YEREMIA 10 - WUKE SUSI WATTI'U AL᷊AL᷊USASSA

Pasasubba paal᷊uanna

¹ Umattu Israel, paddaringikke tanata Mawu si yamiu.

² I tou nabbisara, “Arie mallaṛṛenggenna inanaramannu manga walahanna waine, wuṛṛu arie pa'ata'utta maasilo manga tiala su langitta apan ia'atauttu manga walahanna udde.

³ Addatta inanaramannu manga walahanna udde atonna-tonna tawe gunane. I mangitou mannuwangnga alu su mahurangnge, wuṛṛu mandolokku manga wasen kalu nirolokka niapamanara mallanginnu paal᷊uanna sassubbanna.

⁴ Wua'udde paal᷊uanna sassubbanna udde niloggaṛṛannu wul᷊awanna wuṛṛu sal᷊a'a, ana see nitohassu pa'u ana see tawe manawo.

⁵ Manga paal᷊uanna sassubbanna udde naal᷊ihidda saṛṛen taumata su waillu katimu. I mangitou tawe maawisara, wuṛṛu tawe maal᷊empangnga, wuṛṛu ṛinone a'bengketanna. Arie mata'utti mangitou, ana waugu i mangitou tawe ma'ola'a al᷊al᷊eo si yamiu; ma'ola'a apapia lai i mangitou tawe maaola'a.”

Patataṛṛamawu su Mawu

⁶ Mawu apan mawantuga, I'o mangke tawe sul᷊ungngu, aran-Nu mawantuga wuṛṛu napenen taṛṛino.

⁷ Isai apan maddiri mangimanna Si'o, ratun al᷊awo'u walahanna? Atonna, I'o ṛinone a'addatanna. Wuassu anambon apan pande suwallattu manga walahanna wuṛṛu wuassu anambon manga ratu mangitou, tawe saran sangkatou apan botongne isul᷊ungnga ringannu watangan-Nu, oh Mawu.

⁸ Longonna wuṛṛu woddo mangitou sarangkanambone ana waugu mongannu tumba'u alu sangkabuwu, tawe maapangaṛṛa'a apa apan pia gunane.

⁹ I tou nioossu sal᷊a'a wuṛṛu wul᷊awanna apan niapidda wuassu Spanyol wuṛṛu soa Ufas, sarangkanambone lanna'u lima manga senimanna wuṛṛu mapapanden bul᷊awanna. Laungnge wuassu mal᷊aṛṛenessa ungu tua wuṛṛu ungu mudda, niraddu'u manga masingkatta mandaddu'a ringannu maaddunna.

¹⁰ Arawe I'o, Mawu, Ruata apan naṛṛino, Ruata mangangonggllu wiakka, ratu sarangkal᷊o'enge. Amungkangngu I'o masa'u, runia umio'a, amungkangngu I'o mamansagga manga walahanna tawe maataṛṛanga. (

¹¹ I yamiu, ei umatta, ṛinone mamasingkatta si mangitou mangungku manga monganna apan tawe nandiaddi langitta wuṛṛu runia udde sarun ṛimunsaanna. I mangitou sarun mawul᷊i wuassu wowon dunia.)

Antari daralo su Ruata

¹² Mawu apan nandiaddi runia ringannu taṛṛino-Ne, na'ola'a runia ringannu asingkan-Ne, wuṛṛu namilattu langitta ringannu apapia-Ne.

¹³ Tumba'u ringannu mangonggollu parenta, mannuntingikke ua'e su langitta. Wuassu manga pentakku runia niaparanta-Ne winabbawa, wuṛṛu niolang-Nge sawallu ma'ilatta sulal᷊ummu uranna, see lai niapasabbang-Nge anginna wuassu pananahipunan-Ne.

¹⁴ Naasilo sarangkanambone udde taumata naatutukke, manungku i tou woddo wuṛṛu tawe pasasunna. Manga basen wul᷊awanna niawul᷊iannu hatine, ana waugu paal᷊uanna sassubbanna lanna'u limane udde awusu wuṛṛu tawe sasangngone.

¹⁵ Manga paal᷊uanna udde tawe aregane, ṛinone a'al᷊uandahanna wuṛṛu lobbosanna. Napawe nia'omante tempone i mangitou sarun mate.

¹⁶ Ruatan Yakub wal᷊ine ere manga paal᷊uanna udde; i Tou mandariaddi al᷊awo'a. Aran-Ne eteudde Mawu Apan Lembontaṛṛino; i Tou buatte namile Israel maola'a uman-Ne.

Atata'utta sinumapputta sulal᷊ummu wanua

¹⁷ Tumana'u Yerusalem, i yamiu tatalliwunante! Ana waugu udde, pandiahite!

¹⁸ Paassa indi Mawu sarun manuntungngu anambon walahannu Yehuda su pamamuanganna; i yamiu sarangkanambone sarun ṛimunsaan-Ne sara masue. Eteudde tanata wuassu Mawu.

¹⁹ Tumana'u Yerusalem mangngintul᷊i, “I yami nal᷊essa wahewalla wuṛṛu tate mapia. Dorone i yami massunna manungku asasusa indi wotongnge i yami maapasanna, wutte'e tawe.

²⁰ Rasanni yami nahohakka, manga tal᷊ine nabassutta abbi. Tateddu lai apan botongnge mapararisikku rasanna wuṛṛu mangele manga mal᷊aṛṛenenge, ana waugu al᷊aṛṛana'a inaite aroddi.”

²¹ I ya'u sinumimbakka, “Woddo manga piaṛṛa'i ite udde. I mangitou tawe maddorongnga tatantiro wuassu Mawu, ana waugu udde i mangitou naauntungnga wuṛṛu i ite nassal᷊iawu su anambon tampa.

²² Paddaringikke! Pia batti'a manungku sambau walahanna su sawannakka nanattakku paggahahio. Tantarane sarun ma'ola'a manga soan Yehuda mabbal᷊i mal᷊annabba wuṛṛu tawe taumatane. Manga asun ahuranganna sarun ma'imbuni poiaroddi.”

²³ Mawu, i ya'u masingkatta tawe saran sangkatou apan maataṛṛino manantunnu nasimme ara'e mangul᷊inna lal᷊annu pabbiaṛṛanne.

²⁴ Puulle i yami oh Mawu, ariewe ringannu papuulla apan tumaniten maataddu'a. Ariewe lai makkuumanni yami napawe I'o nasa'ute, ana waugu i yami sarun mate abbi.

²⁵ Sabbanga'e asasa'u-Nu su manga walahanna apan tawe manga'u Si'o wuṛṛu apan tawe mattaṛṛamawu Si'o. Ana waugu i mangitou buatte namate uman-Nu sara nasue wuṛṛu nanggohakku wanuang kami.