Biblia Todo Logo
Bìoball air-loidhne

- Sanasan -

YEHEZKIEL 37 - WUKE SUSI WATTI'U AL᷊AL᷊USASSA


Wawal᷊annu manga duṛṛi naaiga

1 I ya'u naapendamma taṛṛino Mawu, wuṛṛu Ghaṛṛaho-Ne nangapi'u sinumossokka su wawal᷊anne apan napene manga duṛṛi.

2 I ya'u niehettu Mawu mammal᷊iwutta wawal᷊anne udde, wuṛṛu i ya'u naasilo manungku su ahewallu wawal᷊anne udde uatal᷊eṛṛonga manga duṛṛi apan tumaniten manambo wuṛṛu naaige atonna.

3 Mawu naiwal᷊o si ya'u, “Ei taumata apan mattate, wotongngewe manga duṛṛi indi mabbiakka apia?” I ya'u sinumimbakka, “Mawu Apan Atanggaṛṛanne, tumba'u I'o apan masingkatta.”

4 Wua'udde Mawu nandolo'u mamasingkattu tanata-Ne su manga duṛṛi apan naaige udde,

5 “I Ya'u Mawu Apan Atanggaṛṛanne maniuppu singangu sulal᷊ummu waddangnge tadea'u i mangitou mabbiakka apia.

6 Ta'u iaddo lantikka wuṛṛu ṛemessa si'o wuṛṛu i yamiu Ta'u wa'isannu pisi. I yamiu Ta'u onggol᷊annu singangu ma'oman sara mabbiakka. Ne i yamiu masingkatte manungku ete i Ya'u Mawu.”

7 Wua'udde i ya'u Yehezkiel nabbisara su manga duṛṛi udde uasul᷊ungngu parenta Mawu. Wuṛṛu tantal᷊anna i ya'u mabbisara udde, i ya'u naaringikka tingikka uaṛṛateanna, ana waugu duṛṛi udde mannatakke massampa'a sambau ringannu waine.

8 Tantalanna i ya'u mannutukka, manga duṛṛi udde mannattakke pia lantikke wuṛṛu ṛemessa, ana see pia pisine lai arawe manga waddangnge udde taambe sasangngone.

9 Ruata nabbisara si ya'u, “Ei taumata apan mattate, pabbisarate su anginna. Wal᷊oa'e manungku i Ya'u, Mawu Apan Atanggaṛṛanne namarenta si tou tadea'u rumanta wuassu al᷊awo'u pappi'uanne, tadea'u maniuppu sasangngo sulal᷊ummu manga waddangnga apan nate udde tadea'u i mangitou mabbiakka apia.”

10 Ne i ya'u nabbisara uasul᷊ungngu parenta Mawu ne anginna lai nattiuppen sasangngo sulal᷊ummu manga waddangnga udde ana see i mangitou nabbiakka wuṛṛu dirumarisikka. Reenganni mangitou tumaniten manambo, wotongnge ipallanginnu sambau ammul᷊annu tantara apan bahewalla.

11 Ruata nabbisara si ya'u, “Ei taumata apan mattate, manga duṛṛi indi atappasanne walahannu Israel. I mangitou sussal᷊iomanna manungku i mangitou naaiga, tawe antimma wuṛṛu tate allo addantane.

12 Ana waugu udde pani'atte su uma-U Israel udde manungku i Ya'u, Mawu Apan Atanggaṛṛanne sarun mamu'a labbingi mangitou. I Ya'u sarun mapasabbangngi mangitou wua isudde wuṛṛu memelengngi mangitou su leta'u Israel.

13 Napawe i Ya'u buatte na'ola'a sarangkanambone udde, uma-U sarun maasingkatta manungku ete i Ya'u Mawu.

14 I Ya'u sarun maniuppu sasangngo sulal᷊ummu waddangngi mangitou tadea'u ipamiakka si mangitou, ana see i mangitou Ta'u iwala matanata'a su wanuane sassane. Ne i mangitou masingkatte manungku ete i Ya'u Mawu. I Ya'u Mawu buatte nabbisara wuṛṛu atonna sarun ma'ola'a.”


