YEHEZKIEL 3 - WUKE SUSI WATTI'U AL᷊AL᷊USASSA

¹ Ruata nabbisara, “Ei taumata mattate, ante wuke lalul᷊unanna indi, wua'udde roote wuṛṛu pabbatti'e su manga taumatan Israel.”

² Ana see ta'u niwu'a moṛṛongku wuṛṛu Ruata nangonggollu wuke lalul᷊unnanna udde si ya'u tadea'u ta'u annananna.

³ Wisara-Ne, “Ei taumata mattate, ante! Loṛṛoite tiannu ringannu wuke lalul᷊unanna indi.” Ana see wuke udde ta'u nianna wuṛṛu pendamanna matemangnga naal᷊ihidda pul᷊a.

⁴ Ruata nabbisara apia, “Ei taumata apan mattate, roote ringannu manga taumatan Israel wuṛṛu wal᷊oa'e anambon tanata-U si mangitou.

^5-6 Ete ringanni mangitou i'o Ta'u irolokka, wuṛṛu wal᷊ine su walahanna apan sasinaukke masahadda, paṛṛalane wuṛṛu tawe asunnannu. Unnu wisara i'o Ta'u irolokka ringannu walahanna ereudde, ne i mangitou sarun maddaringikka manga wisaranu.

⁷ Arawe walahannu Israel maddiri maddaringikka si'o, ewe'e i Ya'u lai tawe pandumanni mangitou. I mangitou sarangkanambone puane maatikka wuṛṛu apulune lullawangnga.

⁸ Orassa indi i'o Ta'u olaanna pua maatikka wuṛṛu pande ere i mangitou lai.

⁹ I'o Ta'u olaanna atohanne ere rapappakka wuṛṛu aatikke ere intan. Arie mata'uttu manga lumal᷊awangnga udde.”

¹⁰ Wua'udde Ruata nabbisara, “Ei taumata apan mattate, panutukke paapia-pia wuṛṛu naungete sarangkanambone apan Ta'u iwisara si yamiu.

¹¹ Roote ringannu walahannu poi su pamuanganna udde, wuṛṛu wal᷊oa'e apa apan i Ya'u, Mawu Apan Atanggaṛṛane mamasingkatta si mangitou, tanne i mangitou mappulu maddaringikka ara'e maddiri.”

¹² Wua'udde Ghaṛṛahon Duata namengketta si ya'u wuṛṛu su liu'u a'aringiṛṛanna tingikka mabbisara, “Paddalote awawantugu Mawu su surga!”

¹³ I ya'u naaringikka tingikku papaiddu manga riadianna udde apan uararadissa, wuṛṛu tingikku manga haṛṛagittu manga roda udde apan atelengnge massul᷊ungngu linukka.

¹⁴ Taṛṛino Mawu nirumanta si ya'u ringannu masaddata, wuṛṛu sutempo i ya'u niwengketta wuṛṛu niapiddu Ghaṛṛaho-Ne, naungku pendamanna mapetta wuṛṛu masal᷊ihamma.

¹⁵ Ne i ya'u na'omate su atatanaannu manga taumata apan niwuanga su Tel-Abib su winggin Sal᷊ukku Kebar. Al᷊annune pitu allo i ya'u uatana'a isudde; i ya'u mangke niagukke ana waugu sarangkanambone apan wakkute niaringiṛṛangku wuṛṛu niasiloangku udde.

Mawu nanebbo'i Yehezkiel naola'a mallal᷊u'adda Israel

¹⁶ Napawe pitu allo nal᷊iudde, Mawu nabbisara si ya'u,

¹⁷ “Ei taumata apan mattate, i'o Ta'u nitenega maola'a mallal᷊u'addu walahannu Israel. Wal᷊oa'a si mangitou pananaungnga apan Ta'u nionggolla indi.

¹⁸ Napawe i Ya'u mamasingkatta manungku sangkatou mandal᷊al᷊eo sarun mate, arawe i'o tawe mapanaungnga si tou tadea'u i'o mamal᷊u pallal᷊agune ma'oman sara i tou masal᷊amatta, ne i tou sarun mate ta'e lai sangkatou apan marosa, wuṛṛu su ola'u papatene, sarun pangansil᷊anne wuassi'o.

¹⁹ Amungkangngu i'o mapanaungngu taumata lal᷊eo udde wuṛṛu i tou maddiri umaddo ma'ola'a al᷊al᷊eo, i tou sarun mate ere sangkatou taumata marosa, arawe i'o sassane sarun masal᷊amatta.

²⁰ Amungkangngu sangkatou apan mapia manatakke ma'ola'a rosa, wuṛṛu i tou Ta'u iapasaruanna asasilaka, ne i tou sarun mate napawe i'o tawe mapanaungngi tou. I tou sarun nate ana waugu manga rosane, wuṛṛu manga inolaanne apan mapia tate Ta'u naunganna. Arawe su ola'u papatene udde sarun Ta'u ipa'iwal᷊o si'o.

²¹ Amungkangngu taumata mapia udde i'o mapanaungnga tadea'u arie ma'ola'a rosa, wuṛṛu i tou naddaringikka al᷊aṛṛangngu, ne i tou tawe Ta'u iṛṛuumanna, wuṛṛu i'o sarun masal᷊amatta.”

I Yehezkiel sarun mabbal᷊i mou

²² Ta'u niapendamanna atoha'u daranta Mawu wuṛṛu niaringiṛṛangku i Tou mabbisara si ya'u, “Apu'ote wuṛṛu roote watukku wawal᷊anne. Poiaroddi i Ya'u sarun maggahattonu.”

²³ Ne i ya'u inaite watukku wawal᷊anne, wuṛṛu isudde i ya'u naasilo semakka sussal᷊ol᷊ota apan mammasingkattu daranta Mawu ere lai apan buatte ta'u niasiloanna su winggin Sal᷊ukku Kebar. Wua'udde i ya'u nawal᷊atta uarammangnga su leta'a.

²⁴ Arawe Ghaṛṛahon Duata sinumutta wuṛṛu nanohassa si ya'u. Mawu nabbisara si ya'u, “Apul᷊ete wuṛṛu pangintammude sulal᷊ummu wal᷊en.

²⁵ Ei taumata apan mattate, i'o sarun ṛapusannu tal᷊i ma'oman sara tawe maasabbangnga wuṛṛu tawe mapasomban taumata.

²⁶ I ya'u sarun ma'ola'a lilanu tawe umal᷊ol᷊e ma'oman sara i'o tawe mapaanaungngu walahanna apan mal᷊awangnga indi.

²⁷ Paṛṛadote, amungkangngu i Ya'u mabbisara si'o apia wuṛṛu mamelengngu atatohannu maggahatto, i'o ṛinone mamasingkattu apa apan i Ya'u, Mawu Apan Atanggaṛṛanne mamasingkatta si mangitou. Sambageanganna wuassi mangitou sarun maddaringikka, arawe sambagenganna lai tawe, ana waugu i mangitou atonna walahanna mal᷊awangnga.”