YEREMIA 1 - WUKE SUSI WATTI'U AL᷊AL᷊USASSA

¹ Buke indi lal᷊oṛṛoannu manga wisaran Yeremia ana'i Hilkia, sangkatou imam wuassu soa Anatot su wageangngu leta'i Benyamin.

² Mawu nabbisara si Yeremia tonna mapul᷊o tallu sutempo i Yosia ana'i Amon ratun Yehuda uaparenta.

³ Wua'udde Mawu nabbisara si tou apia ringannu masokka-sokka, manattakka wuassu i Yoyakim ana'i Yosia uaparenta naddatingngu tonna mapul᷊oassa i Zedekia ana'i Yosia uaparenta. Su wul᷊anna al᷊imane tonna udde lai tumana'u Yerusalem niṛṛuwo watukku pamamuanganna.

Bawaggo si Yeremia

⁴ Mawu nabbisara si ya'u,

⁵ “Tantal᷊anna i Ya'u taambe nadiandi si'o sulal᷊ummu piolon inangngu, wuṛṛu tantal᷊anna i'o taambe nasungkangnga, i Ya'u buatte namile wuṛṛu maneneggu maola'a nabi su manga walahanna.”

⁶ I ya'u sinumimbakka, “Ore Mawu Apan Atanggaṛṛanne, i ya'u ta'e wagga mabbisara ana waugu i ya'u ta'e dario'a.”

⁷ Arawe Mawu sinumimbakka, “Arie pabbisara manungku i'o ta'e dario'a. Amungkangngu i Ya'u mandolokku inai ringanni sai-sai, i'o ṛinone inai, wuṛṛu sarangkanambone apan Ta'u nirolokka udde iwal᷊onu, ṛinone iapasingkannu si mangitou.

⁸ Arie paata'utti mangitou, ana waugu i Ya'u sarun maṛṛundinganna si'o tadea'u mallu'adda si'o. Ya'u, Mawu, buatte nabbisara!”

⁹ Wua'udde Mawu nangul᷊ukku lima-Ne, wuṛṛu namita moṛṛongku see nabbisara, “Paddaringikke wuṛṛu al᷊iata'e manga wisara apan Ta'u niapasingkatta indi.

¹⁰ Allo indi i Ya'u mangonggolla si'o taṛṛino su manga walahanna wuṛṛu manga araratuanna – taṛṛino ipanuwangnga wuṛṛu ipangema'a, tadea'u ipamaddo wuṛṛu ipamate, iapararisikka wuṛṛu ipassuanna.”

Darua aellega

¹¹ Mawu nabbisara si ya'u, “Apate niasiloannu, Yeremia?” I ya'u sinumimbakka, “Rannu alu badam, Mawu.”

¹² “Atonna,” Unnu Mawu, “I Ya'u mattaṛṛapa tadea'u sarangkanambone apan niwisara-U sarun matipussa.”

¹³ Wua'udde Mawu naiwal᷊o si ya'u apia, “Apate lai apan niasiloannu?” I ya'u sinumimbakka, “Su samba'a sawannakka i ya'u naasilo urinna apan lal᷊oṛṛone tantal᷊anna huggogokka wuṛṛu ereola'u mabbosote inawarendi.”

¹⁴ Mawu nabbisara, “Wuassu samba'an sawannakka asasilaka sarun lumapputta wuṛṛu maṛṛia'a su anambon tumana'u wanua indi.

¹⁵ I Ya'u sarun mandolokku anambon walahanna su samba'an sawannakka rumanta mangaṛṛo Yerusalem. Manga darandungnga apan uapal᷊iwutta soa indi see lai manga ngaran pasallangannu wahewalla wuṛṛu anambon soa su Yehuda sarun aṛṛoanni mangitou.

¹⁶ I Ya'u sarun makkuumannu uma-U, ana waugu i mangitou na'ola'a rosa wuṛṛu tinumal᷊iudda si Ya'u. I mangitou buatte nangonggollu manga sasamba su manga mawu waine, wuṛṛu nallanginnu manga paal᷊uanna lapiddu massubba si tou.

¹⁷ Pandiahite, Yeremia! Roote wuṛṛu pasingkata'a si mangitou, sarangkanambone apan Ta'u nirolokka si'o. Arie mata'utti mangitou, tadea'u i'o tawe Ta'u olaanna lembon matta'utta lai sumaruanna si mangitou.

^18-19 Paddaringikka! I'o sarun tompol᷊annu manga tumana'u wanua indi, eteudde manga ratun Yehuda, manga mangangumbele parenta, manga imam, wuṛṛu tumanangnge. Arawe allo indi Ya'u mangonggolla si'o atatohassa ipando'appa si mangitou. I'o sarun mabbal᷊i ere soa pia tanda batune, naal᷊ihidda diṛṛi atta'a wuṛṛu darandungnga witu'a. I mangitou sarun tawe mapamaddonu, ana waugu i Ya'u sarun uarundinganna wuṛṛu ual᷊u'adda si'o. I Ya'u, Mawu, buatte nabbisara.”