Yehuda wuṛṛu Israel naola'a sambau araratuanna apia

15 Mawu nabbisara apia si ya'u,

16 “Ei taumata apan mattate, anute sambau ta'inna wuṛṛu woṛṛeta'e manga wisara indi al᷊iurosone, ‘Araratuannu Yehuda’. Ana see panganu sambau ta'inna lai waine, wuṛṛu woṛṛeta'e al᷊iurosone: ‘Araratuannu Israel’.

17 Wua'udde aggasse ta'inna darua udde aroddi olangnge ma'oman sara manga pentakke massampa'a wuṛṛu maola'a ta'inna sambau.

18 Napawe walahannu maiwal᷊on atappasanne,

19 wal᷊oa'a si mangitou, manungku i Ya'u, Mawu Apan Atanggaṛṛanne sarun manganu ta'inna apan naola'a sumandingngu Israel wuṛṛu isampa'a ringannu ta'inna apan mannumandingngu Yehuda. Ta'inna darua udde Ta'u olaanna sambau wuṛṛu Ta'u iṛṛamissa sulal᷊ummu lima-U.

20 Agasse ta'inna darua udde wuṛṛu pasiloa'a su walahanna udde.

21 Ana see wal᷊oa'e si mangitou manungku i Ya'u, Mawu Apan Atanggaṛṛanne sarun mangul᷊e apia anambon walahang-Ku wuassu manga wanua suapa i mangitou buatte nanu. I mangitou sarun Ta'u iammulla wuṛṛu Ta'u iapidda apia watukku wanua mangitou sassane.

22 I mangitou sarun Ta'u olaanna sambau walahanna su leta'a udde, su panenteannu Israel. I mangitou sarun parentannu sangkatou ratu, wuṛṛu tate matahia maola'a darua walahanna ara'e araratuanna.

23 I mangitou tate mandal᷊eo watanganni mangitou ringannu ma'ola'a rosa wuṛṛu massubba manga paal᷊uanna apan maarantinna. I Ya'u sarun mamallossi mangitou wuassu al᷊awo'u tal᷊engko apan naaola'a si mangitou nangal᷊uandaga si Ya'u. I Ya'u sarun mapaasusi mangitou; i mangitou sarun maola'a uma-U, wuṛṛu i Ya'u Ruatan mangitou.

24-25 I mangitou sarun i'aukka su al᷊ungngu sangkatou ratu ere i Ratu Daud apan sarun mamarenta saran mal᷊annu-l᷊annu. Ringannu satia i mangitou sarun tumuṛṛutta manga tita-U. Wuṛṛu saran mal᷊annu-l᷊annu i mangitou see papapulunni mangitou sarun mamanua su leta'a udde, leta'a apan Ta'u nionggolla si Yakub wuṛṛu niwanuannu iupungngu al᷊amona mangitou.

26 I Ya'u sarun makkiinnu sambau pa'aire ringanni mangitou apan manohassa atatammudi mangitou saran mal᷊annu-l᷊annu. I Ya'u sarun mangal᷊amatta wuṛṛu manamba reenganni mangitou. Su leta'i mangitou sarun Ta'u iapararisikka Wal᷊e-U apan sidutu poiaroddi saran mal᷊annu-l᷊annu.

27 I Ya'u sarun manata'a suadio'a ringanni mangitou, i Ya'u sarun maola'a Ruata mangitou wuṛṛu i mangitou uma-U.

28 Napawe Wal᷊e-U uddete su pattangnganni mangitou saran mal᷊annu-l᷊annu, ne manga walahanna waine masingkatte manungku i Ya'u, Mawu apan buatte namile Israel maola'a uma-U sassane.”

Lean sinn:



Sanasan