YEHEZKIEL 43 - WUKE SUSI WATTI'U AL᷊AL᷊USASSA

Mawu nabbelengnga su Wal᷊en-Ne

¹ Wua'udde esakka udde nangapi'u watukku sasuttanna apan uasaruanna watukku ra'i,

² wuṛṛu ete isudde i ya'u naasilo nirumanta wuassu samba'a ra'i semakka lullendapa apan manniala darantan Duatan Israel. Tingikku Ruata niaringikka ere lua'a ruddapa su laudda, wuṛṛu runia sussal᷊endapa ana waugu semakku darantan Duata.

³ Aellega uasul᷊ungnga ere lai ta'u niasiloanna sutempo Ruata nirumanta makkimunsa'a Yerusalem, wuṛṛu ere lai ta'u niasiloanna su Sal᷊ukku Kebar. Ana see i ya'u naṛṛa'a wuṛṛu niumal᷊intudda.

⁴ Semakka lullendappa udde inaite watukku sasutanna samba'a ra'i ana see sinumutta sulal᷊ummu Wal᷊e Mawu.

⁵ Ghaṛṛaho Mawu namengketta si ya'u wuṛṛu nangapi'u watukku rallakku lal᷊umme; iasudde i ya'u naasilo Wal᷊e Mawu aoosanna semakku daranta Mawu.

⁶ Sutempo esakka udde ta'e uarisikka su sandiṛṛangku, i ya'u naaringikka Mawu nabbisara si ya'u wuassu lal᷊ummu Wal᷊e Mawu, wisara-Ne,

⁷ “Ei taumata apan mattate, eteindi adderan araratuang-Ku. Ete isindi i Ya'u sarun matana'a su pattangngu umattu Israel wuṛṛu mamarenta si mangitou saran mal᷊annu-l᷊annu. Mawae ete i mangitou aroddi lai manga ratu mangitou, tate lai mandal᷊eo arang-Ku apan na'ukkassa ringannu massubba paal᷊uanna ara'e ringannu mallabingu winal᷊unannu manga ratu mangitou su tampa indi.

⁸ Dorone manga ratu mangitou ma'ola'a manga pua ngara wuṛṛu manga diṛṛi ngaran bal᷊en araratuanni mangitou su liuddu manga pua ngara wuṛṛu manga diṛṛin Bal᷊e-U, na'oman sara tumba'u pia samba'u darandunga su wallanne. I mangitou buatte nandal᷊eo arang-Ku apan na'ukkassa ringannu manga inolaanni mangitou apan maarantinna. Ana waugu udde i mangitou Ta'u nipate sulal᷊ummu asasa'u-U.

⁹ Arawe manattakka orassa insi mangitou ṛinone mangillol᷊o massubba paal᷊uanna wuṛṛu mangingkattu manga winal᷊unannu manga ratu mangitou. Wua'udde, i Ya'u sarun matana'a su pattangnganni mangitou saran mal᷊annu-l᷊annu.”

¹⁰ Wua'udde Mawu nabbisara apia, “Ei taumata apan mattate, pasingkata'e su umattu Israel su ola'u Wal᷊e-U indi wuṛṛu doloṛṛa'e i mangitou mamarikissa ṛiinne. Ola'e i mangitou masili ana waugu al᷊awo'u rosa mangitou.

¹¹ Wuṛṛu napawe i mangitou nasilite ana waugu manga inolaanni mangitou, tal᷊aa'e ṛiinnu Wal᷊e-U indi si mangitou: saṛṛene, manga ngara sasuttanna wuṛṛu sabbanganne, atokku wal᷊ene, wuṛṛu al᷊awo'u atoranna wuṛṛu manga titane. Woṛṛeta'e sarangkanambone udde si mangitou tadea'u i mangitou wotongnge maasilo wuṛṛu maatutukka ola'u mangatokku al᷊awo'a, see tumuṛṛutta anambon atoranne.

¹² Eteindi ola'u atokku Wal᷊e Mawu: Ehewallu wageangngu leta'a maranine su puiddu wowone uddewe lembon na'ukkassa.”

Mezbah

¹³ Eteindi uuṛṛannu mezbah tumuṛṛuttu uuṛṛanna apan ipappaatta nipanguukka Wal᷊e Mawu. Uapal᷊iwutta su leddan mezbah pia sambau hote apan al᷊al᷊umme setenga metere wuṛṛu al᷊alakke setenga metere lai, ringannu winggine su wiwikku liudde atanggakke sepere appatta metere.

