YEHEZKIEL 41 - WUKE SUSI WATTI'U AL᷊AL᷊USASSA

¹ Esakka udde nangapi'u sulal᷊ummu wabbo'an tangngane, apan isassagi Tampa Apan Susi. I tou nanguukka lal᷊anna apan matudda isudde: al᷊o'engnge tallu metere,

² wuṛṛu al᷊alakke lima metere. Darandunge su sandiṛṛanne ruam ba'a aappale darua setenga metere. Ana see i tou nanguukka Tampa Apan Susi udde; al᷊o'engnge 20 metere wuṛṛu al᷊alakke 10 metere.

³ Wua'udde i tou sinumutta su wabbo'an dal᷊umme. I tou nanguukka lal᷊anna apan mattudda isudde: al᷊o'engnge satu metere, al᷊alakke tallu metere, wuṛṛu darandunga su sandiṛṛanne ruam ba'a tatallu setenga metere.

⁴ Wua'udde i tou nanguukka wabbo'a udde lai: saṛṛene uataṛṛa wu'u appata, al᷊o'engnge wuṛṛu al᷊alakke sambau-sambau mapul᷊o metere. Wua'udde i tou nabbisara si ya'u, “Eteindi Tampa Apan Lembonsusi.”

Manga wabbo'a apan niola'a su darandungu Wal᷊e Mawu

⁵ Wua'udde esakka udde nanguukka darandungu lal᷊ummu Wal᷊e Mawu: aappale tallu metere. Su darandunga apan uapal᷊iwutta Wal᷊e Mawu udde pia manga wabbo'a apan al᷊alakke dua metere.

⁶ Manga wabbo'a udde ṛengkenne tatallu wuṛṛu suapan ṛengkenne pia 30 wabbo'a. Darandungu liudde suapan ṛengkenne manipissa wuassu ṛengkenne al᷊iuwowane, na'oman sara manga wabbo'a wotongne iatokka ringannu tawe malloṛṛanga daṛṛandungu Wal᷊e Mawu udde.

⁷ Wuassu liudde, darandungu Wal᷊e Mawu udde aellehanna uasul᷊unga aappale maddatingngu rosone. Su darandungu liudde wuassu Wal᷊e Mawu, su samba'a liuddu manga wabbo'a udde, pia tuadda wahewalla na'oman sara taumata wotongnge suma'e wuassu ṛengke bowane watukku ṛengkenne aruane wuṛṛu atallune.

^8-11 Darandungngu liuddu manga wabbo'a udde aappale darua setenga metere. Wal᷊en udde pia ngarane apan mattudda watukku manga wabbo'a su samba'a sawannakku Wal᷊e Mawu, wuṛṛu ngara waine apan mattuda manga wabbo'a su samba'an sawannakka. Uapal᷊iwutta Wal᷊e Mawu pia ṛondappa apan al᷊alakke darua setenga metere, addone tallu metere wuassu leta'a, wuṛṛu niola'a uasul᷊ungnga atanggakke ringannu rapappakku manga wabbo'a su darandungu Wal᷊e Mawu. Suwallattu ṛondappa wuṛṛu manga wal᷊en apan nipaattu manga imam, pia ṛondappa al᷊alakke mapul᷊o metere su aiṛṛi aikkatannu Wal᷊e Mawu.

Wal᷊e su samba'an baṛṛatta

¹² Su samba'an rallakka samba'a waṛṛatta, pia bal᷊e wahewalla apan al᷊o'engnge 45 metere wuṛṛu al᷊alakke 35 metere, wuṛṛu aappalu manga darandunge darua setenga metere.

Uuṛṛannu Wal᷊e Mawu Apan ṛinone

¹³ Esakka udde nanguukka al᷊o'engnge Wal᷊e Mawu; 50 metere. Wuassu samba'a liuddu Wal᷊e Mawu maddatingngu darandungu liuddu wal᷊en wahewalla su samba'a baṛṛatta udde araune lai 50 metere.

¹⁴ Wageangu saruannu Wal᷊e Mawu apan uasaruanna watukku ra'i ringannu rallakka samba'a aiṛṛi aikkatanne, al᷊al᷊akke lai 50 metere.

¹⁵ Esakka udde lai nanguukka wal᷊en wahewalla apan uasaruanna rallakka samba'an baṛṛatta: al᷊alakke 50 metere, nasutta manga darandunge su aiṛṛi aikkatanne. Manga panumbal᷊e su Wal᷊e Mawu panumbal᷊en saruanne. Tampa Apan Susi, wuṛṛu Tampa Apan Lembonsusi,

Manga wageangngu Wal᷊e Mawu

¹⁶ nilogaṛṛannu wingke alu, wuassu apampakke naddatingngu manga jandelane. Manga jandela udde wotong ṛappingannu pampelene.

¹⁷ Ahewallu darandunga wageangngu lal᷊umme nilogaṛṛannu manga ukirannu

¹⁸ punnu palem wuṛṛu mala'ekatta, sangkalu punnu palem suwallattu mala'ekatta darua. Mala'aekatta udde uatahuanna hati darua,

¹⁹ hatin sangkatou taumata apan uasaruanna watukku alun palem samba'a aiṛṛi, wuṛṛu hatin singa apan uasaruanna su punnu palem samba'a aikkatanna. Manga ukiranna udde ni'uitta su ahewallu Wal᷊e Mawu,

²⁰ manattakka wuassu apampakke maddatingngu wageangu ngara al᷊iu rosone.

²¹ Manga diṛṛin ngara wuassu Tampa Apan Susi saṛṛene uataṛṛa wu'u appatta. Su saruannu Tampa Apan Lembonsusi pia sambau apan aellehanna ere mezbah wuassu alu.

Mezbah wuassu alu

²² Atanggakke sambau setenga metere wuṛṛu al᷊alakke sambau su meterene. Manga pabbuuanne, apampakke wuṛṛu darandunge niola'a wuassu alu. Esakka udde nabbisara si ya'u, “Eteindi medda apan uaraddo su saruannu daranta Mawu.”

Manga ngara

²³ Su pentakku lal᷊anna mabbatukku Tampa Apan Susi pia sambau ngara, aroddi lai su pentakku lal᷊anna apan mattudda watukku Tampa Apan Lembon susi.

²⁴ Manga ngara udde ruang kal᷊appa rongngane apan mabbu'a su tangngane.

²⁵ Manga ngaran Tampa Apan Susi nilogaṛṛannu ukiranna punnu palem wuṛṛu manga mala'ekatta, ere lai su manga darandunge. Su saruannu panumbal᷊e eteudde samba'a liudde, pia ṛondappa wuassu alu.

²⁶ Su sandiṛṛanne ruam ba'an darandunga pia manga jandela, wuṛṛu darandunge nilogaṛṛannu ukiranna punnu palem.