YEHEZKIEL 42 - WUKE SUSI WATTI'U AL᷊AL᷊USASSA

Darua wal᷊en maranin Bal᷊e Mawu

¹ Wua'udde esakka udde nangapi'u watukku rallakku liudde wuṛṛu nangehetta si ya'u watukku wal᷊en waine su samba'a sawannakku Wal᷊e Mawu, tawe marau wuassu wal᷊en wahewalla su samba'a waṛṛattu Wal᷊e Mawu udde.

² Wal᷊en udde al᷊o'engnge liman pul᷊o su meterene, wuṛṛu al᷊alakke duan pul᷊o l᷊ima su meterene.

³ Sandiṛṛanne sambau wuassu wal᷊en udde uasaruanna ṛondappa apan al᷊alakke 10 metere udde, arawe sandiṛṛanne waine uasaruanna watukku apampakka watu su rallakku liudde. Wal᷊en udde ṛengkenne tatallu; suapan ṛengkenne maddioanna wuassu ṛengkenne al᷊iu wowane.

⁴ Su saruannu manga wabbo'a udde, su samba'a lal᷊umme pia lal᷊anna apan al᷊alakke 5 metere wuṛṛu al᷊o'engne 50 metere. Manga ngarane uasaruanna watukku sawannakka.

⁵ Manga wabbo'a su ṛengkenne al᷊iu rosone maṛṛiputanna wuassu manga wabbo'a su ṛengkenne al᷊iu wowane, ana waugu manga lal᷊anna su saruannu manga wabbo'a al᷊iu rosone udde mallal᷊aṛṛanna wuassu al᷊iu wowane.

⁶ Manga wabbo'a udde tallu kaṛṛengketanna wuṛṛu tawe tatungkal᷊annu manga diṛṛi ere su manga wal᷊en su rallakka.

^7-8 Sambageanganna wuassu ṛengkenne al᷊iu wowane, su al᷊o'engnge ruan pul᷊o l᷊ima su meterene naola'a tumba'u darandunga, arawe su wageangnge lambene, al᷊o'engnge ruan pul᷊o l᷊ima su meterene lai, niola'a manga wabbo'a. Su ṛengkenne al᷊iu rosone pia manga wabbo'a su al᷊o'engngu wal᷊en udde.

^9-10 Su al᷊ungngu manga wabbo'a su pentakke samba'an ra'in bal᷊e indi, wuṛṛu su panattaṛṛannu darandunga, pia sambau ngara apan mabbatukku rallakka su liudde. Su sandiṛṛanne samba'an timukka wuassu Wal᷊e Mawu, pia bal᷊e apan nassul᷊ungnga addone tawe marau wuassu wal᷊en su samba'a waṛṛatta.

¹¹ Su saruannu manga wabbo'ane pia sambau lal᷊anna apan uasul᷊ungnga ere lal᷊anna su samba'an sawannakka. Uuṛṛanne uasul᷊ungnga, wuṛṛu manga ngarane lai nassul᷊ungnga.

¹² Su al᷊ungngu manga wabbo'a su sandiṛṛanne samba'an timukka, eteudde su pentakke watukku ra'i su panattaṛṛannu darandunga, pia lai sambau ngara.

¹³ Esakka udde nabbisara si ya'u, “Wal᷊en darua udde na'ukkassa. Isudde, manga imam apan botongnge sumaruanna daranta Mawu, umanna manga sasamba apan lembon na'ukkassa. Isudde lai ṛinone iaddo mangitou manga sasamba apan lembon na'ukkassa, eteudde; sasamba gandumma wuṛṛu sasamba papappasa rosa ara'e sasamba pamaekka arugianna.

¹⁴ Amungkangngu manga imam buatte nammanara su Wal᷊e Mawu, wuṛṛu mappulu inai su rallakka su liudde, ne laubba tumba'u ipammanara sutempo na'ola'a patataṛṛamawu, ṛinone itantangngi mangitou su manga wabbo'a udde. I mangitou ṛinone malluṛṛen laubba waine, napawe wua'udde i mangitou wotongngete inai su tampa tumana'u soa uaammulla.”

Uuṛṛannu leta'a uapal᷊iwutta Wal᷊e Mawu

¹⁵ Wua'udde eassaka udde nuddusse mangnguukka Wal᷊e Mawu samba'a lal᷊umme, i tou nangapi'u sinumabbangnga niumamattu sasuttanna samba'a ra'i, ana see nanguukka wageangnge apan uapal᷊iwutta Wal᷊e Mawu.

¹⁶ Ringannu ta'inna auukke i tou nanguukka sandiṛṛannu samba'a ra'i: 250 metere.

^17-19 Wua'udde i tou nanguukka sandiṛṛanne samba'an sawannakka, sandiṛṛanne samba'a timukka, wuṛṛu sandiṛṛanne samba'a waṛṛatta; suapan sandiṛṛanne al᷊o'engnge nassul᷊ungnga, eteudde 250 metere.

²⁰ Nariaddi, wageangngu leta'u Wal᷊e Mawu saṛṛene uataṛṛa wu'u appata, uuṛṛanne 250 metere suapan sandiṛṛanne. Wageangngu leta'a udde papal᷊iwutannu sambau darandunga nipamallatta wageangngu leta'a apan niṛṛa'e huna Mawu wuassu wageangngu leta'a apan ipattu awadaalla.