngu inolaanne.”

¹¹ Naal᷊ihidda manu'u winalanganna ruddaṛṛin tallukka wal᷊ine talluke, etearoddi lai taumata apan wengkolla naasomba darotongnga. Su uukka saṛṛen tumuwo i tou sarun awul᷊iannu anambon darotongnge. Su panginsueannu pabbiaṛṛanne natialanna i tou taumata apan tumaniten boddo.

¹² Wal᷊en Mawu kite ere wal᷊en araratuanna apan mawantuga, su wowone apan matanggakka ro'en paarorone.

¹³ Mawu, ete I'o aantimannu Israel, uman-Nu; sarangkanambone apan nanantang-Ngu sarun masili. I mangitou sarun mawul᷊i wuassu runia indi wuṛṛu inaite watukku runian taumata nate. Ana waugu, I'o al᷊imatang kua'en pabbiaṛṛanna buatte nitantangngi mangitou, oh Mawu.

I Yeremia naiontolla su Mawu

¹⁴ Mawu, paapia'awe i ya'u, ne i ya'u sarun mabbal᷊i mapia. Sal᷊amata'awe i ya'u, ne i ya'u sarun masal᷊amatta. Tumba'u I'o apan wabbantuhangku!

¹⁵ Taumata mabbisara si ya'u, “Suapata anambon wawansagu Mawu udde? Wala'e orassa indi iapaamatta!”

¹⁶ Arawe, oh Mawu, taambe saran paassa i ya'u namata'a tadea'u I'o mandantan asasilaka si mangitou. I ya'u lai maddiri tadea'u i mangitou aṛṛiaannu asasusa. I'o masingkattu udde, Mawu. I'o masingkattu wisara'u.

¹⁷ Ariewe I'o maolaa maata'utta naungku. I'o tampan tatal᷊angangku sutempo rumanta asasusa.

¹⁸ Doronganna iapa mangngenggenna wuṛṛu mangngallangnga si ya'u, pansilian-Nu wuṛṛu penean-Nu ringannu atata'utta. Arawe ariewe ma'ola'a aroddi si ya'u, oh Mawu. Rantate asasilaka si mangitou ma'oman sara i mangitou masue mawinasa.

Allon Sabatta ṛinone addatanna

¹⁹ Mawu nabbisara si ya'u, “Yeremia, roote watukku Ngara Pasallangannu Tumana'u Soa apan a'amatannu manga ratun Yehuda napawe i mangitou sumabbangnga wuṛṛu sumutta su soa. Roote lai su anambon ngara pasallanganna waine su Yerusalem.

²⁰ Wal᷊oa'e tanata-U su manga ratu wuṛṛu su anambon taumatan Yehuda se su ahewallu tumana'u Yerusalem apan sumabbi su manga ngara udde.

²¹ Wal᷊oa'e arendi: ‘Amungkangngu i yamiu maddiri mate, ariete mamasanna saranapa su allon Sabatta, ara'e mangapidda sumabbi manga ngara pasallanganna su Yerusalem.

²² Arie mammanara ara'e mangapiddu sambau saranapa sumabbangnga wuassu wal᷊enu su allon Sabatta. Ṛaea'e allo udde si Ya'u ere buatte Ta'u niparenta su al᷊amonanu.

²³ Arawe al᷊amonanu maddiri maddaringikka ara'e mappandumma manga wisara-U. Naungngi mangitou maattikka, wuṛṛu maddiri tumuṛṛutta wuṛṛu tagguanna.

²⁴ Paatuṛṛutte anambon parenta-U. Arie mangapiddu sambau saranapa umamattu ngara pasallangannu soa indi su allon Sabatta. Ṛaea'e, allon Sabatta udde si Ya'u, wuṛṛu imbaṛṛangnga mammanara su allo udde.

²⁵ Amungkangngu i yamiu atonna-tonna mapaamattu manga parenta-U udde, ne manga ratu wuṛṛu manga tembonanne apan uaparenta ere i Daud sarun sumutta su manga ngara pasallanganna su soan Yerusalem. I mangitou suadio'a ringannu taumatan Yehuda wuṛṛu tumana'u Yerusalem, sarun suma'e keretan awal᷊o, ma'oman sara soa Yerusalem maola'a rame atonna.

²⁶ Manga taumata sarun rumanta wuassu manga soan Yehuda, wuṛṛu wuassu manga ampungnga maranin Yerusalem; i mangitou sarun dumanta wuassu wageangngu leta'i Benyamin, wuassu leta'u wawal᷊annu wuidda, wuassu wageangngu penenteanna, wuṛṛu wuassu Yehuda samba'a timukka. I mangitou sarun mangapidda watukku Wal᷊e-U manga winatangnga sasamba, mawae itattambunna aroddi lai tawe, see lai sasamba gandumma wuṛṛu amania see sasamba aadiangkamanna.

²⁷ Sarangkanambone udde sarun matipussa napawe i yamiu matuṛṛutta si Ya'u wuṛṛu maṛṛaen allon Sabatta udde si Ya'u. Arie mamasanna saran sambau saranapa umamattu ngara pasallangannu Yerusalem su allo udde. Amungkangngu i yamiu lumawangnga manga parenta-U, manga ngara pasallangannu Yerusalem see manga wal᷊en araratuanne sarun Ta'u soṛṛowannu putungnga ma'oman sara masue wuṛṛu udde tawe iapaddumma.’ ”