YEHEZKIEL 40 - WUKE SUSI WATTI'U AL᷊AL᷊USASSA

AELLEGA SUOLA'U WAL᷊E Mawu SU ALLO ADDANTANE 40:1–48:35 I Yehezkiel niapidda watukku Yerusalem

¹ Sutempo allo appul᷊one wul᷊anna paarorone, sulal᷊ummu tonna ruam pul᷊o l᷊ima sutempo i yami niwuangnga, mapul᷊o appatta su tonnane napawe Yerusalem niawaddo, i ya'u naapendamma taṛṛino Mawu, see i ya'u niapiddu Mawu inai.

² Sulal᷊ummu sambau aellega, Ruata nangapi'u watukku leta'u Israel wuṛṛu i ya'u niaddo su wowone apan atanggaṛṛanne. Su saruangku aellehangku ammul᷊annu bangunanna naal᷊ihidda sambau soa.

³ I ya'u niapiddu Mawu isudde wuṛṛu niasiloangku sangkatou esakka apan lullendappa ere witu'a uarisikka marani ngara wahewalla. I tou uaagassa tal᷊i auukka wuassu linen see lai alu auukka.

⁴ Esakka udde nabbisara si ya'u, “Ei taumata apan mattate, paddaringikke paapia-pia wuṛṛu panutukke al᷊awo'u inolaanna apan ta'u iapasilo si'o, ana waugu eteudde i'o niapidda inawarendi. Pasingkata'e su walahannu Israel sarangkanambone apan ellehannu.”

Sasutanna samba'a ra'i

⁵ Ana see i ya'u naasilo Wal᷊e Mawu apan papal᷊iwutannu darandungnga. Esakka udde mannatakke mangnguukka darandunga udde ringannu alu auukka apan al᷊o'engnge tallu metere. Inauranna darandunga udde atanggakke tallu metere wuṛṛu a'appale lai tallu metere.

⁶ Wua'udde i tou inaite watukku ngara apan uasaruanna samba'an ra'i. I tou nirumanganna su tuadde wuṛṛu napawe rosote, i tou nanguukka pua ngara udde, al᷊alakke tallu metere.

^7-10 Su liuddu ngara udde pia sambau lal᷊anna wuṛṛu suapan sandiṛṛanne pia tatallu wabbo'a pandariaganna. Suapan wabbo'a udde uasul᷊ungnga ahewalle; saṛṛene uataṛṛa wu'u appatta, wuṛṛu al᷊o'engngu manga sandiṛṛanne udde tallu metere. Darandunga sasarannu manga wabbo'a uasul᷊ungnga aappale, darua setenga metere. Lal᷊anna udde nal᷊o'engnga tallu metere lai wuṛṛu mattudda watukku wabbo'a wahewalla udde wuṛṛu inauranna al᷊oangnge appattu metere; tampane su pentakku ngara pasallanganna, samba'an dal᷊umme, eteudde apan aranianne ringannu Wal᷊e Mawu. Manga darandunga su wageangnge apan uasaruanna Wal᷊e Mawu, aappale satu metere.

¹¹ Wua'udde esakka udde nanguukka al᷊al᷊akku lal᷊anna su ngara pasallanganna; annuma setenga metere, wuṛṛu lai al᷊alakku ngara udde lima metere.

¹² Su saruannu manga wabbo'a pandiaganna apan uuṛṛane tallu ikalin tatallu metere udde, pia darandunga mawawo apan atanggakke setenga metere, wuṛṛu aappale setenga metere lai.

¹³ Ana see esakka udde nanguukka wallattu darandungu liudde sambau wabbo'an pandariaganna naddatingngu darandungu wabbo'a pandiaganna su sambaane, eteudde 12,5 metere.

¹⁴ I tou lai nanguukka wabbo'a wahewalla udde: al᷊o'engne mapul᷊o metere. Ngaran wabbo'a udde mabbatukku rallakku liuddu Wal᷊e Mawu.

¹⁵ Araune wuassu ngara pasallanganna samba'a liudde maddatingngu darandungu wabbo'a wahewalla su wageange apan uasaruanna Wal᷊e Mawu udde 25 metere.

¹⁶ Su darandunga samba'a udde wuṛṛu darandunga uasara manga wabbo'a udde pia manga jandela maradio'a. Manga darandunga su wageangu lal᷊umme apan uasaruanna lal᷊anna, nilogaṛṛannu manga ukirannu alun palem.

Rallakka su liuddu Wal᷊e Mawu

¹⁷ Wua'udde esakka udde nangapi'u sinumutta su ngara pasallangannu rallakku liuddu su Wal᷊e Mawu. Su sandiṛṛannu darandungu liudde uapal᷊iwutta Wal᷊e Mawu udde niola'a 30 wabbo'a. Su saruannu manga wabbo'a udde apampakke watu,

¹⁸ apan uapal᷊iwutta ahewallu rallakka udde. Rallakku liudde udde mabbawoanna wuassu rallakku lal᷊umme.

