YEHEZKIEL 46 - WUKE SUSI WATTI'U AL᷊AL᷊USASSA

Tembonanne wuṛṛu manga atorannu ramea

¹ Mawu Apan Atanggaṛṛanne nabbisara, “Ngara pasallangannu ra'i apan mabbatukku rallakku lal᷊umme ṛinone sidutu uaṛṛuuda al᷊annune annummu allo mammanara. Sasuttanna udde tumba'u wotongnge wu'anna su allon Sabat wuṛṛu Ramean Bulanna Wakku.

² Su manga allo udde tembonanne ṛinone sumutta wuassu rallakku liudde umamattu panumbal᷊e wahewalla ana see dumarisikka su sandiṛṛannu diṛṛin sasutanna, tantal᷊anna manga imam mangngonggollu sasamba itattambunna wuṛṛu sasamban paddarame wuassu tembonanne. Su ngara pasallanganna udde i tou ṛinone umal᷊intudda wuṛṛu massubba Mawu, see inaite. Wua'udde maddatingngu ṛabbi, sasuttanna udde tawe wotongnge iṛṛuudda.

³ Su saruannu sasuttanna udde lai, anambon tumanangnge ṛinone umal᷊intudda massubba Mawu suapan allon sabat wuṛṛu Ramean Bul᷊anna Wakku.

⁴ Su allon Sabat tembonanne ṛinone mangonggolla su Mawu sasamba itattambunna eteudde annumma ana'u domba wuṛṛu sambau domba esakka, sarangkanambone tawe sangkulle.

⁵ Suadio'a ringannu domba esakka udde ṛinone ionggolla lai sasamba gandumma anambone 17,5 litere, wuṛṛu suadio'a ringannu suapan ana'u domba, ṛinone ionggolla sasamba gandumma anambone apan ipaapulune. Suapan sasamba gandumma ṛinone raringanannu aonggolla tatallu litere lanan zaitun.

⁶ Su Ramean Bul᷊anna Wakku aonggolla udde ṛinone eteudde sambau sapi esakka, annumma ana'u domba, sarangkanambone tawe sangkulle.

⁷ Suadio'a ringannu suapan sapi esakka wuṛṛu ambinga esakka, i tou ṛinone mangonggollu gandumma anambone 17,5 litere, wuṛṛu suadio'a ringannu suapan ana'u domba, manga pira walate ipaapulune. Suapan sasamba gandumma ṛinone daringanannu sasamba tallu litere lanan zaitun.

⁸ Amungkangngu tembonanne inai mattaṛṛamawu su Wal᷊e-U, i tou ṛinone sumutta umamattu panumbal᷊e wahewalla, wuṛṛu napawe mapul᷊e umamattu lal᷊anna udde lai.

⁹ Nawal᷊i'a, amungkangngu su manga allo wahewalla tumanangnge rumanta mattaṛṛamawu su Mawu, ne i mangitou apan sinumutta niumamattu sasuttanna su sawannakka, mapul᷊e ṛinone umamattu sasuttannu timukka napawe i mangitou nuddusse mattaṛṛamawu. Wuṛṛu i mangitou apan sinumutta su sasuttannu timukka, mapul᷊e ṛinone sumabbangngu sasuttanu sawannakka. Manga taumata imbaṛṛangnga mapul᷊e umamattu lal᷊anna apan niamatanna sutempo sinumutta; i mangitou ṛinone mapul᷊e umamattu sasuttanna su sambaane.

¹⁰ Tembonanne ṛinone sumutta su Wal᷊e Mawu suadio'a ringannu tumanangnge wuṛṛu mapul᷊e lai ṛinone suadio'a lai.

¹¹ Su manga allon andeangnga wuṛṛu ramea, suadio'a ringannu suapan sapi esakka wuṛṛu suapan domba esakka ṛinone ionggolla gandumma anambone 17,5 litere, wuṛṛu suadio'a ringannu suapan ana'u domba, walate apulu mangonggolla tumuṛṛuttu ipaapulun taumata apan mattaṛṛamawu. Suapan aonggolla gandumma ṛinone daringanannu aonggolla tallun litere lanan zaitun.

