YEHEZKIEL 32 - WUKE SUSI WATTI'U AL᷊AL᷊USASSA

Ratu Mesir nisumandingnga su wuala

¹ Su allo paarorone wul᷊anna mapul᷊o dua tonna mapul᷊o dua sutempo i yami niwuangnga, Mawu nabbisara si ya'u,

² “Ei taumata apan mattate, onggol᷊e'on tatagu apan maṛṛagissa su ratu Mesir. Wal᷊oa'e tanata-U indi si tou, ‘I'o nattanno ere singa parangganga suwallattu manga walahanna, arawe i'o naal᷊ihidda wuala apan mannalangnga sulal᷊ummu ua'e. Leddanu mallabukka wuṛṛu mannapadda al᷊awo'u sal᷊ukka.

³ Sutempo manga walahanna uaammulla, i Ya'u sarun manametta si'o ringannu soma-U, wuṛṛu mamalan manga walahanna udde wol᷊engannu watukku ammaranne.

⁴ I'o sarun Ta'u iwantingnga su leta'a wuṛṛu anambon manu'u winalanganna see winatangnga wuassu ahewallu runia sarun Ta'u irolokka iapa'inassa si'o.

⁵ Ana see manga wowone wuṛṛu manga wawal᷊anne sarun Ta'u peneannu manga winal᷊unannu apan mawukku'a udde.

⁶ Daṛṛanu sarun Ta'u iwoso ma'oman sara maṛṛolo manga wowone wuṛṛu mamene manga sal᷊ukka.

⁷ Sutempo i Ya'u mamate si'o, langitta sarun Ta'u oosanna wuṛṛu manga anumpitanna Ta'u paddumanna. Matannallo sarun Ta'u iwuni sulal᷊ummu winabbawa wuṛṛu wul᷊anna tate semakke.

⁸ Atonna, al᷊awo'u semakka su langitta sarun Ta'u paddumanna, wuṛṛu runia Ta'u olaanna wasa tuudda. I Ya'u, Mawu Apan Atanggaṛṛanne buatte nabbisara.

⁹ Sutempo i Ya'u namasingkattu watti'a su ola'u araṛṛimunsangu su manga wanua apan awaganannu, manambo walahanna nabbal᷊i sussinggawanga.

¹⁰ Atonna, i Ya'u sarun mallimben hal᷊ele-U wuṛṛu mamaddonu. Sutempo udde i mangitou sarun mangngindon atata'utta wuṛṛu mangngiladda ana waugu matta'utta mate.’ ”

¹¹ Mawu Apan Atanggaṛṛanne nabbisara su ratun Mesir, “Hal᷊elen ratun Babel sarun iwatte si'o.

¹² Manga tantara wuassu manga walahanna apan maṛṛagissa sarun Ta'u irolokka manawutta hal᷊ele mangitou sarun maṛṛata anambon tumanangngu. Tumanangngu wuṛṛu al᷊awo'u apa apan ipammunganu sarun mawul᷊i maṛṛimunsa'a.

¹³ Winatangngu sarun Ta'u ṛatanna su winggi manga sal᷊ukka sutempa i mangitou ma'inumma. Mawae ete taumata aroddi lai winatangnga tate mapallabukka ua'en sal᷊ukka udde apia.

¹⁴ Ne manga sal᷊ukka su wanuanu sarun Ta'u iapaatilangnga wuṛṛu Ta'u iapa'elekka ringannu matino. I Ya'u, Mawu Apan Atanggaṛṛanne buatte nabbisara.

¹⁵ Napawe Mesir Ta'u olaanna wadda'u anne apan mal᷊annabba, see Ta'u pateanna sarangkanambone apan utana'a isudde, i mangitou sarun maasingkatta manungku ete i Ya'u Mawu.

¹⁶ Tatagu apan maṛṛagissa indi sarun maola'a aantarin lall᷊al᷊o. Manga wawine wuassu manga walahanna waine sarun mangantari maola'a tatiala lullal᷊o su Mesir wuṛṛu anambon tumanangnge. I Ya'u, Mawu Apan Atanggaṛṛanne buatte nabbisara.”

Runian taumata nate

¹⁷ Su allo mapul᷊o l᷊ima wul᷊anna paarorone sulal᷊ummu tonna mapul᷊o dua sutempo i yami niwuangnga, Mawu nabbisara apia si ya'u,

¹⁸ “Ei taumata apan mattate, lallal᷊ote su lal᷊oṛṛon soa su Mesir. Doloṛṛa'e i mangitou watukku runian taumata nate suadio'a ringannu manga wanua apan matohassa waine.

