YEHEZKIEL 4 - WUKE SUSI WATTI'U AL᷊AL᷊USASSA

I Yehezkiel napa'ellegu olangnge malliwunna Yerusalem

¹ Ruata nabbisara, “Ei taumata apan mattate, panganute sambau tela, addoa'e su saruannu wuṛṛu akkitte rosone hambarannu soan Yerusalem.

² Wua'udde hambara'a sambau palliwunanna su saruannu soa udde, ringannu manga hote, manga ombon leta'a, manga paddasananna wuṛṛu manga ahidda ipanggohakka tanda batu apan uapal᷊iwutta.

³ Panganute awali atta'a, wuṛṛu paṛṛimaun napa udde sambau darandungnga atta'a; addoa'e awali udde su wallanu wuṛṛu soan Yerusalem. Wua'udde saruante watukku soa udde ereola'u ete i'o apan mamangalo. Udde sarun maola'a lambanga su walahannu Israel.

^4-5 Ana see lallowangke ual᷊engge watukku aiṛṛi, wuṛṛu i Ya'u sarun mangandangu pasasal᷊an balahannu Israel si'o. Al᷊annune 390 su allone i'o sarun lumallowangnga aroddi wuṛṛu uatataṛṛangngu asasusa ana waugu pasasal᷊an mangitou. Massalo i'o ual᷊allowangnga aroddi maola'a lambanga santonna ṛuumanna su Israel.

⁶ Wua'udde, lallowangke su samba'a aikkatanna wuṛṛu pattemmate ṛuumanna ana waugu pasasal᷊an Yehuda appatu pul᷊o su allone al᷊annune, allo massallo udde atappasanne santonna ṛuumanni mangitou.

⁷ Pa'ellege palliwunanna Yerusalem. Wattea'e angkummu watukku soa udde wuṛṛu wal᷊oa'e tanata-U su ola'u ṛuumanna si mangitou.

⁸ I'o sarun Ta'u ṛapusanna ma'oman sara tawe maawal᷊engngu wadangngu wuassu aiṛṛi watukku aikkatanna ara'e iawal᷊i'a maddatingngu pamamangalo udde masue.

⁹ Orassa indi, panganute gandumma, jelai, kacangnga maṛṛamutta, tambue appe, sekoi wuṛṛu gandumma al᷊ussa. Luaṛṛa'e sarangkanambone udde wuṛṛu ola'e roti. Eteudde annu al᷊annune 390 su allone i'o ual᷊allowangnga watukku aiṛṛi udde.

¹⁰ Roti udde ṛinone tahiannu aroddi olangnge na'oman sara miallo-miallo i'o tumba'u umanna 230 garamma. Lumebbe wua isudde tate wotongnge.

¹¹ Ua'e inumannu lai itattumba'a, eteudde rua mangko allo massallo.

¹² Pakkunutten putungnga wuassu tain taumata maola'a hahatin alu. Lol᷊ote rotinu su putungnga udde, wuṛṛu ante roti udde su saruannu awadaalla.”

¹³ Mawu nabbisara, “Etearoddi olangnge taumatan Israel sal᷊immurine umanna anna apan isassingaddu tita Musa, sutempo i mangitou Ta'u niwuangnga watukku wanua awagananna.”

¹⁴ Arawe i ya'u sinumimbakka, “Uare Mawu Apan Atanggaṛṛanne! Ro'en ta'e addio'a naddatingngu orassa indi, taambe saran paassa nalluhudda wadangku ringannu anna wuassu binatangnga nate ara'e anna lamben winatangnga mal᷊aṛṛaga. Taambe saran paassa niumanna anna apan ipappalli.”

¹⁵ Ne Ruata nabbisara, “Aroddite, maola'a hahantin tain taumata, i'o wotongnge mappaattu tain sapi ipallaha rotinu.”

¹⁶ Wua'udde i Tou nabbisara apia, “Ei taumata apan mattate, i Ya'u sarun makkimunsa'a wal᷊ingkakku anna su Yerusalem. Ringannu sussinggawanga wuṛṛu ruddoro manga taumata sarun manumba'u anna apan aannananni mangitou wuṛṛu ua'e apan a'inumanni mangitou.

¹⁷ I mangitou sarun masusa ana waugu asueannu roti wuṛṛu ua'e, wuṛṛu panginsueanne i mangitou mate ana waugu manga rosa mangitou.”