YEHEZKIEL 36 - WUKE SUSI WATTI'U AL᷊AL᷊USASSA

Al᷊amattu Ruata su Israel

¹ Mawu nabbisara, “Ei taumata apan mattate, pabbisarate su manga wowon Israel wuṛṛu doloṛṛa'e i mangitou maddaringikka sasinaukku Mawu Apan Atanggaṛṛanne,

^2-6 ‘Sutempo manga walahanna su al᷊indongannu namangalo wuṛṛu nangaṛṛo si yamiu, i mangitou buatte nallobbossa ahewallu Israel. Ringannu lulluassa i mangitou mabbisara manungku orassa indi manga wuiddu al᷊amona udde nabbal᷊ite pussa'a mangitou. Ana waugu udde ei manga wowone wuṛṛu manga wuidda, manga sungene wuṛṛu wawal᷊anne, ei manga soa apan naola'e winalal᷊anna wuṛṛu apan buatte nitantangngu manga mamanuane see nipangaṛṛoanna wuṛṛu nial᷊uandahannu manga walahanna al᷊indonganne, paddaringikke wisara Mawu Apan Atanggaṛṛanne si yamiu: Sulal᷊ummu sasopan asasa'u-U i Ya'u mammasagu manga walahanna su al᷊indongannu wuṛṛu lembonete Edom, ana waugu i mangitou ringannu mal᷊uassa wuṛṛu mallobbossa, buatte nanganu leta-U wuṛṛu nangaṛṛo manga wadda'u nannal᷊one. Orassa indi i Ya'u massa'u wuṛṛu mandona ana waugu walahanna udde tumaniten manggelo see nangaddio'a si yamiu.

⁷ I Ya'u, Mawu Apan Atanggaṛṛanne massalu manungku manga walahanna su al᷊indongannu udde nihelo lai.

⁸ Arawe si yamiu Ta'u iwal᷊o ei manga wowon Israel, manga aaluannu sarun massolla wuṛṛu mabbua apia hunan uma-U Israel apan mal᷊ihakke mapul᷊e.

⁹ I Ya'u uasamba'a si yamiu ei Israel, wuṛṛu i Ya'u manantunna ringannu atonna manungku letangngu sarun pasol᷊anna apia wuṛṛu asi'annu wualanna.

¹⁰ I Ya'u sarun manamba reengannu uma-U Israel. I mangitou sarun matana'a su manga soa wuṛṛu mapararisikku apia al᷊awo'u winalal᷊anne.

¹¹ Tumanangnge wuṛṛu winatangngu sarun Ta'u tambanna, ma'oman sara mabbal᷊i manambo, mannamboanna wuassu paarorone, wuṛṛu i mangitou sarun ṛumana'a mappulunna manambo. I mangitou sarun mabbiakka poiaroddi ere paarorone wuṛṛu Ta'u olaanna ala, ere lai taambe saran paassa niapendamanni yamiu. Ne i yamiu masingkatte manungku ete i Ya'u Mawu.

¹² Uma-U Israel, sarun Ta'u iapidda mapul᷊e wuṛṛu matana'a su wanuane apia. Leta'a udde sarun maola'a pussa'a mangitou sassane wuṛṛu sidutu mangngonggollu hessine ma'oman sara manga ana'i mangitou tate lai mate amal᷊unusanna.’

¹³ I Ya'u, Mawu Apan Atanggaṛṛanne mabbisara, ‘Mangke atonna leta'a indi nisaggo taṛṛa inassa taumata wuṛṛu taṛṛa aṛṛo al᷊aṛṛana'a – walahanna apan uatana'a.

¹⁴ Arawe manattakka orassa indi tate uminassa taumata apia ara'e maṛṛampassa al᷊aṛṛana'i mangitou. I Ya'u Mawu Apan Atanggaṛṛanne buatte nabbisara.

¹⁵ Tate gunane lai leta'a indi maddaringikka aal᷊uandagu manga walahanna ara'e mamasanna hahelon taumata. Leta'a indi tate lai maaradda'a walahanna apan uatana'a isudde. I Ya'u Mawu Apan Atanggaṛṛanne buatte nabbisara.’ ”

Pallal᷊imbakku su Israel

¹⁶ Mawu nabbisara si ya'u,

¹⁷ “Ei taumata apan mattate, sutempo manga taumatan Israel uatana'a su wanua mangitou sassane, i mangitou buatte nandal᷊eo ringannu inolaanna wuṛṛu ala'uanni mangitou. I Ya'u ma'ellega ala'uanni mangitou udde palli, ere wawine apan tantal᷊anna aamatannu radda'u wawine.

¹⁸ Ta'u niapasabbanga asasa'u-U si mangitou ana waugu i mangitou buatte na'ola'a manambo pamamate su leta'a udde wuṛṛu nandal᷊eo ringannu massubba manga paal᷊uanni mangitou.

¹⁹ I mangitou Ta'u niṛṛuumanna uasul᷊ungngu ringannu ola'u pabbiaṛṛanna wuṛṛu ala'uanni mangitou, ana see i mangitou Ta'u nisal᷊iawukka watukku manga wanua waine.

²⁰ Watukkuapa i mangitou inai, i mangitou sidutu mandal᷊eo arang-Ku apan na'ukkassa. Ana waugu manga taumata mabbisara arendi, ‘Walahanna indi uddewe umattu Ruata, arawe i mangitou ṛinone manantangngu leta'a apan nionggollu Ruata si mangitou.’

²¹ I Ya'u mangke uatul᷊angnga ana waugu arang-Ku apan na'ukkassa buatte nilal᷊eo manga taumatan Israel suapan tampa i mangitou inai.

