YEHEZKIEL 5 - WUKE SUSI WATTI'U AL᷊AL᷊USASSA

I Yehezkiel namol᷊o utangnge

¹ Mawu nabbisara, “Ei taumata apan mattate, panganute hal᷊ele apan maṛṛoro wuṛṛu paata'e udde pamol᷊oa'a omengngu wuṛṛu utangngu. Wua'udde timbanga'e uta'a udde su tatimbanganna wua'udde tahia maola'a tatallung kawageanganna.

² Sepertatallu ṛinone tutungannu su pattangngannu soa udde napawe pallal᷊iwunna udde nasuete. Sepertatallu lai ṛinone pototannu hal᷊elenu lapiddu mamal᷊iwutta soa udde. Wuṛṛu sepertatallu panginsueanne ṛinone i'o manal᷊iawukka su winalanganna, ana see i Ya'u mangenggenna ringannu hal᷊ele-U.

³ Tantanga'e addio'a wuassu utangngu udde wuṛṛu pi'unte sulal᷊ummu pallapuannu jubanu.

⁴ Wua'udde panganu addio'a lai wuassu uta'a udde, tuntunga'a sulal᷊ummu putungnga wuṛṛu wala'e i tou matutungnga. Wua isudde putungnga sarun lumewa watukku ahewallu walahannu Israel.”

⁵ Mawu Apan Atanggaṛṛanne nabbisara, “Pa'ellega, eteindi Yerusalem. Soa indi Ta'u niaddo su pusiddu runia, ringannu manga araratuanna waine uapal᷊iwutta si tou.

⁶ Arawe Yerusalem buatte nanol᷊a'u parenta-U wuṛṛu inauranna maddal᷊eoanna wuassu manga araratuanna apan uapal᷊iwutta si tou. Yerusalem nilumawangnga manga parenta-U wuṛṛu maddiri tumuṛṛutta manga tita-U.”

⁷ Mawu Apan Atanggaṛṛanne nabbisara, “Ei Yerusalem, paddaringikka! I'o tawe tinumuṛṛutta manga parenta-U wuṛṛu manga tita-U; i'o lembon mal᷊awangnga wuassu manga walahanna apan uapal᷊iwutta si'o, wuṛṛu nangaṛṛusse addattu manga walahanna udde.

⁸ Ne i Ya'u, Mawu Apan Atanggaṛṛanne, mamasingkatta manungku i Ya'u uddewe seennu. I'o sarun Ta'u iṛṛuumanna su saruannu manga walahanna waine.

⁹ Ana waugu anambon pallal᷊agu apan Ta'u iaarantinna, tumanangngu sarun Ta'u iṛṛuumanna masaddatta ere taambe Ta'u niola'a wuṛṛu tate Ta'u olaanna apia.

¹⁰ Timmadde sarun uminassa anangnge sassane wuṛṛu ana'a sarun uminassa hagurangnge. Etearoddi i mangitou sarun Ta'u iṛṛuumanna, wuṛṛu iapa ta'e wiakka Ta'u isal᷊iawukka su al᷊awo'u tampa.

¹¹ I Ya'u uddewe Ruata apan biakka, Mawu Apan Atanggaṛṛanne, wuṛṛu indiwe wisara-U: Ana waugu i'o buatte nandal᷊eo Wal᷊e-U ringannu al᷊awo'u inolaannu apan dal᷊eo wuṛṛu maarantinna, i Ya'u sarun makkimunsa'a si'o ringannu tawe ampunge.

¹² Sepertatallu wuassu lal᷊oṛṛon soanu sarun mate ana waugu ṛiwutta see al᷊aṛṛutumma apan maṛṛia'a su soa. Sepertatallu sarun pototannu hal᷊ele su liuddu soa, wuṛṛu sepertatallu lai sarun Ta'u ital᷊eṛṛonga su al᷊awo'u tampa wuṛṛu sarun Ta'u enggenannu hal᷊ele.

¹³ I'o sarun maapendamma asadattu asasa'u wuṛṛu al᷊al᷊eo naung-Ku ma'oman sara i Ya'u mul᷊ete. Napawe sarangkanambone udde nariaddite, i'o sarun mangimanna atonna manungku i Ya'u, Mawu, buatte nabbisara si'o, ana waugu i Ya'u massa'u su ola'u lal᷊awangngu.

¹⁴ I'o sarun maola'a manga tuidda wuṛṛu manga walahanna maraninu sarun mangal᷊uandaga si'o; suapan taumata apan sumabbi sarun mangindaunu.

¹⁵ Amungkangngu i Ya'u masa'u wuṛṛu mannaungnga lal᷊eo si'o see makkuumannu, anambon araratuanna uapal᷊iwutta si'o sarun maapendamma atata'utta. I mangitou sarun mangal᷊uandaga si'o wuṛṛu mammuta maasilo si'o.

¹⁶ I Ya'u sarun makkimunsa'a wal᷊ingkakku annu wuṛṛu mamalan tumanangngu amal᷊unusanna. I mangitou sarun mamendamma aroddi asasusane mal᷊unussa, ere anaanna apan maṛṛoro nallappassa wuṛṛu namate si'o.

¹⁷ Wal᷊ine wuassu silaka al᷊aṛṛutumma sarun Ta'u iaparanta lai al᷊aṛṛusa'itta, araṛṛagissa wuṛṛu pangalo ipamate tumanangngu, wuṛṛu manga winatangnga mal᷊aṛṛaga iapapate manga ana'i mangitou. I Ya'u, Mawu, buatte nabbisara.”