¹⁹ Wal᷊oa'e si mangitou, ‘Su sunnanu ete i yamiu apan aṛṛamahanne? I yamiu sarun lumintikka su runian taumata nate, wuṛṛu iapal᷊allowanga suwallattu manga taumata apan tawe maaillal᷊a Ruata.’

²⁰ Walahannu Mesir sarun nate suadio'a ringanni mangitou apan nate sulal᷊ummu pangalo. Halele sammata nariahite ipamate si mangitou sarangkanambone.

²¹ Manga pahlawanna apan waṛṛani wuṛṛu manga taumata apan napapangalo nanamba'a Mesir mannal᷊oho ringannu lulluassa darantan taumata Mesir su runian taumata nate. I mangitou u'ui arendi, ‘Manga taumata apan waggan Duata udde natete sulal᷊ummu pangalo. Orassa indi i mangitou nirumantate isindi wuṛṛu tinumatterete isindi!’

^22-23 Asyur tinumatterete poiaroddi, tatalliwunannu holangngu manga tantarane. I mangitou sarangkanambone natete sulal᷊ummu pangalo. Labbingi mangitou udde su wageangnge apan al᷊al᷊umanne su runian taumata nate. Sutempo ta'e wiakka, i mangitou mammata'utta su runia.

^24-25 Elam poiaroddi lai ringannu holangngu tantarane uapal᷊iwutta si tou. Tawe nisunatta, i mangitou sarangkanambone nate sulal᷊ummu pangalo, ana see nilumintukke su runian taumata nate. Sutempo wiakka, i mangitou mammata'utta, arawe orassa indi i mangitou natete wuṛṛu ṛinone mamasanna asasili suadio'a ringannu manga taumata apan natete sulal᷊ummu pangalo.

²⁶ Mesekh wuṛṛu Tubal isudde lai, papal᷊iwutannu holangu manga tantara mangitou. Ringannu tawe nisunatta, i mangitou sarangkanambone nate sulal᷊ummu pangalo. Sutempo wiakka, i mangitou mammata'utta su runia.

²⁷ I mangitou tawe nilabbingnga ringannu mawantuga ere pahlawanna sutempo dorone apan sinumossokka su runian taumata nate ringannu ahidda nasuungnga. Manga pahlawanna udde nilabbinga ringannu hal᷊ele aillul᷊unanna wuṛṛu allungnga uarandanga su ro'o Sutempo ta'e wiakka, manga pahlawanna udde matohassa na'oman sara mammata'utta al᷊awo'u taumata.

²⁸ Etearoddi taumata Mesir sarun ilabbinga wuṛṛu iapatattere su tangnga manga taumata apan wagga Duata wuṛṛu nate sulal᷊ummu pangalo.

²⁹ Edom poiaroddi ringannu anambon ratu wuṛṛu tembonanne. Dorone i mangitou udde manga tantara apan matohassa, arawe orassa indi i mangitou ual᷊allowangke su runian taumata nate su sampunna ringannu manga taumata nate waine apan waggan Duata.

³⁰ Anambon parinsi wuassu sawannakka udde poiaroddi, aroddi lai manga taumatan Sidon. Dorone taṛṛino mangitou nandatan atata'utta, arawe orassa indi i mangitou niapaasili wuṛṛu ringannu tawe nisunatta sinumossokka su runian taumata nate suadio'a ringannu manga taumata nate sulal᷊ummu pangalo. Poiaroddi i mangitou ual᷊allowangnga wuṛṛu uapasanna pasasal᷊a su sampunna ringannu manga taumata apan sinumossokka su runian taumata nate.

³¹ Amungkangngu ratu Mesir wuṛṛu tantarane na'oma su runian taumata nate wuṛṛu ma'ellega anambon taumata udde apan nate sulal᷊ummu pangalo, i mangitou sarun maapendamma mal᷊uassa. I Ya'u Mawu Apan Atanggaṛṛanne buatte nabbisara.

³² Ete i Ya'u apan na'ola'a ratu Mesir napasabbangu atata'utta su manga taumata apan wiakka, arawe i tou wuṛṛu tantarane sarun mawiṛṛua wuṛṛu iapal᷊allowanga suadio'a ringannu anambon taumata apan waggan Duata wuṛṛu nate sull᷊ummu pangalo. I Ya'u Mawu Apan Atanggaṛṛanne buatte nabbisara.”