¹⁴ Wuassu hote naddatingngu passarannu mezbah al᷊iu wowane, atanggakke sambau sumeterene. Wageangngu tangngane dua metere, wuṛṛu setenga metere maṛṛiputanna wuassu uapal᷊iwutta ledda mezbah. Wageangnge atallune, eteudde puiddu mezbah, setenga metere lai maṛṛiputanna wuassu uapal᷊iwutta wageangngu tangngane.

¹⁵ Wageangnge atallune indi eteudde tampa pannambunannu sasamba; atanggakke dua metere. Su appatta pabbuuanne piaddu wageangnge apan ual᷊ondo'a ere tatandu'a.

¹⁶ Puiddu mezbah udde uataṛṛa wu'u appatta; suapan sandiṛṛanne uuṛṛanne annumma metere.

¹⁷ Wageangngu tangngane lai uataṛṛa wu'u appatta, suapan sandiṛṛanne uuṛṛanne pitu metere, ringannu sambau wiwikke su winggine su liudde apan atanggakke sepere appatta metere. (Al᷊alakku hotene setenga metere.) Su sandiṛṛanne samba'a ra'i pia tuadda apan mattudda watukku puiddu mezbah.

Massa'e mezbah

¹⁸ Mawu Apan Atanggaṛṛanne nabbisara si ya'u, “Ei taumata apan mattate, paddaringikke apa apan iwisara-U si'o. Napawe mezbah udde nasuete niapararisikka, i'o ṛinone massa'e mezbah ringannu manambunnu sasamba su wowone wuṛṛu maṛṛente'u daṛṛan sasamba.

¹⁹ Tumba'u imam papapulunni Zadok wuassu ṛuangannu Lewi apan botongnge rumanta su saruannu adderan araratuang-Ku mapaamattu patataṛṛamawu. I Ya'u, Mawu Apan Atanggaṛṛanne apan namarentan olangnge udde. Onggol᷊a'e si mangitou sambau sapi esakka saṛṛen tumuwo su sasamba ipangampungnga rosa.

²⁰ Panganute addio'a daṛṛa wuṛṛu apua'e su manga tatandu'a su wuune appatta su puiddu mezbah udde, aroddi lai su manga wuune wageangngu tangngane see su uapal᷊iwutta winggi mezbah udde. Ringannu olangnge udde i'o napa'ukkassu mezbah udde wuṛṛu naṛṛae mezbah udde tumba'u si Ya'u.

²¹ Wua'udde panganute sapi esakka aampunga rosa udde, wuṛṛu tambuna'e su tampa apan buatte nitantunna, eteudde su liuddu tampa na'ukkassu Wal᷊e Mawu.

²² Tiṛṛabbine i'o ṛinone mangonggollu sasamba sambau ambinga mendangenna apan tawe sangkulle tadea'u maola'a sasamba aampunga rosa. Ukkasse mezbah udde ringannu daṛṛan ambinga udde, nassul᷊ungngu apa apan niolangngu ringannu sapi esakka apan ta'e saṛṛen tumuwo udde.

²³ Napawe i'o buatte na'ola'a sarangkanambone udde, panganute sambau sapi esakka saṛṛen tumuwo wuṛṛu sambau ambinga mendangenna, darua udde tawe sangkulle,

²⁴ see apira'a ringang-Ku. Manga imam ṛinone manal᷊iawukku haramma su wowon binatangnga darua udde wuṛṛu manambunnu udde maola'a sasamba si Ya'u.

²⁵ Suapan allo, al᷊annune pitu allo, i'o ṛinone mangonggollu sasamba ambinga sambau, sapi esakka saṛṛen tumuwo, wuṛṛu ambinga mendangenna maola'a sasamba aampunga rosa. Manga winatangnga udde imbaṛṛanga pia sangkulle.

²⁶ Pitu allo al᷊annune manga imam ṛinone maola'a ammul᷊annu massa'e mezbah udde wuṛṛu mandiahi mezbah udde tadea'u wotongnge ipaatta.

²⁷ Napawe pitu allo udde nal᷊iudde, manga imam ṛinone mannattakke mangonggollu sasamba itattambunna wuṛṛu sasamban paddarame maola'a hausannu umatta. Ne i Ya'u mal᷊uassa ringanni yamiu sarangkanambone. I Ya'u, Mawu Apan Atanggaṛṛanne buatte nabbisara.”