YEHEZKIEL 45 - WUKE SUSI WATTI'U AL᷊AL᷊USASSA

Manga wageangngu wanua apan niṛṛae huna Mawu

¹ Tantal᷊anna manga leta'a udde taambe nitahia maola'a leta'a pussa'a suapan ṛuanganna, ṛinone sambau iṛṛae huna Mawu. Leta'a udde al᷊o'engnge ṛinone 12,5 kilometere, wuṛṛu al᷊alakke 10 kilometere. Ahewallu leta'a udde niapasingkatta na'ukkassa.

² Su Wal᷊e Mawu nissadia wuassu leta'a udde sambageanganna apan uataṛṛa wu'u appatta, uuṛṛanne 250 metere suapan sandiṛṛanne, wuṛṛu papal᷊iwutannu lapanganna al᷊alakke 25 metere wuṛṛu ete isudde apan ṛinone iapararisikka Wal᷊e Mawu.

³ Sambageanganna wuassu leta'a udde, apan al᷊o'engnge 12,5 kilometere, wuṛṛu al᷊alakke 5 kilometere ṛinone saddianna pa'olaanna Wal᷊e Mawu, eteudde wageangngu leta'a apan lembon na'ukkassa.

⁴ Leta'a udde na'ukkassa, wuṛṛu nisaddia huna manga imam apan mammanara mammiaṛṛa'u patataṛṛamawu su Wal᷊e Mawu. Sambageanganna wuassu leta'a udde sarun maola'a tampa pa'olaanna wal᷊en mangitou, wuṛṛu sambageanganna lai hunan Bal᷊e Mawu.

⁵ Samba'a lai wuassu leta'a udde apan ahewalle 12,5 kilometere kali 5 kilometere ṛinone saddianna huna manga taumatan Lewi apan mammanara sulal᷊ummu Wal᷊e Mawu. Isudde sarun iapararisikka manga soa suapa i mangitou wotongnge matana'a.

⁶ Su sandiṛṛannu leta'a apan na'ukkassa udde, ṛinone iṛṛae santampa leta'a apan al᷊o'engnge mapul᷊o dua setenga kilometere wuṛṛu al᷊alakke darua setenga kilometere, pa'olaanna sambau soa apan botongnge atanaannu anambon taumata wuassu walahannu Israel.

Leta wuattu tembonanne apan uaparenta

⁷ Su tembonanne apan uaparenta ṛinone lai saddianna leta'a. Leta'a udde uawannadda wuassu passaranna samba'an waṛṛattu wageangngu leta'a apan niṛṛa'e huna Mawu udde, naddatingngu Tahal᷊oangngu Tangngane, wuṛṛu wuassu passarannu ra'i wageangngu leta'a apan niṛṛa'e udde, maddatingngu passarannu ra'i wanua udde. Nariaddi al᷊o'engnge nassul᷊ungngu al᷊o'engngu wuassu suwallatu sambau wageangngu leta'a apan nionggolla su manga ṛuangannu Israel.

⁸ Leta'a udde naola'a pussa'an tembonanne apan mammarenta su leta'u Israel, tadea'u tawe mangallangnga uma-U apia, ewe'e mangonggollu wageangngu leta'a apan lebbene udde maola'a pussa'a manga ṛuangannu Israel.

Manga manaran tembonanne apan uaparenta

⁹ Mawu Apan Atanggaṛṛanne nabbisara, “Natimute manga rosanu, ei manga tembonannu Israel! Iloloa'e inolaanu apan walate apulunu mannansara tumana'u soa udde. Pammanarate ringannu mapia wuṛṛu matul᷊idda. Saran paassa ariete i yamiu mallimbuakka uma-U apia wuassu leta'i mangitou. Ia'i, Mawu Apan Atanggaṛṛanne mammarenta udde si'o.

¹⁰ Paata'e timbanganna wuṛṛu aul᷊aanna apan naṛṛino:

¹¹ Sambau efa ipanguukka saranapa mamara ṛinone loṛṛone nassul᷊ungngu sambau bat ipangukka ua'e. Aul᷊aanne eteudde sambau homer. Nariaddi, manga aul᷊aanna udde ṛinone arendi: 1 homer=10 efa=10 bat.