¹⁹ Isudde pia ngara wahewalla waine apan addone mattanggaṛṛanna wuṛṛu mattudda watukku rallakku lal᷊umme. Esakka udde nanguukka wallattu ngara wahewalla darua udde; 50 metere.

Sasutanna samba'a sawannakka

²⁰ Wua'udde esakka udde nanguukka ngara pasallangannu sawannakka apan mattudda watukku rallakku lal᷊umme.

²¹ Su ngara pasallanganna udde, tatallu wabbo'a pandiaganna su tiappu sandiṛṛannu lal᷊anne, manga darandungnga sasarane see wabbo'a ahewal᷊anne, sarangkanambone nassul᷊ungnga uuṛṛanne ringannu apan pia su ngara pasallanganna samba'a ra'i. Anambon dal᷊anna mal᷊oangnga udde al᷊o'engne 25 metere wuṛṛu al᷊alakke 12,5 metere.

²² See lai wabbo'ane wahewalla, manga jandelane, wuṛṛu manga ukirannu allun palem uasul᷊ungngu apan pia su ngara pasallanganna samba'an ra'i. Pitu tal᷊attadu tuaddu mattudda watukku ngara pasallanganna udde, wuṛṛu pentakke poi su wabbo'a wahewalla apan uasaruanna rallakku liuddu Wal᷊e Mawu.

²³ Uasasaruannu ngara pasallangannu sawannakka, pia ngara pasallanganna waine apan mattudda watukku rallakku lal᷊umme, ere lai su samba'a ngara pasallanganna samba'a ra'i. Taumata udde nanguukka wallattu ngara pasallanganna darua udde: 50 metere.

Sasutanna samba'an timukka

²⁴ Wua'udde, esakka udde nangapi'u watukku ngara pasallanganna samba'an timukka wuṛṛu niuuṛṛanne. Inauranna ngara pasallanganna udde uasul᷊ungngu manga ngara wahewalla apan baine.

²⁵ Manga jandela su manga wabbo'ane uasul᷊ungngu lai apan su manga ngara wahewalla waine. Al᷊o'engngu lal᷊annu ngara wahewalla udde 25 metere, wuṛṛu al᷊alakke 12,5 metere.

²⁶ Pitu tal᷊ataddu tuadda mattudda ngara wahewalla udde wuṛṛu wabbo'ane wahewalla udde lai su pentakke, uasaruanna rallakku liudde su Wal᷊e Mawu. Manga darandunge wageangngu lal᷊umme apan uasaruanna lal᷊anna, nilogaṛṛannu ukiranna punnu palem.

²⁷ Isudde pia lai ngara wahewalla apan mattudda watukku rallakku lal᷊umme. Esakka udde nanguukka wallattu darua ngara wahewalla udde: 50 metere.

Sasutanna samba'an timukka apan mattudda watukku rallakku lal᷊umme

²⁸ Wua'udde esakka udde nangapi'u niumamattu ngara wahewalla sinumutta su rallakku lal᷊umme. I tou nanguukka suttanna samba'a timukka udde, wuṛṛu uuṛṛanne uasul᷊ungngu manga suttanna su samba'a liudde.

^29-30 Manga wabbo'a pandiaganne, wabbo'ane wahewalla, wuṛṛu manga darandungu lal᷊umme uasul᷊ungngu manga sasuttanna waine. Manga wabbo'a su sasuttanna indi lai pia manga jandelane. Lal᷊anna suttanna udde al᷊o'engnge 25 metere wuṛṛu al᷊alakke 12,5 metere.

³¹ Arawe wabbo'ane wahewalla uasaruanna rallakku liudde. Manga darandunge su wageangngu lal᷊umme apan uasaruanna lal᷊anna, udde nilogaṛṛannu lai ukirannu punnu palem. Ual᷊u tal᷊ataddu tuadda udde mattudda watukku sasuttanna udde.

Sasutanna samba'an ra'i apan mattudda rallakku lal᷊umme

³² Wua'udde esakka udde nangapi'u sinumutta su sasuttanna samba'an ra'i sinumutta su rallakku lal᷊umme. I tou nanguukka sasuttanna udde wuṛṛu uuṛṛanne uasul᷊ungngu manga sasuttanna waine.

³³ Manga wabbo'a pandiaganne, manga darandunge sulal᷊umme wuṛṛu wabbo'ane wahewalla uuṛṛanne uasul᷊ungnga ere lai su manga sasuttanna waine. Su manga wabbo'a udde wuṛṛu su wabbo'ane wahewalla pia manga jandela. Al᷊o'engngu lal᷊anna udde 25 metere wuṛṛu al᷊alakke 12,5 metere.

