YEHEZKIEL 44 - WUKE SUSI WATTI'U AL᷊AL᷊USASSA

Mappaattu ngara su ra'i

¹ Wua'udde esakka udde nangapi'u apia watukku sasuttannu liudde samba'an ra'i wageangngu Wal᷊e Mawu. Sasuttanna udde uaṛṛu'udda.

² Mawu nabbisara si ya'u, “Sasutanna indi ṛinone sidutu uaṛṛappinga wuṛṛu imbaṛṛangnga wu'anna. Tawe saran sangkatou apan botongnge sumutta, ana waugu i Ya'u, Mawu Ruatan Israel, sinumuttate su Wal᷊e-U niumamattu sasuttanna indi. Nariaddi sasuttanna indi sidutu uaṛṛuudda.

³ Arawe tembonanne apan uaparenta wotongnge inai su sasuttanna udde tadea'u umanna anna na'ukkassa su saruang-Ku. I tou ṛinone sumutta umamattu panumbal᷊e wahewalla wuṛṛu mabbelengnga umamattu lal᷊anna udde lai.”

Darorongnga sumutta su Wal᷊e Mawu

⁴ Wua'udde esakka udde nangapi'u watukku sasuttannu waṛṛatta apan uasasaruannu Wal᷊e Mawu. I ya'u mannutukka, wuṛṛu i ya'u naasilo Wal᷊e Mawu udde aoopannu semakka lullendapa apan matiala daranta Mawu. Wua'udde niumaruutta wuṛṛu nassubba,

⁵ wuṛṛu Mawu nabbisara si ya'u, “Ei taumata apan mattate, panutukke paapia-pia apan aellehannu wuṛṛu apan niaringiṛṛannu. I Ya'u sarun mamasingkatta si'o al᷊awo'u atoranna wuṛṛu tita su ola'u Wal᷊e-U indi. Woṛṛeta'e paapia-pia isai-sai apan wotongnge iwala sumutta su Wal᷊e-U wuṛṛu isai-sai apan tawe wotongnge.

⁶ Wal᷊oa'e su umattu Israel apan apulune lumawangnga udde manungku i Ya'u, Mawu Apan Atanggaṛṛanne, maddirite mamalang kami ma'ola'a al᷊al᷊eo.

⁷ I mangitou buatte nalluhudda Wal᷊e-U, ana waugu tantal᷊anna tawa wuṛṛu daṛṛan sasamba ia'onggolla si Ya'u, i mangitou namalan sinumutta sulal᷊umme manga taumata raho apan tawe nisunatta, wuṛṛu tawe tumuṛṛutta si Ya'u. Ringannu manga inolaanni mangitou apan maarantinna udde, i mangitou buatte nilumawangnga paaire-U si mangitou.

⁸ Wal᷊inewe i mangitou sassane apan na'ola'a manga lal᷊aghu na'ukkassa sulal᷊ummu Wal᷊e-U, ewe'e manga taumata raho apan nirolokki mangitou iapamanara.

⁹ I Ya'u, Mawu Apan Atanggaṛṛanne, mamasingkatta manungku manga taumata raho apan tawe nisunatta wuṛṛu taumata apan tawe tumuṛṛutta si Ya'u, tawe iwala sumutta su Wal᷊e-U. Udde iapaamatta lai su taumata raho apan uatana'a su pattangngannu walahannu Israel.”

Manga taumatan Lewi niapasabbangnga wuassu manara imam

¹⁰ Mawu nabbisara si ya'u, “I Ya'u sarun makkuumannu manga taumatan Lewi apan suadio'a ringannu manga taumatan Israel waine, apan buatte nanantang-Ku wuṛṛu massubba paal᷊uanna.

¹¹ Sulal᷊ummu Wal᷊e-U, i mangitou tumba'u wotongnge mangimbe si Ya'u ere sangkatou mammamanara wuṛṛu mandariaga sasuttanna. I mangitou wotongnge mamototta manga winatangnga maola'a sasamba itattambunna wuṛṛu aonggolla, wuṛṛu i mangitou ṛinone sidutu mangngimbe si Ya'u.

¹² Arawe ana waugu i mangitou buatte na'ola'a lal᷊aghu pasasubba paal᷊uanna hunan walahannu Israel, wuṛṛu ringannu olangnge udde mangngapiddu walahanna udde sulal᷊ummu rosa, ne i Ya'u, Mawu Apan Atanggaṛṛanne, massalu manungku i mangitou ṛinone iṛṛuumanna.

¹³ I mangitou imbaṛṛanga lai mangimbe si Ya'u maola'a sangkatou imam ara'e mangeṛṛetta apa apan na'ukkassa si Ya'u, ara'e sumutta su tampa Apan Lembonsusi. Eteudde ṛuumanna ana waugu manga inolaanna apan maarantinna apan buatte niola'i mangitou.

¹⁴ Orassa indi i mangitou Ta'u iapamanara manara masahadda apan sarun olaanna su Wal᷊e-U.”

