YEREMIA 13 - WUKE SUSI WATTI'U AL᷊AL᷊USASSA

Nasa maautta wuassu lenan

¹ Mawu nandolo'u inai mangonggollu nasa maautta wuassu lenan wuṛṛu malluṛṛe, arawe i ya'u tawe wotongnge mangammone sulal᷊ummu ua'e.

² Ne i ya'u inaite namalli nasa maautta udde, wua'udde nalluṛṛe.

³ Wua'udde Mawu nabbisara apia si ya'u, wisara-Ne.

⁴ “Roote su Sal᷊ukku Efrat, wuṛṛu wunia'a nasa maautta udde su manga wa'an batu.”

⁵ Ne uasul᷊ungngu parenta Mawu, i ya'u inaite wuṛṛu namunin nasa maautta udde maranin Sal᷊ukku Efrat.

⁶ Manga pira tempo wua'udde Mawu nandolo'u watukku Sal᷊ukku Efrat manganu nasa maautta udde.

⁷ Ne i ya'u inaite, wuṛṛu napasabbangngu nasa maautta wuassu tampane pinamuniangku. Inauranna nasa udde naṛṛenesse, wuṛṛu mangke tate gunane lai.

⁸ Wua'udde Mawu nabbisara apia si ya'u, wisara-Ne,

⁹ “Etearoddi olangnge i Ya'u sarun ma'ola'a taumatan Yehuda wuṛṛu tumana'u Yerusalem. I Ya'u sarun makkimunsa'a awawunga mangitou apan nilumambalanna udde.

¹⁰ Walahanna apan dal᷊eo indi tumaniten maattikka wuṛṛu maddiri tumuṛṛutta si Ya'u. I mangitou mattaṛṛamawu wuṛṛu massubba manga mawu waine. Ana waugu udde i mangitou sarun maola'a ere nasa maautta apan tate gunane udde.

¹¹ Ere nasa maautta uawa'issa masaggadda su lawassu tatahuanne, aroddi lai pandumang-Ku tadea'u umattu Israel wuṛṛu Yehuda wawa'isanna masagadda ringang-Ku. Ringannu aroddi i mangitou mabbal᷊i uma-U apan ma'ola'a arang-Ku raddaloanna wuṛṛu a'addatanna. Arawe, i mangitou maddiri tumuṛṛutta si Ya'u.”

Wensaddu anggore

¹² Mawu Ruata nabbisara si ya'u, “Yeremia, wal᷊oa'e tanata-U su taumatan Israel manungku suapan wensadda tampan anggore ṛinone loṛṛoannu anggore ma'oman sara mapene. I mangitou sarun sumimbakka, ‘ṛatadde i yami wagga manungku suapan wensadda ṛinone loṛṛoannu anggore ma'oman sara mapene?’

¹³ Ne wal᷊oa'e si mangitou manungku manga taumatan wanua indi, manga ratune papapulunni Daud, manga imam, nabi, wuṛṛu anambon tumana'u Yerusalem sarun Ta'u loṛṛoannu anggore ma'oman sara mapene tadea'u iwu'anne.

¹⁴ Wua'udde i mangitou Ta'u ipatatenggoka sambau ringannu waine. Timmadde dario'a sarun Ta'u olaanne aroddi ringannu tawe ampungnge. I mangitou sarun Ta'u pateanna ringannu tawe apendamma u'akkanna ara'e tuttal᷊antuppa. I Ya'u, Mawu, buatte nabbisara.”

I Yeremia napanaungnga su ola'u awawunga

¹⁵ Umattu Israel, Mawu buatte nabbisara! arie pamunga, paddaringikka si Tou!

¹⁶ Mawu Ruatanu ṛinone wantuhannu tantal᷊anna i Tou taambe nandantan ararandumma, wuṛṛu leddanu matara su panenteanna, su taambe asasemakka apan aantimannu waluan-Ne mabbal᷊i wasatuudda.

¹⁷ Amungkangngu i'o tawe maddaringikka, i ya'u sarun lumuai tawe tingikke. Ringannu apendamma massusa ta'u luaianna awawunganu udde. Allo mata'u mangngelekka ana waugu umattu Mawu niapidda naola'a atawanna.

¹⁸ Mawu nabbisara si ya'u, “Doloṛṛa'a ratu wuṛṛu wo'i lumintukka wuassu adderan araratuanna, ana waugu makotane apan maṛṛansanga nanawite wuassu puane.

¹⁹ Manga soan Yehuda su wageangngu timukka tantal᷊anna tatalliwunanna udde, wuṛṛu taweddu maal᷊assanga wuassu tatalliwunna. Anambon taumatan Yehuda buatte niapidda su pamamamuanganna.”

²⁰ Mawu nabbisara su tumana'u Yerusalem, “Panutukke! Manga seennu tantal᷊anna ruddanta wuassu sawannakka! Suapate manga taumata apan ṛinone lindumanni yamiu wuṛṛu apan ipammungang kamiu udde.

²¹ Apa apan sarun iwisarang kamiu amungkangngu manga taumata apan haggaweanni yamiu namaddo wuṛṛu uataṛṛino si yamiu? I yamiu sarun maapendamma hiadda ere wawine apan tantal᷊anna mangngunsiwe.

²² Asinungka i yamiu maiwal᷊o anio sarangkanambone udde naṛṛia'a su watangannu, anio laungngu nihesa'a wuṛṛu i yamiu niṛṛampassa. Ṛinone i yamiu masingkatta manungku udde nariaddi ana waugu rosanu tumaniten bahewalla.

²³ Wotongnge taumata maitumma mamal᷊u kaluren pisine, ara'e harimau mamul᷊in woṛṛentenge? Udde tawe mariaddi! Aroddi lai i yamiu apan ninumarampe ma'ola'a al᷊al᷊eo tawe mariaddi ma'ola'a apapia.

²⁴ I Ya'u sarun manongkakki yamiu ere wal᷊a'a apan nitiuppu anginna wuassu wadda'u anne.

²⁵ Uddewe ola'u pabbiaṛṛannu apan buatte Ta'u nitantunna ana waugu i yamiu naabul᷊i-U, wuṛṛu nangimante su manga mawu awusu.

²⁶ I Ya'u sassane sarun manggesa'a laubba wuassu waddangngu tadea'u i yamiu matantol᷊e wuṛṛu masili.

²⁷ I Ya'u buatte naasilo si yamiu ma'ola'a manga apa apan iaaranting-Ku. I Ya'u naasilote si yamiu mangngenggenna manga nawu waine su wuidda wuṛṛu su wawail᷊anna, ere sangkatou esakka mabbewan awingngu taumata waine ara'e ere awal᷊o esakka mabbewan awal᷊o wawine. Tumana'u Yerusalem, nasilakate i yamiu! Tingngera i yamiu mapallossa wuassu al᷊al᷊eo?”