¹² Amungkangngu tembonanne mappulu mangonggollu aonggolla apulun naungnga su Mawu, mawae ete sasamba itattambunna aroddi lai sasamban paddarame, ne sasuttanna ra'i apan mabbatukku rallakku lal᷊umme ṛinone wu'anna si tou. I tou ṛinone mangonggollu sasamba udde ringannu olangnge apan uasul᷊ungnga ere apan niolangnge su allon Sabat, arawe napawe i tou mapul᷊ete, sasuttanna udde iṛṛuuda apia.”

Sasamba miallo-miallo

¹³ Mawu nabbisara, “Miallo-miallo sutempo marua allo, sambau ana'u domba apan uukke santonna wuṛṛu tawe sangkulle ṛinone ionggolla maola'a sasamba itattambunna su Mawu.

¹⁴ Waine wua'udde lai, suapan marua allo ṛinone ionggolla lai darua kilograma gandumma wuṛṛu sanlitere lanan zaitun ilo'a su gandumma udde. Eteudde sasamba gandumma apan miallo-miallo ṛinone ionggolla su Mawu; atoranna indi iapappaamatta saran mal᷊annu-l᷊annu.

¹⁵ Suapan marua allo, ṛinone sidutu ia'onggolla su Mawu: sambau ana'u domba, sasamba gandumma wuṛṛu lanan zaitun.”

Leta'a darotongngu ratu

¹⁶ Mawu Apan Atanggaṛṛanne nangonggollu parenta, wisara-Ne, “Amungkangngu tembonanne apan uaparenta nangonggollu sambageanganna wuassu leta'a pussa'ane su sangkatou anangnge esakka, leta'a udde mabbal᷊i pussa'an anangnge wuṛṛu maola'a darotongngu amonanne.

¹⁷ Arawe amungkangngu tembonanne udde nangonggollu sambageanganna leta'a pussa'ane su sangkatou allangnge, leta'a udde sarun mawelengnga apia maola'a pussa'an tembonanne udde su Tonna Pamamelenganna. Leta'a udde pussa'ane wuṛṛu tumba'u i tou ringannu manga anangnge esakka apan wotongnge manahuanna leta'a udde sarangkal᷊o'engnge.

¹⁸ Tembonanne udde tawe botongnge manganu sarang addio'a wuassu darotongngu tumanangnge. Tumba'u letangnge sassane apan botongnge ionggolla su manga anangnge esakka ma'oman sara tawe saran sangkatou wuassu uma-U wotongnge iapatal᷊ei wuassu darotongnge.”

Manga dapuṛṛanna su Wal᷊e Mawu

¹⁹ Wua'udde esakka udde nangapi'u sinumutta su ngara su sandiṛṛannu sasuttanna, watukku manga wabbo'a na'ukkassa apan uasaruanna watukku sawannakka. Manga wabbo'a udde nissadia hunan manga imam. Esakka udde nanta'e su panumbal᷊e su pentakke samba'a waṛṛatta,

²⁰ wuṛṛu nabbisara, “Su tampa indi manga imam ṛinone mallaha sasamba ipamappassa rosa wuṛṛu sasamba wawaekka arugianna see mallaha sasamba gandumma, tadea'u saran addio'a wuassu sasamba apan susi udde tawe iapidda su rallakku liudde ma'oman sara maasilaka tumanangnge.”

^21-22 Wua'udde i ya'u niapidde watukku rallakku liudde wuṛṛu nipasilone si ya'u manungku su appatta wuune, sambau-sambau pia rallakka apan maadio'anna, al᷊o'engnge 20 metere wuṛṛu al᷊alakke 15 metere.

²³ Suapan rallakka udde papal᷊iwutannu darandunga watu, wuṛṛu manga darandunga udde pia manga sunggilla.

²⁴ Esakka udde nabbisara si ya'u, “Eteindi manga dapuṛṛanna tampa manga mangangimbe Wal᷊e Mawu mallaha manga sasamba aonggollu tumanangnge.”