³⁴ Wabbo'ane wahewalla uasaruanna watukku rallakku liudde. Manga darandunge su wageangngu lal᷊umme apan uasaruanna lal᷊anna, nilogaṛṛannu manga ukiranna punnu palem. Ual᷊u tal᷊attadu tuada apan mattudda watukku sasuttanna udde.

Sasuttanna samba'an sawannakka mattuddan rallakku lal᷊umme

³⁵ Panginsueanne esakka udde nangapi'u watukku sasuttanna samba'a sawannakka. I tou nanguukka sasuttanna udde wuṛṛu uuṛṛanne uasul᷊ungngu manga sasuttanna waine.

³⁶ See lai manga wabbo'a pandiaganne, manga darandungngu lal᷊umme wuṛṛu wabbo'ane wahewalla uasul᷊ungngu lai su manga sasuttanna waine. Su manga wabbo'ane wuṛṛu su wabbo'ane wahewalla pia manga jandela. Al᷊o'engngu lal᷊anna udde 25 metere wuṛṛu al᷊alakke 12,5 metere.

³⁷ Wabbo'a su saruanne lai uasaruanna raallakku liudde. Manga darandunga wageangu lal᷊umme apan uasaruanna lal᷊anna, nilogaṛṛannu manga ukirannu punnu palem. Ual᷊u tal᷊attadu tuadda mattudda watukku sasuttanna udde.

Manga wal᷊en maranin sasuttannu sawannakka

³⁸ Su rallakku liudde pia sambau wabbo'a nitamba su sasuttannu lal᷊ummu samba'a sawannakka. Wuassu wabbo'a pinanamba pia sambau ngara apan mattudda watukku panumbal᷊e wahewalla. Ete isudde niukkassa manga winatangnga olaanna sasamba itattambunna.

³⁹ Su panumbal᷊e wahewalla udde, pia appatu wau medda, darua suapan sandiṛṛanne. Ete su wowom manga medda udde nipototta winatangnga maola'a sasamba itattambunna, ara'e sasamba ipamappassa rosa ara'e sasamba wawaekka arugianna.

⁴⁰ Su liuddu panumbal᷊e wahewalla lai pia appatta medda, pattaṛṛa darua suapan sandiṛṛannu sasuttanna su samba'an sawannakka udde.

⁴¹ Nariaddi, sarangkanambone pia ual᷊un bau medda tampa pamototanna sasamba: appatta sulal᷊umme, wuṛṛu appatta siluddu rallakka.

⁴² Appatta medda su wabbo'a tatambane apan nipaatta panaddianna sasamba itattambunna wuassu watu nipaangnga. Medda udde atanggakke setenga metere, wuṛṛu al᷊iurosone uataṛṛa wu'u appatta, al᷊o'engnge wuṛṛu al᷊alakke sambau-sambau tatallu sepere appatta metere. Su wowom manga medda udde niaddo saranapa ipamototta winatangnga sasamba.

⁴³ Winggin manga medda udde pia wiwikke al᷊alakke 75 milimetere. Anambon ṛemessa apan olaanna sasamba ia'addo su wowom manga medda udde.

⁴⁴ Wua'udde esakka udde nangapi'u watukku rallakku lal᷊umme. Isudde pia darua sabbua, sambau su sandiṛṛannu sasuttanna su sawannakka, wuṛṛu sambau lai su sansidaṛṛannu sasuttanna samba'a timukka wuṛṛu uasaruanna watukku sawannakka.

⁴⁵ Esakka udde nabbisara si ya'u manungku sabbua'a apan uasaruanna watukku timukka udde nisaddia su manga imam apan mammanara su Wal᷊e Mawu,

⁴⁶ wuṛṛu lai sabbua apan uasaruanna watukku sawannakka nisaddia su manga imam apan mammanara su mezbah. Anambon imam udde ṛinone wuassu papapulunni Zadok. Ana waugu wuassu ṛuanganni Lewi tumba'u papapulunni Zadok apan botongne sumaruanna Mawu wuṛṛu mangimbe si Tou sulal᷊ummu patataṛṛamawu.

Rallakku lal᷊umme wuṛṛu Wal᷊e Mawu

⁴⁷ Esakka udde nanguukka rallakku lal᷊umme. Saṛṛene uataṛṛa wu'u appatta: al᷊o'engne wuṛṛu al᷊alakke sambau-sambau 50 metere. Wal᷊e Mawu udde addone su samba'an waṛṛatta, wuṛṛu su saruanne pia sambau mezbah.

^48-49 Wua'udde i tou nangapi'u watukku wabbo'a su saruannu Wal᷊e Mawu ringannu suma'a manga pira tal᷊attaddu tuadda. I tou nanguukka wabbo'a suttanna; ahewalle pitu kali darua setenga metere, ringannu manga darandunge su winggine ruam ba'a aappale sambau setenga metere. Su aiṛṛi aikkatanne pia sambau pale. Wabboa saruanne udde sassane al᷊o'engnge mapul᷊o metere wuṛṛu al᷊alakke annumma metere.