YEHEZKIEL 47 - WUKE SUSI WATTI'U AL᷊AL᷊USASSA

Al᷊imatang kua'e su Wal᷊e Mawu

¹ Esakka udde nangapi'u apia watukku ngara suttanna su Wal᷊e Mawu. I ya'u naasilo ua'e mangngelekka wuassu al᷊ungngu ngara udde watukku ra'i, ere lai Wal᷊e Mawu uasaruanna watukku ra'i. Ua'e udde mangngelekka wuassu al᷊ungngu puan ngaran Bal᷊e Mawu samba'a timukka sinumabbi sandiṛṛannu timukka wuassu mezbah.

² Wua'udde esakka udde nangapi'u sinumabbangnga niummatatu sasuttannu sawannakka wuṛṛu nangehetta si ya'u watukku sasuttannu ra'i. Sal᷊ukka addio'a udde mangngelekka wuassu sandiṛṛannu timukku sasuttanna udde.

³ Lapiddu mangnguukka ringannu ta'innu auukke, esakka udde nangapi'u nanantuṛṛutta pangangeleṛṛannu sal᷊ukka udde watukku ra'i araune 500 metere, see nandolo'u tinumumbe. Sutampa udde al᷊al᷊ummu ua'ene tumba'u sara ambul᷊al᷊u.

⁴ Wua'udde i tou nanguukka 500 metere apia, wuṛṛu isudde ua'ene sara wu'u. I tou nanguukka 500 metere lai, wuṛṛu ua'ene sarate lawassa.

⁵ Paassa lai i tou nanguukka araune 500 metere, wuṛṛu isudde ua'ene tumanite mal᷊al᷊umma tumbeanna amatannu ledda. Amungkangngu taumata mappulu lumewessa i tou ṛinone umalangnga.

⁶ Ana see taumata udde nabbisara si ya'u, “Ei taumata apan mattate, panutukke sarangkanambone indi paapia-pia.” Wua'udde i tou nangapi'u apia sinumal᷊ukka,

⁷ wuṛṛu i ya'u naasilo manungku su winggin sal᷊ukka udde pia manambo aaluanna.

⁸ I tou nabbisara si ya'u, “Sal᷊ukka indi mangngelekka wuassu ra'i sinumabbi wanua indi wuṛṛu sinumabbi Wawal᷊annu Sal᷊ukku Yordan mabbatukku Tahal᷊oangnga Nate. Napawe ua'ene na'omate su Tahal᷊oangnga Nate, ne ua'en tahal᷊oangnga mapakkada mabbal᷊i ua'e maammi.

⁹ Suapan tampa sal᷊ukka indi mangngelekka, isudde lai sarun asangkal᷊anna al᷊awo'u hatin inassa wuṛṛu winatangnga waine. Ua'en Tahal᷊oangnga Nate sarun olaanne mabbal᷊i maammi, wuṛṛu suapan tampa ua'e udde mangngelekka, isudde sarun pia pabbawiakka.

¹⁰ Wuassu manga al᷊imatang kua'e su En-Gedi maddatingngu al᷊imatang kua'e su En-Eglaim, manga winggine sarun marame ringannu manga samakka apan mammatin soma mangitou isudde. Al᷊awo'u hatin inassa sarun pia sulal᷊ummu ua'e udde, ere apan pia sulal᷊ummu Tahal᷊oangnga Tangngane.

¹¹ Arawe ua'e su manga rano wuṛṛu wiso su al᷊o'engngu apanne udde tawe maola'a maammi, ewe'e sidutu aasabbangannu haramma.

¹² Su al᷊o'engngu winggin sal᷊ukka ruan ba'a sinumapputta anambon hatin aaluanna mabbua. Rongngu alu udde tawe tumolangnga, wuṛṛu manga wuane tawe masue. Manga aaluanna udde sarun mapasabbangu manga wuane wakku suapan bul᷊anna, ana waugu ua'e apan mangngelekka isudde ua'e wuassu Wal᷊e Mawu. Manga wuane nabbal᷊i anna wuṛṛu manga rongngane mahuna olaanna undamma.”

Manga passarannu leta'a

¹³ Mawu Apan Atanggaṛṛanne nabbisara, “Eteindi manga passarannu leta'a apan sarun tahianna su mapul᷊o dua ṛuangannu Israel. Ṛuanganni Yusuf manarimattu darua wageangnga.

¹⁴ I Ya'u buatte nassalu manungku leta'a udde sarun Ta'u ionggolla su iupungngu al᷊amonanu. Ana waugu udde, anute leta'a udde wuṛṛu tahiate ringannu matul᷊idda suwallatti yamiu.

¹⁵ Passaranna su samba'a sawannakka manattakka wuassu Tahal᷊oangnga Tangngane mabbatukku ra'i maddatingngu soa Hetlon, watukku Hamat, inai aroddi watukku soa Zedad,

¹⁶ watukku Berota wuṛṛu Sibraim (manga soa udde addone suwallattu soa Damsyik wuṛṛu soan Hamat), wua'udde watukku soan Hazar-Enan, su passarannu soan Hauran.

¹⁷ Nariaddi, passaranna samba'an sawannakka nitattakka wuassu Tahal᷊oangnga Tangngane maddatingngu ra'i, watukku soa Hazar-Enan; wageangngu leta'u Damsyik wuṛṛu Hamat poi su sawannakku passaranna udde.

¹⁸ Passaranna su samba'a ra'i mabbatukku timukka, wuassu sambau tampa suwallattu wageangngu leta'u Damsyik wuṛṛu wageangngu leta'u Hauran. Nariaddi sal᷊ukku Yordan naola'a passarannu wallattu leta'u Israel su samba'a waṛṛatta wuṛṛu Gilead su samba'a ra'i, maddatingngu Tamar su salleannu Tahal᷊oangnga Nate.

¹⁹ Passaranna su samba'a timukka mabbatukku taṛṛanganna, wuassu Tamar watukku al᷊imatang kua'e Kades-Meriba, ana see i tou watukku pal᷊onna su al᷊o'engngu passarannu Mesir maddatingngu Tahal᷊oangnga Tangngane.

²⁰ Passaranna su samba'an baṛṛatta niola'u Tahal᷊oangngu Tangngane, ana see mabbatukku sawannakka su sambau tampa su samba'a waṛṛattu lal᷊anna sumutta watukku Hamat.

²¹ Tahiate leta'a udde suwallatti yamiu, tumuṛṛuttu manga ṛuangannu Israel;

²² wuṛṛu leta'a uddewe pussa'anu saran mal᷊annu-l᷊annu. Manga taumata raho apan matana'a suwallatti yamiu, wuṛṛu uatahuanna manga ana'a apan niasungkanga isudde, ṛinone lai maasomba tahia wuassu leta'a udde. I mangitou ṛinone ireengnga lai maola'a walahannu Israel, wuṛṛu i mangitou lai iundi tadea'u maasomba leta'a sutempo ma'ola'a patatahia leta'a suwallattu manga ṛuangannu Israel.

²³ Suapan tumana'u raho ṛinone onggol᷊annu leta'a suadio'a ringannu walahannu Israel suapa i tou uatana'a. I Ya'u, Mawu Apan Atanggaṛṛanne buatte nabbisara.”