YEHEZKIEL 38 - WUKE SUSI WATTI'U AL᷊AL᷊USASSA

Gog naola'a ahiddu ṛuumanna wuassu Mawu

¹ Mawu nabbisara si ya'u,

² “Ei taumata apan mattate, wontohete i Gog ratu mawantuga wuassu manga wanua Mesekh wuṛṛu Tubal su leta'u Magog.

³ Wal᷊oa'e si tou manungku i Ya'u, Mawu Apan Atanggaṛṛanne, uddewe seenne.

⁴ I ya'u sarun mamal᷊elongi tou, mangaittu pe'anna su ol᷊ane, wuṛṛu mamangkassa si tou sumabbangnga suadio'a ringannu tantarane. Manambo atonna tantarane uasa'e awal᷊o apan ual᷊uṛṛen laubba seragamma udde. Suapan tantara uaapiddu allungnga wuṛṛu hal᷊ele.

⁵ Ratu tatantalongannu manga tantara wuassu Persia, Sudan wuṛṛu Libia, sambau-sambau uaapiddu hal᷊ele wuṛṛu araposa waja.

⁶ Anambon tummanaṛṛanne wuassu manga wanua Gomer wuṛṛu Bet-Togarma su sawannakka, inaite suaddio'a ringanni tou wuṛṛu manambo walahanna waine tinumantalonga lai.

⁷ Doloṛṛa'e i tou pasaddia'e wuṛṛu doloṛṛa'e anambon tantara apan naammulli tou tadea'u uatehamma tumuṛṛutta parentane.

⁸ Manga pira tonna lai i tou sarun Ta'u parentanna iapapangalo sambau wanua ringannu tumanangnge apan buatte niammulla apia wuassu wallattu manambo walahanna wuṛṛu apan wua'udde natana'a su wanua udde ringannu matammudda. Gog sarun mangaṛṛo manga wowonen Israel apan mal᷊annute mal᷊annabba wuṛṛu napenen bilal᷊anna, arawe orassa indi tatanaannu tumanangnge apan mabbiakka ringannu paddarame.

⁹ I tou wuṛṛu tantarane see manambo walahanna apan uatantalongnga si tou rumanta mamangalo ere tandi'a wuṛṛu nanaappa wanua udde ere winabbawa.”

¹⁰ Mawu Apan Atanggaṛṛanne nabbisara si Gog, “Sutempo udde i'o sarun mangatokku ṛiinnu apan dal᷊eo.

¹¹ I'o nakkawessa inai mamangalo wanua apan tawe tanda batune udde, suapa tumanangnge mabbiakka ringannu matammuda wuṛṛu mal᷊angnganna su manga soa apan tawe darandungnge wuṛṛu tawe ahiddu pangalo.

¹² I'o sarun mangaṛṛo wuṛṛu maṛṛampassa manga saranapan tumana'u soa udde apan dorone ete winalal᷊anna udde. Tumanangnge apan niammulla wuassu al᷊awo'u walahanna, orassa indi piate darotongnga manambo wuṛṛu winatangnga wuṛṛu i mangitou natana'a su pusiddu runia.

¹³ Tumana'u Syeba wuṛṛu Dedan see manga mabbawal᷊u'a su manga wanuan Spanyol sarun maiwal᷊o si yamiu arendi, ‘Apa i'o sarun mandolokku tantaranu tumba'u ipangaṛṛo wuṛṛu maṛṛampassa wul᷊awanna sal᷊a'a, winatangnga wuṛṛu darotongnga, see maṛṛoota sarangkanambone udde?’ ”

¹⁴ Ana waugu udde Mawu Apan Atanggaṛṛanne nandolo'u iapapasingkattu tanata indi si Gog, “Ana waugu sutempo uma-U Israel mabbiakka ringannu matammuda, i'o nirumanta namangalo.

¹⁵ I'o nabbuatta wuassu tampa atatanaannu, marau su sawannakka, tatantalongannu tantara apan bahewalla wuṛṛu matohassa sarangkanambone tantara uasa'e awal᷊o wuassu al᷊awo'u hatin balahanna.

¹⁶ Wua i'o namangalo uma-U Israel naal᷊ihidda anginna lakkuti nanggohakka runia. Napawe tempone nia'omante, i'o sarun Ta'u irolokka mamanua su leta-U. Ringannu inolaang-Ku nirolokka si'o ei Gog, manga walahanna sarun maasingkatta isai i Ya'u, eteudde Ruata apan na'ukkassa.

¹⁷ Wal᷊inewe su olangngu i Ya'u dorone nabbisara sulal᷊ummu manga allang-Ku manga nabin Israel? I mangitou buatte nani'atta manungku sutempo apan addantane i Ya'u sarun mandolokku sangkatou iapapangalo Israel. I Ya'u Mawu Apan Atanggaṛṛanne buatte nabbisara.”

Ṛuumannu Ruata si Gog

¹⁸ Mawu Apan Atanggaṛṛanne nabbisara, “Arawe tawe nal᷊annu napawe i Gog buatte namangalo Israel, i Ya'u sarun manndona.

¹⁹ Wuṛṛu ringannu tumaniten nasa'u i Ya'u sarun mamansaga, manungku su allo udde pia linukka apan bahewalla su wanua Israel.

²⁰ Anambon inassa wuṛṛu manu'u winalanganna, anambon binatangnga wahewalla wuṛṛu maradio'a, wuṛṛu anambon taumata su runia sarun mangngindon atata'utta sumaruanna si Ya'u. Manga wowone sarun matannekka, manga rampissa sarun moṛṛotta wuṛṛu anambon darandungnga sarun maṛṛa'a.

²¹ Ana see i Gog Ta'u enggenanna rinangnu al᷊awo'u asasilaka. I Ya'u, Mawu Apan Atanggaṛṛanne buatte nabbisara. Tantarane sarun mapapangalo ringannu hal᷊ele mangitou.

²² I tou sarun Ta'u iṛṛuumanna ringannu al᷊aṛṛusa'itta wuṛṛu uapapate. Uranna masassaga wuṛṛu uranna eisse, putungnga wuṛṛu beleranga sarun Ta'u iwoso si tou wuṛṛu tantarane wuṛṛu su anambon balahanna apan buatte naammulli tou.

²³ Ringannu olangnge udde sarun Ta'u iapal᷊iatta'a si mangitou al᷊awo'u walahanna manungku i Ya'u indi mawantuga wuṛṛu na'ukkassa. Ne i mangitou masingkatte manungku ete i Ya'u Mawu.”