¹² Timbangannu ṛinone arendi: 1 syikal=20 gera 1 mina=60 syikal

^13-15 Eteindi pangianannu aul᷊aanna ipanguukka manga sasamba: gandumma: 1/60 wageangnga wuassu hessin bawail᷊annu jawawut: 1/60 wageangnga wuassu hessin bawail᷊annu lanan zaitun; 1/100 wageangnga wuassu manga hessin aaluanna. (Uuṛṛete tumuṛṛuttu bat: 10 bat=1 homer=1 kor) domba: 1 domba wuassu suapan 200 domba. I yamiu ṛinone mangonggolla sasamba gandumma, sasamba itattambunna, wuṛṛu sasamban paddarame, tadea'u manga rosanu ampunganna. I Ya'u, Mawu Apan Atanggaṛṛanne apan buatte nangonggollu parenta udde.

¹⁶ Ahewallu tumana'u wanua ṛinone mangapiddu manga sasamba udde su tembonanne apan uaparenta su Israel.

¹⁷ Ete i tou apan ṛinone mamalli winatangnga maola'a sasamba itattambunna wuṛṛu manga saranapa olaanna sasamba gandumma wuṛṛu sasamba anggore su anambon balahannu Israel su allo-allo wahewalla, Ramean Bul᷊anna Wakku, manga allon Sabat wuṛṛu manga allo wahewalla waine. I tou ṛinone manaddia sasamba aampungnga rosa, sasamba gandumma, sasamba itattambunna, wuṛṛu sasamban paddarame ipaddorongnga aampungnga su walahannu Israel.”

Manga allo wahewalla

¹⁸ Mawu Apan Atanggaṛṛanne nabbisara su uman-Ne, “Su allo paarorone wul᷊anna paarorone, i yamiu ṛinone mapaasusin Bal᷊e-U ringannu mangonggollu sambau sapi esakka saṛṛen tumuwo apan tawe sangkulle.

¹⁹ Imam ṛinone manganu daṛṛa wuassu sasamba papappassa rosa udde, ana see iapu su manga diṛṛi ngaran Bal᷊e-U, wuṛṛu lai su manga ngara pasallanganna apan mattudda watukku rallakku lal᷊umme.

²⁰ Pa'ola'e aroddi lai su allo appitune wul᷊anna udde, suapan taumata apan buatte na'ola'a rosa ringannu tawe nipatattudda ara'e ana waugu wagga. Ringannu olangnge udde i yamiu sarun maariaga asasusin Bal᷊e-U.

²¹ Su allo mapul᷊o appatta wul᷊anna paarorone, i yamiu ṛinone mallaghun Andeangngu Paskah. Pitu allo al᷊annune anambon taumata ṛinone umanna roti apan tawe ragine.

²² Su allo paarorone, tembonanne apan uaparenta ṛinone mangonggollu sambau sapi esakka maola'a sasamba papappassa rosa su watanganne wuṛṛu su anambon tumanangnge.

²³ Su al᷊annune ramea apan ilallaghu pitu allo udde, miallo-miallo i tou ṛinone mangonggolla su Mawu pitu sapi esakka wuṛṛu pitu domba esakka apan tawe sangkulle, ana see itambunna tal᷊impu'u. Miallo-miallo lai i tou ṛinone mangonggollu ambau ambinga esakka maola'a sasamba aampungnga rosa.

²⁴ Wal᷊ine wua'udde, ṛinone ionggolla gandumma anambone 17,5 litere suapan sambau sapi esakka see tatallu litere lanan zaitun suapan sambau domba esakka.

²⁵ Su Andeangngu Rasannu Rongnga, apan itattakka su allo mapul᷊o l᷊ima wul᷊anna appitune, miallo-miallo al᷊annune pitu allo tembonanne ṛinone mangonggollu manga sasamba apan uasul᷊ungnga, eteudde sasamba aampungnga rosa, sasamba itattambunna, wuṛṛu sasamba gandumma see lanan zaitun.”