YEHEZKIEL 7 - WUKE SUSI WATTI'U AL᷊AL᷊USASSA

Ahahohakku Israel maranite

¹ Mawu nabbisara si ya'u,

² “Ei taumata apan mattate, i Ya'u, Mawu Apan Atanggaṛṛanne, ṛinone mamasingkattu wisara indi su Israel: Ete indi pangudusannu watti'u ahewallu wanua indi!”

³ Mawu nabbisara, “Ei Israel, orassa indi nia'omante pangudusannu. I'o sarun maapendamma asasa'u-U. I'o Ta'u iṛṛuumanna uasul᷊ungngu inolaannu apan dal᷊eo.

⁴ I Ya'u tawe umakkannu ara'e mangonggollu ampungnga si'o. I Ya'u sarun makkuumannu uasul᷊ungngu al᷊awo'u inolaanna maasili apan buatte niolangngu. Ne i'o masingkatte manungku ete i I Ya'u Mawu.”

⁵ Ete indi apan niwal᷊on Mawu Apan Atanggaṛṛanne su walahannu Israel, “Asasisalaka sansunannu asasilaka sarun maṛṛia'a si yamiu.

⁶ Orassa indi sarangkanambone nuddusse. Ete indi panginsueannu. Tate antimma lai si yamiu.

⁷ Sarangkanambone nuddusse si yamiu, ei walahanna apan uatana'a su leta'a indi. Orassa indi tate lai manga andeangnga su manga mezbah su panenteanna, nallambe tumba'u pabbawawul᷊o.

⁸ Tate mal᷊annu lai i yamiu sarun mamendamma asasa'u-U apan bahewalla. I yamiu Ta'u iṛṛuumanna uasul᷊ungngu inolaannu. Sarun Ta'u wal᷊isanna si'o al᷊awo'u inolaannu apan maarantinna.

⁹ I Ya'u tawe umakkanna ara'e mangonggollu ampungnga si'o. I Ya'u sarun makkuumanni yamiu uasul᷊ungngu al᷊awo'u al᷊al᷊eo apan buatte niola'i yamiu. Ne i yamiu masingkatte manungku ete i Ya'u Mawu wuṛṛu ete i Ya'u apan makkuumanni yamiu.”

¹⁰ Allon asasilaka su walahannu Israel nia'omante. Lal᷊aṛṛaga aatambanna. Awawunga ete nipangillembo.

¹¹ Araṛṛagissa pangillul᷊eanne mannamba al᷊al᷊eo. Anambon paa'ala, awawantuga wuṛṛu atatelengngi mangitou sarun masue tawe lannangnge.

¹² Tempone mal᷊ihakke rumanta, allone maranite! Mamamalli wuṛṛu mabbawal᷊u'a tawe naasomba auntunganne apa-apa, ana waugu ṛuumannu Ruata maṛṛia su anambon taumata.

¹³ Tawe mabbawal᷊u'a apan sarun maasomba apia saranapa apan buatte niwal᷊ungnge ana waugu asasa'un Duata sarun maṛṛia'a suapan taumata. Taumata apan dal᷊eo tawe masal᷊amatta.

¹⁴ Trompetta nanuntingikka wuṛṛu anambon taumata uariahite. Arawe tawe saran sangkatou inai su tampan papangaloanna, ana waugu asasa'un Duata naṛṛia su anambon taumata.

Ṛuumanna ana waugu manga rosan Israel

¹⁵ Su manga lal᷊annu soa pia pangalo, su manga wal᷊en pia ṛiwutta wuṛṛu al᷊al᷊unussa. Suapan taumata apan su liuddu soa sarun mate sulal᷊ummu pangalo, wuṛṛu isai uatana'a su soa sarun naten radda'a wuṛṛu lunussa.

¹⁶ Sambageanganna sarum maralukka wuṛṛu tumal᷊angngu watanganne su panenteanna. Isudde i mangitou sarun maola'a ere manu'a merpati apan lallimbuaṛṛanna wuassu manga wawal᷊anne; sarangkanambone sarun sumal᷊iomanna ana waugu manga rosa mangitou.

¹⁷ Suapan taumata sarun mallome limane wuṛṛu lumongkokka wuune.

¹⁸ I mangitou sarun malluṛṛen nasa karongnga wuṛṛu ahewallu wadangnge sarun mangiladda. Pua mangitou sarun lungguṛṛanna wuṛṛu i mangitou sarun pansilianna.

¹⁹ Wul᷊awanna wuṛṛu sal᷊a'a sarun iramme i mangitou su manga lal᷊anna naal᷊ihidda sapadda, ana waugu su allo Mawu mapasabbangu asasa'u-Ne, wul᷊awanna wuṛṛu sal᷊a'a udde tawe mapanal᷊amatta si mangitou, ewe'e lai mamontolli mangitou sulal᷊ummu rosa. I mangitou tawe mapappaatta ipalluassa ara'e ipalloṛṛo tianni mangitou.

²⁰ Dorone i mangitou lulluassu permata apan maṛṛamaga, arawe ana waugu i mangitou mapaatta ipa'ola'a manga paal᷊uanna apan maarantinna, Mawu na'ola'a darotongngi mangitou udde nabbal᷊i sambau apan maata'utta.

²¹ Mawu nabbisara su walahannu Israel, “I ya'u sarun mamala manga taumata raho manga darotongngi yamiu. Manga taumata lal᷊eo sarun mangaṛṛo pa'aalanu wuṛṛu lal᷊eoanna.

²² I Ya'u tawe mangambangnga napawe Wal᷊e-U nihohakka wuṛṛu niluhurannu manga mangangaṛṛo udde.

²³ Ahewallu wanua nabbal᷊i nassongkakka; suapan tampa pia pamamate wuṛṛu araṛṛagissa.

²⁴ Manga walahanna apan aṛṛagisanne sarun Ta'u iaparanta iapaatana'a su manga wal᷊enu. Manga taumata awaṛṛanianne apan atohasanne sarun mangindo napawe manga walahanna udde Ta'u iwala manggohakka manga tampa patataṛṛamawuannu.

²⁵ I mangitou naṛṛiaannu asasusa wuṛṛu niawul᷊iannu antimma, ana see maddea'a paddarame, arawe i mangitou tawe naasangkalla.

²⁶ Asasilaka wuṛṛu watti'a lal᷊eo sidutu sarun rumanta. I yamiu sarun sumal᷊ande tadea'u manga nabi mappulu mamani'atta, arawe i mangitou tawe maaola'a. See lai manga imam tawe dapa iaṛṛa'a su umatta, manga piaṛṛa'a niasueannu tatantiro.

²⁷ Ratu sarun lumuai, parisin datu massusate wuṛṛu tumana'u soa mangngindon atata'utta. I Ya'u sarun makkuumanni yamiu uasul᷊ungngu al᷊awo'u inolaannu wuṛṛu makkuungngi yamiu ere lai i yamiu makkuungnga taumata waine. Ne i yamiu masingkatte manungku ete i Ya'u Mawu.”