YEHEZKIEL 34 - WUKE SUSI WATTI'U AL᷊AL᷊USASSA

Manga mallal᷊u'addu Israel

¹ Mawu nabbisara si ya'u,

² “Ei taumata apan mattate, tagguete manga ratun Israel, wuṛṛu wal᷊oa'e apa apan i Ya'u, Mawu Apan Atanggaṛṛanne mabbisara si mangitou, ‘Nasilakate i yamiu, ei manga mallal᷊u'addu Israel. I yamiu tumba'u maṛṛingiddu hausannu watangannu sassane, wal᷊ine hausannu manga dombanu.

³ Susune niinummi yamiu, wambul᷊une niola'i yamiu laubba, wuṛṛu domba apan atawanne nipototti yamiu wuṛṛu niinassa. I yamiu tawe saran paassa namadul᷊i manga dombanu.

⁴ Manga domba apan lome tawe paddul᷊iananni yamiu, iapa maradda'a tawe undamanni yamiu, iapa nal᷊essa tawe wa'isanni yamiu, wuṛṛu iapa nilamammiṛṛane tawe reaanna wuṛṛu iapidda apia. Ewe'e lai anambon manga domba udde niola'i yamiu ringannu maṛṛagissa.

⁵ Ana waugu tawe mallal᷊u'adda, manga domba udde nassal᷊iawukka wuṛṛu naola'a inassu winatangnga mal᷊aṛṛaga.

⁶ Ne manga domba-U nabbal᷊i lullallele su manga wuidda apan matanggakka wuṛṛu su manga wowone. I mangitou nassal᷊iawukka su ahewallu runia, tawe saran sangkatou apan ma'ellega si mangitou ara'e maddea'a si mangitou.

⁷ Ne, manga mallal᷊u'adda, paddaringikke apa apan i Ya'u Mawu Apan Atanggaṛṛanne mabbisara si yamiu:

⁸ Sulal᷊ummu arang-Ku, Ruata apan biakka, panutukke! Manga domba-U buatte tinamboanna wuṛṛu niinassu winatangnga mal᷊aṛṛaga, ana taweddu mallu'adda si mangitou. I yamiu manga mallal᷊u'a-U tawe mandiaga manga domba udde. I yamiu tumba'u maṛṛingiddu watangannu sassane, wal᷊ine hausannu manga dombanu.

⁹ Nariaddi, paddaringikka ei manga mallal᷊u'adda.

¹⁰ I Ya'u, Mawu Apan Atanggaṛṛanne mabbisara si yamiu, manungku i Ya'u indi seennu. Manga domba-U udde sarun Ta'u anuanna apia wuassi yamiu wuṛṛu tate lai Ta'u iapariaga si yamiu; i yamiu tate lai Ta'u iwala maṛṛingiddu hausannu sassane. Manga domba-U sarun Ta'u iapaasal᷊amatta wuassi'o ma'oman sara i mangitou tate lai mabbal᷊i a'inasannu.’ ”

Mallal᷊u'adda apan mapia

¹¹ Mawu Apan Atanggaṛṛanne nabbisara, “I Ya'u sassane sarun maddea'a manga domba-U wuṛṛu mappadul᷊i si mangitou,

¹² maola'a sangkatou mallal᷊u'adda ṛinone maddea'a wuṛṛu mangammullu manga dombane apan nassal᷊iawukka ana see mamadul᷊i si mangitou. I mangitou sarun Ta'u iapidda mapul᷊e wuassu al᷊awo'u tampa i mangitou nassal᷊iawukka su allo apan marandumma wuṛṛu lal᷊eo udde.

¹³ I mangitou sarun Ta'u isabbangnga wuassu pattangngannu manga walahanna wuṛṛu manga wanua waine, ana see Ta'u iammulla wuṛṛu Ta'u iapidda watakku wanuane sassane. I mangitou sarun Ta'u lu'aranna su manga wowone wuṛṛu su manga wawal᷊annu Israel wuṛṛu Ta'u ehetanna i mangitou su manga wadda'u nannal᷊o apan mal᷊angnganna.

¹⁴ Atonna, i Ya'u sarun manaddia si mangitou manga wadda'u nannal᷊o apan masuwukka su panenteanna wuṛṛu su manga wawal᷊annu leta'u Israel. Poiaroddi i mangitou sarun mangillol᷊o wuṛṛu umanna nannal᷊o ringannu amanna.

¹⁵ I Ya'u sassane sarun maola'a mallal᷊u'addu manga domba-domba-U wuṛṛu manaddia tampa pangillol᷊oanna si mangitou; i Ya'u, Mawu Apan Atanggaṛṛanne buatte nabbisara.

