YEHEZKIEL 31 - WUKE SUSI WATTI'U AL᷊AL᷊USASSA

Mesir nisumandingnga ere cemaran Libanon

¹ Su allo paarorone wul᷊anna atallune sulal᷊ummu tonna mapul᷊oassa sutempo i yami niwuangnga, Mawu nabbisara si ya'u,

² “Ei taumata apan mattate, wal᷊oa'e tanata-U indi su ratu Mesir wuṛṛu su anambon balahanne: Tumaniten bahewalla awawantugu! Taweddu wotongnge maola'a ro'ammu!

³ I'o naal᷊ihidda cemaran Libanon apan maṛṛansangnga napenen rannane apan uasaṛṛihalo maṛṛamaga. Alune matul᷊idda wuṛṛu matolengnga otongnge naddatingngu winabbawa.

⁴ I tou tinumuwo ana waugu ua'ene natimu. Sal᷊ukka sulal᷊ummu leta'a nangonggollu anna, namokka al᷊awo'u ṛamunne, wuṛṛu naṛṛolo manga aaluanna waine.

⁵ Ana waugu ua'ene tawe mahaingnga, tatuwone masuwukka, rannane masallakka wuṛṛu mal᷊o'engnga. Wuassu al᷊awo'u aal᷊uanna su manga mahurangnge, ete i tou apan al᷊angkasanne uasampal᷊iu.

⁶ Al᷊awo'u manu'u winalanganna massal᷊akka su angkanaene. Winatangnga matengnga naṛṛana'a su al᷊ungne. Anambon balahanna wahewa su ahewallu runia inuma'ianna su al᷊unge.

⁷ Aaluanna udde maṛṛansangnga ellehanna; alune matul᷊idda, rannane mal᷊o'engnga. Ṛamunne nusippa malal᷊umma naddatingngu al᷊imatang kua'e sulal᷊ummu leta'a.

⁸ Manga punnu cemara su Eden, wawail᷊annu Ruata tawe iasul᷊ungngi tou. Tawe cemara apan botongne maal᷊awangnga si tou, tawe aal᷊uanna apan aroddi al᷊o'engnge rannane. Atonna, su wawail᷊annu Ruata tawe aal᷊uanna aṛṛansangnge ere i tou.

⁹ Ete i Ya'u apan na'ola'a si tou maṛṛansangnga ringannu manga rannane apan mal᷊o'engnga wuṛṛu masaṛṛihalo. Al᷊awo'u aal᷊uanna su wawail᷊annu Ruata mannaungnga lal᷊eo si tou.

¹⁰ Ana waugu udde, i Ya'u, Mawu Apan Atanggaṛṛanne, namasingkatta si'o apa apan sarun mariaddi su aal᷊uanna apan otongnge naddatingngu winabbawa udde. Ana waugu lembon matanggakka, i tou aatambanna wungane.

¹¹ Ne i Ya'u manol᷊a'i tou wuṛṛu sarun manantilla su tembonannu araratuanna waine, apan sarun ma'ola'a si tou uasul᷊ungngu al᷊al᷊eone.

¹² Tantaran araratuanna waine apan tawe ampungnge sarun manuwangnga si tou ana see iwalane. Angkanaene apan napaddite mannawote su anambon bowone wuṛṛu wawal᷊annu wanua udde. Anambon balahanna apan uatanaa'a su al᷊ungnge sarun massal᷊iu manantangngi tou.

¹³ Manga manu'u winalanganna sarun dumanta wuṛṛu umarunna su manga aal᷊uanna apan naṛṛaate udde, wuṛṛu manga winatangnga matengnga sarun maṛṛinda manga rannane.

¹⁴ Sarangkanambone udde mariaddi tadea'u manattakka orassa indi, tate lai aaluanna apan tumuwo atanggakke ereudde; tate lai puiddu aal᷊uanna apan maddatingngu winabbawa salaiwe maasomba ua'e manambo-nambo. Sarangkanambone sarun mate ere taumata apan mattate, wuṛṛu maammullu manga taumata apan buatte sinumossokka su runian taumata nate.”

¹⁵ Etearendi wisara Mawu Apan Atanggaṛṛanne, “Amungkangngu aaluanna udde sinumossokka su runian taumata nate, i Ya'u mandolokku ua'e sulal᷊ummu leta'a maṛṛamone tatialan lullal᷊o. I Ya'u sarun manaṛṛangnga ua'en sal᷊ukka wuṛṛu maṛṛapinga manga sungene. Ana waugu aaluanna udde natete, i Ya'u sarun mandantan ararandumma su manga wowonen Libanon wuṛṛu mapatolangngu anambon aaluanna su mahurangne.

¹⁶ Sutempo aaluanna udde Ta'u niapasossokka su runian taumata nate, tingikku aemangnge sarun mangio'u manga walahanna. Anambon aaluanna su Eden wuṛṛu manga aaluanna apan nipile su Libanon apan naasomba ua'e manambo-nambo, wuṛṛu apan sinumossokke su runia al᷊iuwowane sarun lumuassa ringannu aema'u aaluanna udde.

¹⁷ I mangitou sarun manantuṛṛutta watukku runian taumata nate wuṛṛu maammulli mangitou apan nanawote dorone. Wuṛṛu sarangkanambone apan dorone ua'ianna su al᷊ungngu aal᷊uanna udde sarun isal᷊iawukka suwallattu manga walahanna.

¹⁸ Aaluanna udde sasummandingngu ratu Mesir wuṛṛu walahanne. Tawe aaluanna su Eden apan aroddi atanggakke wuṛṛu mawantuga. Arawe orassa indi, ere manga aaluanna lai su Eden, aaluanna udde lai sarun sumossokka watukku runian taumata nate wuṛṛu maammulli mangitou apan tawe maaillal᷊a Ruata wuṛṛu ringanni mangitou apan nate sulal᷊ummu pangalo. I Ya'u, Mawu Apan Atanggaṛṛanne buatte nabbisara.”