²² Ana waugu udde, wal᷊oa'e apa apan i Ya'u Mawu Apan Atanggaṛṛanne nabbisara su walahannu Israel, ‘Apa apan sarun Ta'u olaanna sal᷊immurine wal᷊inewe ana waugu i yamiu, ei manga taumatan Israel, ewe'e ana waugu arang-Ku apan na'ukkassa, apan buatte nilal᷊eong kamiu watuakkuapa i yamiu inai.

²³ I Ya'u sarun mapal᷊iatta'u awawantugu arang-Ku apan bahewalla udde, aranna apan buatte nilal᷊eong kamiu suwallattu manga walahanna, ne i yamiu masingkatte manungku i Ya'u Mawu. I Ya'u Mawu Apan Atanggaṛṛanne buatte nabbisara. I Ya'u sarun mappaatti yamiu tadea'u iapa'ellega su manga walahanna manungku i Ya'u indi na'ukkassa, Mawu Apan Lembonna'ukkassa.

²⁴ Wuassu anambon balahanna wuṛṛu wanua, i ya'u sarun Ta'u iammulla wuṛṛu Ta'u iapapul᷊e watukku letangngu sassane.

²⁵ Wua'udde i yamiu sarun Ta'u ṛente'annu ua'e matilangnga, tadea'u i yamiu mawaresi wuassu al᷊awo'u paal᷊uannu wuṛṛu wuassu al᷊awo'u manga apa apan buatte nandal᷊eo si yamiu.

²⁶ Ne i yamiu Ta'u onggol᷊annu naungnga apan bakku wuṛṛu ṛingiṛṛanna apan bakku. Naungngu apan maatikka ere watu udde sarun Ta'u hantiannu naungnga apan matuṛṛutta.

²⁷ Ghaṛṛaho-U sarun Ta'u ilal᷊inna sulal᷊ummu naungngu wuṛṛu i yamiu sarun Ta'u riaganna tadea'u mabbiakka tumuṛṛuttu manga tita-U see tuttuṛṛutta al᷊awo'u parenta-U.

²⁸ Ne i yamiu sarun matana'a su leta'a apan buatte Ta'u nionggolla su iupungngu al᷊amonanu. I yamiu sarun maola'a uma-U wuṛṛu i Ya'u lai sarun maola'a Ruatanu.

²⁹ I yamiu sarun Ta'u iliu wuassu al᷊awo'u al᷊al᷊eonu. I Ya'u sarun mangonggollu parenta su gandumma tadea'u tumuwo ringannu masuwukka ma'oman sara i yamiu tate lai aṛṛiaannu ṛutumma.

³⁰ I Ya'u sarun manamba asasuwukku aaluannu wuanu wuṛṛu hessi manga wawail᷊annu, ma'oman sara i yamiu tate lai maapendamma ṛutumma apan mandal᷊eo arannu suwallattu manga walahanna.

³¹ I yamiu sarun maanaungnga pallal᷊agunu apan dal᷊eo wuṛṛu inolaannu apan tawe suṛṛinone udde, ana see i yamiu mabbal᷊i mammuta batangannu sassane ana waugu manga rosa wuṛṛu al᷊al᷊eonu udde.

³² Naungete ei Israel, manungku sarangkanambone udde sarun Ta'u olaanna wal᷊inewe ana waugu i yamiu. I yamiu ṛinone maapendamma asasili wuṛṛu addio'a ana waugu pallal᷊agunu. I Ya'u Mawu Apan Atanggaṛṛanne buatte nabbisara.’ ”

³³ Mawu Apan Atanggaṛṛanne nabbisara, “Napawe i yamiu Ta'u niwaresi wuassu al᷊awo'u rosanu, i yamiu sarun Ta'u iwala matana'a su manga soanu apia, wuṛṛu mapararisikku apia manga winalal᷊anne.

³⁴ Dorone manga taumata apan u'amatta su manga wadda'i yamiu naasilo aroddi aṛṛasane leta'a udde, arawe i Ya'u sarun mamalang kamiu mamanara leta'a udde.

³⁵ Ne anambon taumata sarun tumiangnga, ana waugu leta'a apan tanginna maṛṛasa udde orassa indi nawal᷊ute nabbal᷊i wawail᷊annu Eden, wuṛṛu manga soa apan tanginna mal᷊annabba, naṛṛimunsa'a wuṛṛu naola'e manga winalal᷊anna, orassa indi naola'e manga soa apan matohassa taṛṛapane wuṛṛu manambo tumanangne.

³⁶ Ne manga walahanna al᷊indonganne apan ta'e isudde sarun maasingkatta manungku i Ya'u, Mawu, buatte napararisikku apia manga soa apan naṛṛimunsa'e, wuṛṛu nammanara apia manga wawail᷊anna apan nal᷊ol᷊okke. I Ya'u, Mawu, buatte nabbisara wuṛṛu atonna sarun ma'ola'a udde.”

³⁷ Mawu Apan Atanggaṛṛanne nabbisara, “Ei walahannu Israel, i yamiu Ta'u iwala apia maiontolla si Ya'u; i Ya'u sarun manimu reengannu ere ammul᷊annu domba.

³⁸ Manga soa apan orassa indi naṛṛimunsa'e, sal᷊immurine sarun mapenen tumanangnge ere Yerusalem su manga allo wahewa sutempo nal᷊iu, napene manga domba apan niola'a sasamba. Ne i yamiu masingkatte manungku ete i Ya'u Mawu.”