¹⁶ Iapa nawul᷊i Ta'u reaanna, iapa nilamammiṛṛane sarun Ta'u iapidda mapul᷊e, iapa nal᷊essa Ta'u wa'isanna, wuṛṛu iapa maradda'a ta'u undamanna; arawe iapa matawa wuṛṛu matohassa sarun Ta'u pateanna, ana waugu i Ya'u mallal᷊u'adda apan ma'ola'a apapia.

¹⁷ Paddaringikka, ei manga domba-Ku! I Ya'u, Mawu Apan Atanggaṛṛanne nabbisara si yamiu manungku i Ya'u sarun makkuungngi yamiu sambau-sambau wuṛṛu maṛṛaen iapa mapia wuassi iapa lal᷊eo, manga domba wuassu manga ambinga.

¹⁸ Suwallatti yamiu piaddu tawe mawusa tumba'u mangnginsue nannal᷊o apan apianne, arawe mangke maṛṛinda nannal᷊o apan tawe annananni mangitou! I mangitou ma'inumma ua'e apan matilangnga ana see nallabukka ua'e apan tawe inumanni mangitou!

¹⁹ Manga domba-U apan baine ṛinone umanna nannal᷊o apan buatte niṛṛinda wuṛṛu ma'inumma ua'e apan buatte nilabbukka.

²⁰ Ana waugu udde, i Ya'u, Mawu Apan Atanggaṛṛanne mabbisara si yamiu, ei manga domba apan matawa, manungku i Ya'u sarun dumanta maola'a mallaṛṛuunga suwallattu domba apan matohassa wuṛṛu domba apan lome.

²¹ I yamiu mangke mannenggeka see mannandu'a domba apan marada'a na'oman sara i mangitou naṛṛa'e wuassu ammul᷊annu domba.

²² Arawe i Ya'u sassane sarun manal᷊amatta manga domba-U, tadea'u i mangitou tate lai olaanna ringannu maṛṛagissa. I Ya'u sarun makkuungngu manga domba-U sambau-sambau wuṛṛu maṛṛaen iapa apianne wuassu iapa lal᷊eo.

²³ I Ya'u sarun manenegu sangkatou ratu apan ere allang-Ku Daud, tadea'u maola'a mallal᷊u'addi mangitou, wuṛṛu i tou sarun mappadul᷊i si mangitou.

²⁴ I Ya'u, Mawu, sarun maola'a Ruatan mangitou, wuṛṛu ratu apan ere allang-Ku Daud sarun maola'a tembonanni mangitou. I Ya'u Mawu buatte nabbisara.

²⁵ I Ya'u sarun makkiinnu pa'aire ringanni mangitou, apan uariaga atatammudi mangitou. I Ya'u sarun mallimbuakka anambon binatangnga mal᷊aṛṛaga wuassu ahewallu wanua, ma'oman sara manga domba-Ku wotongnge matana'a ringannu matammuda su manga wadda'a wuṛṛu matiilla su manga mahurangnge.

²⁶ I Ya'u sarun mangal᷊amatta si mangitou wuṛṛu mamala mangitou matana'a su maranin wui-U apan na'ukkassa. I mangitou sarun Ta'u onggol᷊annu uranna napawe i mangitou mappandumma.

²⁷ Manga aaluanna sarun mabbua, manga wawail᷊anna sarun mangongollu hessine, wuṛṛu anambon taumata sarun matana'a ringannu matammuda su letangnge sassane. Amulangngu ṛate laṛṛapussa uma-U buatte Ta'u niwassutta wuṛṛu i mangitou buatte Ta'u nipallossa wuassu manga taumata apan mangngallanga si mangitou, ne i mangitou masingkatte manungku ete i Ya'u Mawu.

²⁸ I mangitou tate lai pangaṛṛoannu manga walahanna apan tawe maailal᷊a si Ya'u, ara'e tamboannu manga winatangnga mal᷊aṛṛaga. I mangitou sarun mabbiakka ringannu mal᷊angnganna, wuṛṛu tawe saran sangkatou apan mamata'utta si mangitou apia.

²⁹ I Ya'u sarun mapaasuwukku manga wawail᷊anni mangitou ma'oman sara tate tempon ṛutumma lai su wanua udde. I mangitou tate al᷊uandahannu manga walahanna waine.

³⁰ Ne anambon taumata masingkatte manungku Israel udde uma-U wuṛṛu manungku i Ya'u ual᷊u'adda si mangitou. I Ya'u, Mawu Apan Atanggaṛṛanne buatte nabbisara.

³¹ Atonna, ete i yamiu ammul᷊annu domba-U apan Ta'u nionggol᷊annu anna. I yamiu uddewe uma-U, wuṛṛu i Ya'u Ruatanu. I Ya'u, Mawu Apan Atanggaṛṛanne buatte nabbisara.”