YEHEZKIEL 29 - WUKE SUSI WATTI'U AL᷊AL᷊USASSA

Ṛuumanna su Mesir

¹ Su allo appul᷊oduane wul᷊anna appul᷊one, sulal᷊ummu tonna appul᷊one sutempo i yami niwuangnga, Mawu nabbisara si ya'u,

² “Ei taumata apan mattate, pakkammai'o ratu Mesir. Wal᷊oa'a si tou manungku i tou wuṛṛu anambon tumana'u Mesir sarun iṛṛuumanna.”

³ Mawu Apan Atanggaṛṛanne nandolo'u iapapasingkatta su ratu Mesir tanata indi, “I ya'u indi seennu, ei wuala masallakka apan ual᷊allowanga su sal᷊ukka. I'o mammahia manungku Sal᷊ukku Nil uddewe pussa'anu wuṛṛu manungku ete i'o apan na'ola'a.

⁴ I Ya'u sarun mantaingngu aaitta su ol᷊anu wuṛṛu mandeettu manga inassa su onammu. Wua'udde i'o Ta'u wollenganna sumabbangnga wuassu Sal᷊ukku Nil ringannu al᷊awo'u inassa apan uareetta su onammu udde.

⁵ Wua'udde i'o wuṛṛu al᷊awo'u inassa udde Ta'u ituntungnga su wadda'u anne. Wadangngu sarun mawantingnga su leta'a wuṛṛu tumal᷊allada isudde. Tawe sarang sangkatou apan mallabingu. Wadangngu sarun Ta'u ionggolla su manga manu'u winalanganna wuṛṛu manga winatangnga waine iapa'inassa.

⁶ Ne anambon tumana'u Mesir maasingkatte manungku ete i Ya'u Mawu.” Mawu nabbisara, “Ei walahannu Mesir! Taumatan Israel mangngantimma sasumbalanu, arawe inauranna i'o tumba'u naal᷊ihidda sambau ta'inna apan lome.

⁷ Sutempo i mangitou uaunsandakka si'o, i'o napaddi wuṛṛu nangusu'a anggal᷊ea'i mangitou, na'oman sara liuddi mangitou naggal᷊isa.

⁸ Ana waugu udde i Ya'u, Mawu Apan Atanggaṛṛanne, mamasingkatta si'o, manungku i Ya'u sarun mandolokku tantara apan sarun mamangalo si'o ringannu hal᷊ele, wuṛṛu mamate tumanangnge see manga winatangngu.

⁹ Mesir sarun mabbal᷊i leta'a apan mal᷊annabba. Ne i yamiu masingkatte manungku ete i Ya'u Mawu.” Mawu nabbisara, “Ei ratu Mesir! Ana waugu i'o nabbisara manungku Sal᷊ukku Nil udde pussa'anu wuṛṛu manungku ete i'o apan na'ola'a,

¹⁰ ne i Ya'u naola'e seennu, wuṛṛu seettu Sal᷊ukku Nil pussa'anu. Ahewallu Mesir sarun Ta'u olaanna leta'a apan mal᷊annabba manattakka wuassu soa Migdol su sawannakka maddatingngu soa Aswan su timukka, ma'oman sara passarannu Sudan.

¹¹ Tawe taumata ara'e winatangnga apan umamatta isudde. Al᷊annune appatu pul᷊o su tonnane tawe taumata apan matana'a isudde.

¹² I Ya'u sarun ma'ola'a Mesir mal᷊annabba ma'oman sara suwallattu manga wanua mal᷊annabba waine, ete Mesir apan al᷊annawanne. Al᷊annune appatu pol᷊o su tonnane manga soa su Mesir sarun maola'a manga tuidda apan maddal᷊eoanna wuassu manga tuiddu soa waine. Walahannu Mesir sarun Ta'u olaanna manga taumata massal᷊iu. I mangitou sarun massal᷊iawukka su al᷊awo'u wanua wuṛṛu matana'a su pattangngannu walahanna waine.”

¹³ Mawu Apan Atanggaṛṛanne nabbisara, “Ei walahannu Mesir, napawe nasuete appatu pul᷊o su tonanne udde, i yamiu Ta'u iapidda apia mabbelengnga sutampa i yamiu nisal᷊iawukka.

¹⁴ I yamiu sarun Ta'u iapaapia wuṛṛu Ta'u irolokka matana'a su Mesir samba'a timukka, leta'a niariadiannu. Poiaroddi i yamiu sarun ma'ola'a araratuanna apan lome,

¹⁵ apan al᷊omeanne su ahewallu runia. I Ya'u sarun ma'ola'a si yamiu tumaniten lome na'oman sara i yamiu tawe mapamarenta manga walahanna waine ara'e mamunga batangannu si mangitou.

¹⁶ Israel tate lai maddorongnga sasumbala si'o. Pal᷊addu pabbiaṛṛannu ei walahannu Mesir sarun mapanaungngu Israel aroddi nial᷊iwune mangngasakku Mesir, ere buatte niolangne. Ne Israel naasingkatte manungku ete i Ya'u Mawu Apan Atanggaṛṛanne.”

I Ratu Nebukadnezar sarun mamaddo Mesir

¹⁷ Su allo paarorone wul᷊anna paarorone sulal᷊ummu tonna ruan pul᷊o pitu sutempo i yami niwuangnga, Mawu nabbisara si ya'u,

¹⁸ “Ei taumata apan mattate, i Ratu Nebukadnezar wuassu Babel tantal᷊anna mammangalo Tirus. I tou nandolokku manga tantarane mamasanna manga winabbawa aroddi awakkanne, na'oman sara pua mangitou nabbal᷊i lunggukka wuṛṛu wambangngi mangitou nangkalisi, arawe mawae ratu aroddi lai tantarane tawe naasomba hessine wuassu inasaharanne udde.

¹⁹ Ana waugu udde, i Ya'u Mawu Apan Atanggaṛṛanne nabbisara: Leta'u Mesir sarun Ta'u ionggolla si Ratu Nebukadnezar. I tou sarun mangaṛṛo wuṛṛu maṛṛampassa see maṛṛootta anambon pa'aala Mesir maola'a lal᷊antakku tantarane.

²⁰ Leta'u Mesir Ta'u ionggolla si tou maola'a lal᷊antakku manga inasaharanne, ana waugu tantarane buatte nammanara huna-U. I Ya'u, Mawu Apan Atanggaṛṛanne buatte nabbisara.

²¹ Napawe olangnge udde nariaddite, i Ya'u sarun ma'ola'a Israel walahanna apan matohassa, wuṛṛu nangonggollu tempo si'o Yehezkiel, mabbisara ringannu apulunu sassane ma'oman sara awadaalla wotongnge maddaringikka si'o. Ne i mangitou masingkatte manungku ete i Ya'u Mawu.”