YEREMIA 14 - WUKE SUSI WATTI'U AL᷊AL᷊USASSA

Tempon tandiawa apan masaddatta

¹ Mawu nabbisara arendi si ya'u su ola'u tandiawa apan masaddatta,

² “Yehuda naungnge massusa manga soane maranite mate. Manga taumatane ual᷊allowangnga su leta'a wuṛṛu sussal᷊iomanna. Yerusalem mangngintul᷊i ma'iontolla.

³ Manga mangangimbe taumata ala nirolokka maddea'a ua'e su al᷊awo'u tampa; tate loṛṛone wensadda apan niapiddi mangitou apia. Ringannu u'al᷊iwu wuṛṛu tate antimma i mangitou massili wuṛṛu nallindumma hati.

⁴ Uranna tawe mangansalla wuṛṛu leta'a mamara-mara; mabbawailla mannaappa hati ana waugu tumaniten sinumassilla.

⁵ Nannal᷊o nasuete abbi, ana waugu udde inangngu rusa nassal᷊iute. Anangnge apan wakku nariaddi nitantangne su wadda'a mal᷊alangnga.

⁶ Su puiddu wowone keledai lul᷊u tumba'u uarisikka, matane lullobba ana waugu tate nannal᷊o; i tou uasal᷊arenga ere serigala.

⁷ Uma-U ma'ial᷊are, ‘Mawu, salaiwe rosan kami mammaṛṛansilla si yami arawe ontol᷊ewe i yami ere buatte nipa'ine-Nu. I yami buatte nanantang-Ngu masokka-sokka; atonna, i yami narosate su Mawu.

⁸ Ete I'o sassa pangantimannu Israel, apan manal᷊amatta si yami wuassu asasilaka. Arawe anio I'o ere Taumata raho su wanuang kami, ere uma'amatta apan tumba'u niumotongnga saṛṛabbi see manantangnga?

⁹ Anio I'o ere taumata apan niul᷊awune; ere pahlawanna apan tawe ma'ontolla? Arawe, natantunna I'o su pattangnganni yami, Mawu! I yami uman-Nu, ariewe i yami itantang-Ngu!’ ”

¹⁰ Su ola'u walahanna udde Mawu nabbisara, “I Ya'u tawe mal᷊uassa su manga taumata udde apan maapulu tumal᷊angngu watanganne wua dingang-Ku, wuṛṛu tawe maaatokku watanganne. I Ya'u tawe maabul᷊i pasasal᷊a mangitou, i Ya'u sarun makkuumanni mangitou ana waugu rosa mangitou.”

¹¹ Mawu nabbisara si ya'u, “Arie paddorongnga si Ya'u mantul᷊ungngu manga taumata udde.

¹² Salaiwe i mangitou mappuasa, i Ya'u maddirite maddaringikka sasal᷊ande mangitou ma'intolla; wuṛṛu salaiwe i mangitou mangonggolla si Ya'u sasamba itattambunna ara'e sasamba gandumma, i Ya'u tawe mal᷊uassa si mangitou. Arawe mawal᷊i'a, i Ya'u sarun mamate si mangitou ringannu pangalo, al᷊aṛṛutumma wuṛṛu al᷊aṛṛusa'itta.”

¹³ Ana see i ya'u nabbisara, “Oh Mawu Apan Atanggaṛṛanne, I'o masingkatta manga nabi buatte nabbisara su tumanangnge manungku tate pangalo ara'e al᷊aṛṛutumma, ana waugu I'o buatte naddiandi manungku wanua indi sidutu sulal᷊ummu paddarame.”

¹⁴ Arawe Mawu sinumimbakka, “Manga nabi udde mangapiddu watti'a awusu ringannu arang-Ku; i Ya'u tawe nandolokki mangitou, wuṛṛu tawe lai nangonggollu parenta ara'e naggahatto mangitou. Manga aellegga apan iwabbatti'i mangitou wal᷊ine wuassia-U; i mangitou maṛṛangngo manga inolaanna tawe gunane apan iaarangnga sassane.

¹⁵ I mangitou mabbisara sulal᷊ummu arang-Ku manungku wanua indi sarun tawe aṛṛiaannu pangalo ara'e al᷊aṛṛutumma, sumbal᷊i Ya'u tawe nandolokki mangitou mabbatti'u udde. I Ya'u, Mawu, namasingkatta si yamiu, Yeremia, apa apan sarun Ta'u olaanna ringannu manga nabi apan tawe Ta'u nirolokka udde. I Ya'u sarun mamate si mangitou ringannu pangalo wuṛṛu al᷊aṛṛutumma.

¹⁶ Manga taumata apan buatte nanengkamma manga pani'atti mangitou udde lai sarun Ta'u pateanna ringannu olangnge apan uasul᷊ungnga. Winal᷊unanni mangitou sarun iwareta su manga lal᷊anna su Yerusalem ringannu taweddu mallabbinga. Etearoddi nasippi mangitou wuṛṛu ana'a awingngi mangitou. I mangitou sarun Ta'u olaanna maapendamma pangillul᷊eannu al᷊al᷊eo mangitou.”

¹⁷ I ya'u nirolokku Mawu mamasingkattu asasusa'u su uman-Ne. I ya'u ṛinone mabbisara arendi, “Wala'ewe i ya'u lumuai tawe illol᷊one, allo ṛabbi mangngelekka allom mata. Ana waugu walahangku nal᷊essa wahewalla wuṛṛu tumaniten uatataṛṛangnga.

¹⁸ Napawe i ya'u inai watukku wadda'a, i ya'u naasilo manga winal᷊unanna sol᷊on pangalo. Sulal᷊ummu soa i ya'u naasilo asasusa, taumata mateten al᷊al᷊unussa. Nabi wuṛṛu imam mappaamattu manarane ringannu tawe apa apan a'olaanni mangitou.”

Umattu Israel maddorongnga tatal᷊antuppu Mawu

¹⁹ Mawu, apa Yehuda buatte nito'e-Nu atonna-tonna wuṛṛu tumana'u Sion iaarantin-Nu? Anio aroddi aikkanne I'o namuulla si yami na'oman sara i yami tate lai mapia? Tate gunane i yami maddea'a paddarame, tate gunane i yami mangngantimma aaul᷊en baddangnga, ana waugu nallambe ete tumba'u araṛṛagissa.

²⁰ Mawu, tumba'u su saruan-Nu i yami buatte na'ola'a rosa. I yami manga'u rosan kami sassane wuṛṛu rosan al᷊amonang kami.

²¹ Naungete paaire-Nu, ariewe i yami heloan-Nu; pa'aire-Nu si yami ariewe tawe maola'a. Yerusalem tampa bal᷊en araratuan-Nu apan mawantuga, ariewe heloan-Nu.

²² Manga mongannu manga walahanna tawe mapanossokku uranna su runia. Langitta lai tawe wotongnge manossokku uranna ringannu taṛṛinone sassane. Tumba'u ete I'o aantimanni yami. I'o na'ola'a sarangkanambone udde nariaddi.