Manga imam

¹⁵ Mawu Apan Atanggaṛṛanne nabbisara, “Sutempo walahannu Israel nanantang-Ku, manga imam Lewi wuassu papapulunni Zadok sidutu satia mangngimbe si Ya'u su Wal᷊e-U. Ana waugu udde ete i mangitou apan orassa indi ṛinone mangimbe si Ya'u wuṛṛu rumanta su saruang-Ku mangapiddu tawa wuṛṛu daṛṛan sapi wuassu manga sasamba.

¹⁶ Tumba'u i mangitou sassane apan botongnge sumutta su Wal᷊e-U, mangimbe si Ya'u su manga mezbah-Ku, wuṛṛu mamiaṛṛa'u patataṛṛamawu su Wal᷊e-U.

¹⁷ Sutempo i mangitou sumutta su ngara pasallanganna mattuddan rallakku lal᷊umme, i mangitou ṛinone malluṛṛen laubba linen. Imbaṛṛangnga i mangitou malluṛṛen laubba wol amungkangngu tantal᷊anna mammanara su rallakku lal᷊umme, ara'e sulal᷊ummu Wal᷊e-U.

¹⁸ Tadea'u tawe masal᷊ihangnga wuṛṛu liahanna, i mangitou ṛinone malluṛṛen sal᷊ana linen ringannu tawe papeṛṛetta, wuṛṛu paporongnga wuassu linen.

¹⁹ Amungkangngu i mangitou inaite su rallakku liudde, suapa umatta uaammulla, manga imam udde ṛinone malluatta laubbu manaran mangitou sulal᷊ummu manga wabbo'a na'ukkassa su Wal᷊e-U, ana see malluṛṛen laubba waine, tadea'u laubbu manara udde tawe manilaka umatta.

²⁰ Manga imam imbaṛṛangnga mallunggukka pua mangitou, ara'e mamalan utangnge gondronna. Uta'a udde ṛinone pol᷊oanna maautta tumuṛṛuttu atorana apan buatte nitantunna.

²¹ I mangitou imbaṛṛangnga ma'inumma anggore amungkangngu sumutta su rallakku lal᷊umme.

²² Manga imam tumba'u wotongnge maawingngu maṛṛualan Israel apan ta'e perawanna ara'e sangkatou inawal᷊uannu imam. I mangitou tawe wotongnge maawingngu wawine apan nisindoanna.

²³ Manga imam ṛinone mangaṛṛa'a uma-U tadea'u masingkatta mapaparala suapa apan niṛṛae si Ya'u wuṛṛu suapa tawe, suapa apan waresi tumuṛṛutu agama wuṛṛu suapa apan dal᷊eo.

²⁴ Amungkangngu nariaddi pattatiakka su hatton pallaṛṛuungnga, i mangitou ṛinone manginsue udde ringannu manga tita-U. I mangitou ṛinone maddamea manga andeangngu agama, tumuṛṛuttu atorannu manga tita-U, see lai mangaddatta Sabatta sambau allo apan niṛṛae si Ya'u.

²⁵ Sangkatou imam imbaṛṛangnga mandal᷊eo watanganne ringannu mangeṛṛetta winal᷊unanna, tabbene'e winal᷊unannu hagurangnge, anangnge, tuṛṛangnge esakka ara'e tuṛṛangnge wawine apan taambe naawingnga.

²⁶ Napawe i tou nawaresite apia, i tou ṛinone maṛṛaddo pitu allo lai,

²⁷ ana see inaite su rallakka sulal᷊ummu Wal᷊e-U, wuṛṛu mangonggollu sasamba ipamaresi watanganne tadea'u i tou wotongnge mammanara apia su Wal᷊e-U. I Ya'u, Mawu Apan Atanggaṛṛanne buatte nabbisara.

²⁸ Manga imam nanengkamma manara imam udde maola'a wageangnga si mangitou wuassuapa apan Ta'u nionggolla su Israel maṛṛana'a mappulunna. I mangitou imbaṛṛangnga manahuanna manga apa su Israel: Ete i Ya'u darotongngi mangitou.

²⁹ I mangitou ṛinone mabbiakka wuassu aonggolla gandumma, sasamba papappassa rosa, wuṛṛu manga sasamba wawaekka arugianna; wuṛṛu manga al᷊awo'a apan buatte niṛṛae si Ya'u, ṛinone ionggolla si mangitou.

³⁰ Manga imam ṛinone onggol᷊annu wageangnge apan apianne wuassu al᷊awo'u hessi pangitinganna apan paarorone, wuṛṛu wuassu al᷊awo'u apa apan nionggolla si Ya'u. Suapan balahannu Israel ma'ola'a roti, ne roti paarorone udde wuattu manga imam. Ne i Ya'u sarun mangal᷊amatta manga wal᷊en balahannu Israel.

³¹ Manu'u winalanganna wuṛṛu manga winatangnga waine apan nate sassane, ara'e apan nitamboannu winatangnga mal᷊aṛṛaga, tawe wotongnge inasannu manga imam.”